ކޮމިޝަނަރ އޮފް ޕޮލިސްގެ ވާދައިގެ ތައްޓަށް ކުޅޭވޭ އިންޓަރ ޑިޕާޓްމަންޓް ވޮލީބޯޅަ މުބާރާތުގެ އަންހެން ޑިވިޝަންގެ ޗެމްޕިއަންކަން ޓީމް ކޮމްބައިން ހޯދިއިރު ފިރިހެން ޑިވިޝަންގެ ޗެމްޕިއަންކަން ޑިވިޝަނަލް ޕޮލިސިންގ ކޮމާންޑް ހޯދައިފިއެވެ.

އަންހެން ޑިވިޝަންގެ ޗެމްޕިއަންކަން ޓީމް ކޮމްބައިން ހޯދީ ޒުވާނުންގެ މަރުކަޒުގެ އެތެރޭ ކޯޓުގައި މިއަދު ހެނދުނު ކުޅުނު ފައިނަލް މެޗުގައި ޓީމް ސީއޯސީ އާވާދަކޮށް ސީދާ ތިން ސެޓުން މެޗު ކާމިޔާބުކޮށްގެންނެވެ. މިމެޗުގެ ސެޓްތައް ޓީމް ކޮމްބައިންއިން ކާމިޔާބުކުރީ 25-16، 25-15 އަދި 25-9 ންނެވެ. ފައިނަލް މެޗުގެ މޮޅު ކުޅުންތެރިޔާގެ މަޤާމަށް ހޮވުނީ ޓީމް ކޮމްބައިންގެ ހައްވާ ރާޝިދާއެވެ.

ފިރިހެން ޑިވިޝަންގެ ޗެމްޕިއަންކަން ޑިވިޝަނަލް ޕޮލިސިންގ ކޮމާންޑުން ހޯދީ މިއަދު ހެނދުނު ކުޅުނު ފައިނަލް މެޗުގައި އެސްއޯއާރުސީ އާވާދަކޮށް ސީދާ ތިން ސެޓުން ކުރިހޯދައިގެންނެވެ. މިމެޗުގެ ސެޓްތައް އެޓީމުން ކާމިޔާބުކުރީ 25-16، 25-22 އަދި 25-22 ންނެވެ. ފައިނަލް މެޗުގެ މޮޅު ކުޅުންތެރިޔާގެ މަޤާމަށް ހޮވުނީ ޑިވިޝަނަލް ޕޮލިސިންގ ކޮމާންޑްގެ ޞާދިޤް މޫސާއެވެ.

އަންހެން ޑިވިޝަންގެ އެންމެ މޮޅު ހަ ކުޅުންތެރިންނަަށް ހޮވުނީ ޓީމް ކޮމްބައިންގެ ހައްވާ ރާޝިދާއާއި ލީލާ ހާމިދު އާއި ފާތިމަތު ޒީނިޔާ މޫސާ އާއި ޓީމް ސީއޯސީގެ ޙަދީޖާ އިބްރާހިމް އާއި ހާމިދާ ޢަބްދުލް އަލީމް އާއި ފާތިމަތު އަރޫޝާއެވެ. އަންހެން ޑިވިޝަންގެ ފެއަރޕްލޭ ކުޅުންތެރިޔަކަށް ހޮވުނީ އައިއެސްޑީ ރަނިންގެ ފާތިމަތު ތަސްނީމްއެވެ. އަންހެން ޑިވިޝަންގެ އެންމެ އުއްމީދީ ކުޅުންތެރިޔާގެ މަޤާމަށް ޓީމް ކޮމްބައިންގެ ޙައިފާ އިމާދު ހޮވުނުއިރު، މުޅިމުބާރާތުގެ އެންމެ މޮޅު ކުޅުންތެރިޔާގެ މަޤާމަށް ހޮވުނީ ޓީމް ކޮމްބައިންގެ ޙައްވާ ރާޝިދާއެވެ.

އަންހެން ޑިވިޝަންގެ އެންމެ ހިންގުންތެރި މެނޭޖަރަކަށް ޓީމް ސީއޯސީގެ މެނޭޖަރު ޙަދީޖާ އިބްރާހިމް ހޮވުނުއިރު، އަންހެން ޑިވިޝަންގެ އެންމެ މޮޅު ކޯޗަކަށް ހޮވުނީ ޓީމް ކޮމްބައިންގެ ކޯޗު ޚާލިދު މުޙައްމަދެވެ. އަންހެން ޑިވިޝަންގެ ފެއަރޕްލޭ ޓީމަކީ ޓީމް އައިއެސްޑީއެވެ.

ފިރިހެން ޑިވިޝަންގެ އެންމެ މޮޅު ހަ ކުޅުންތެރިންނަށް ހޮވުނީ ޑިވިޝަނަލް ޕޮލިސިންގ ކޮމާންޑްގެ މުހައްމަދު ޔާސީން އާއި ސިނާން ހުސައިން އާއި އަހްމަދު ސޮބާޙް އާއި އެސްއޯއާރުސީގެ ޙަސަން ޝަހުބާން އާއި އަޙްމަދު ޢަބްދުލް ސައްތާރު އާއި ޙުސައިން ހަމީދުއެވެ. ފިރިހެން ޑިވިޝަންގެ އެންމެ މޮޅު ލިބަރޯއަކަށް ހޮވުނީ އެސްއޯއާރުސީގެ ލިބަރޯ އަޙްމަދު ނާމީއެވެ. ފިރިހެން ޑިވިޝަންގެ ފެއަރޕްލޭ ކުޅުންތެރިޔަކަށް ޕޮލިސް ކަސްޓޯޑިއަލްގެ ޝުއައިބް ޢަބްދުލް ލަތީފް ހޮވުނުއިރު، އެންމެ އުއްމީދީ ކުޅުންތެރިޔާގެ މަޤާމަށް ހޮވުނީ ޓީމް އައިއެސްޑީގެ ޙަސަން އަރުޝަމް ފައިސަލްއެވެ.

ފިރިހެން ޑިވިޝަންގެ އެންމެ މޮޅު ކުޅުންތެރިޔާގެ މަޤާމަށް ޑިވިޝަނަލް ޕޮލިސިންގ ކޮމާންޑްގެ މުޙައްމަދު ޔާސީން ހޮވުނުއިރު، ފިރިހެން ޑިވިޝަންގެ އެންމެ ހިންގުންތެރި މެނޭޖަރަކަށް ހޮވުނީ ޑިވިޝަނަލް ޕޮލިސިންގ ކޮމާންޑްގެ މެނޭޖަރު ފާތިމަތު ޝިބާނާ ޙަސަންއެވެ. ފިރިހެން ޑިވިޝަންގެ ފެއަރޕްލޭ ޓީމަކީ އައިޑީ ކުލަބެވެ. ފިރިހެން ޑިވިޝަންގެ އެންމެ މޮޅު ކޯޗަކަށް ހޮވުނީ ޑިވިޝަނަލް ޕޮލިސިންގ ކޮމާންޑްގެ ކޯޗު ޝިރުހާން އިބްރާޙިމްއެވެ.

ސީޕީ ކަޕް އިންޓަރ ޑިޕާޓްމަންޓް ވޮލީބޯޅަ މުބާރާތުގެ ޗެމްޕިއަން ޓީމަށް ޓްރޮފީއާއި މެޑަލް ބައްސަވާ ދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދުއެވެ. ރަނަރަޕް ޓީމަށް ޓްރޮފީއާއި މެޑަލް ބައްސަވާދެއްވީ ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފްއެވެ.

ޕޮލިސް ކުލަބުން އިންތިޒާމްކޮށްގެން ބާއްވާ ސީޕީ ކަޕް ވޮލީބޯޅަ މުބާރާތަކީ ފުލުހުންގެ މުއައްސަސާގެ ކޮމާންޑް، ޑައިރެކްޓްރޭޓް އަދި ޑިޕާޓްމަންޓްތަކަށް ހުޅުވާލައިގެން މުވައްޒަފުންގެ މެދުގައި ކުޅިވަރުގެ ރޫޙް އާލާކޮށް އެކުވެރިން ބަދަހިކުރުމުގެ ގޮތުންނާއި ވޮލީކުޅޭނެ ހުނަރުވެރި ކުޅުންތެރިން އުފެއްދުމުގެ ގޮތުން ކޮންމެ އަހަރަކު ބާއްވަމުން އަންނަ މުބާރާތެކެވެ.

އޭޕްރީލް މަހުގެ 24 ވަނަ ދުވަހުން ފެށިގެން މެއި 4 ވަނަ ދުވަހުގެ ނިޔަލަށް ކުރިއަށް ގެންދިޔަ މި މުބާރާތުގައި ޖުމްލަ 14 ޓީމަކުން ބައިވެރިވެފައިވެއެވެ. ދެ ޑިވިޝަނަކަށް ބަހާލައިގެން ކުރިއަށް ގެންދިޔަ މި މުބާރާތުގެ އަންހެން ޑިވިޝަންގައި ހަތަރު ޓީމަކުން ބައިވެރިވެފައިވާއިރު، ފިރިހެން ޑިވިޝަންގައި ބައިވެރިވެފައިވަނީ 10 ޓީމެކެވެ.