ރާއްޖެއިން ހައްޔަރު ކުރި ލަންކާގެ 21 މަސްވެރިން ދޫކޮށްލައިފި
12 އެޕްރީލު 2019 | ހުކުރު 14:28އެ މީހުން ލަންކާ އަށް ގޮސްފައި ވަނީ ބުރާސްފަތި ދުވަހުގެ ރޭ
ރާއްޖެއިން ދޫކޮށްލި ލަންކާ މަސްވެރިން އެ ގައުމުގެ އެއާޕޯޓުގައި
ރާއްޖޭގެ އިގްތިސާދު ސަރަހައްދަށް ގަވާއިދާ ހިލާފާށް ފެބްރުއަރީ މަހު ފަހުކޮޅު މަސްވެރިކަން ކުރަން ވަދެ އުޅުނު އަވަށްޓެރި ސްރީލަންކާގެ 21 މަސްވެރިން ދޫކޮށްލައިފިއެވެ.
ގަވާއިދާ ހިލަފަށް ވަދެ އުޅުން ހަތަރު މަސް ބޯޓުގެ ތެރެއިން ތެރެއިން ދެ ބޯޓެއް ފެނިފައި ވަނީ ހއ.ކެލާގެ އިރު އުތުރުން 103 ނޯޓިކަލް މޭލު ބޭރުންނެވެ. އަދި އަނެއް ދެ ބޯޓު ފެނިފައި ވަނީ ކުރިން ފެނުނު ދެ މަސްބޯޓު ހދ.ކުޅުދުއްފުއްޓަށް ގެނައުމަށް އެމްއެންޑީއެފް ކޯސްޓްގާޑު ހުރަވީ ދަތުރުކުރަމުން ދަނިކޮށް އެމްއެންޑީއެފް އިން ވަނީ ބުނެފައެވެ.
ލަންކާގެ މަސްވެރިން ރާއްޖޭއިން ދޫކޮށްލާފައިވާ ކަމަށް ލަންކާގެ ފިޝަރީޒް އެންޑް އެކުއެޓިކް ރިޒޯސެސް ޑިވޮލޮޕްމެންޓް ދިލިޕް ވަނީ އެ ގައުމުގެ ނޫހެއް ކަމަށްވާ ޑެއިލީ މިރާއަށް ޔަގީން ކޮށްދެއްވާފައެވެ. އޭނާ ވިދާޅުވި، ރާއްޖޭގައި ހައްޔަރު ކުރެވުނު 21 މަސްވެރިން ބުރާސްފަތި ދުވަހު ސްރީލަންކަން އެއާލައިންގެ ފްލައިޓަކުން އެ ގައުމަށް ގޮސްފައިވާ ކަމަށެވެ.
މަސްވެރިން ދޫކޮށްލާފައި ވަނީ ލަންކާ ބޮޑު ވަޒީރު ރަނިލް ވިކްރަމަ ސިންހާއާ ރާއްޖޭގެ ސަރުކާރުގެ އިސް ފަރާތްތާކައި ކުރެވުނު މަޝްވަރާތަކަށް ފަހުން ކަމަށް ލަންކާގެ ޑެއިލީ މިރާ އިން ރިޕޯޓްކުރެއެވެ. ލަންކާ ސަރުކާރުން ބުނާ ގޮތުން ދޫކޮށްލާފައި ވަނީ 21 މަސްވެރިންނެވެ. ނަމަވެސް އެމްއެންޑީއެފްގެ ބެލުމުގެ ދަށަށް 25 މަސްވެރިޔަކު ވަނީ ގޮސްފައެވެ. އެކަމާ ގުޅޭ ގޮތުން ފޮރިން މިނިސްޓްރީގެ ބަހެއް ލިބޭ ގޮތް ވަނީ ނުވެފައެވެ.
ލަންކާގެ މަސްވެރިންތަކެއް ރާއްޖެ އިން ދޫކޮށްލާފައިވާއިރު، ލަންކާ އާއި ރާއްޖޭގެ ކަނޑުގެ ސަރަހައްދު ދެ ގައުމަށް ވެސް ބޭނުން ކުރެވޭނެ ގޮތެއް ހޯދެން ޖެހޭ ކަމަށް ކުރީގެ ރައީސުލްޖުމްހޫރިއްޔާ މުހައްމަދު ނަޝީދު ވަނީ ވިދާޅުވެފައެވެ.
ލަންކާގެ މިނިވަން ދުވަސް ފާހަގަ ކުރުމަށް ރާއްޖޭގައި ބޭއްވި ރަސްމިއްޔާތެއްގައި ރައީސް ނަޝީދު ވިދާޅުވީ، ރާއްޖެއާ ލަންކާއާ ދޭތެރޭގައި ކިތަންމެ ގިނަ ހުރަސްތަކެއް ހުއްޓަސް ދެ ގައުމު މަސައްކަތް ކުރަން ޖެހޭނީ އެކަތިގަނޑަކަށް ވެގެން ކަމަށެވެ.
އެއީ ވޯކް ޕާމިޓް، ވަޒީފާގެ ފުރުސަތު އަދި ވިސާގެ މައްސަލަތަކަކަށް ވިޔަސް އެ ހުރިހާ ކަމެއް ވެސް ހައްލުކޮށް، އަމާޒަކަށް ވާން ވާނީ އެކަތިގަނޑަކަށް މަސައްކަތް ކުރުން ކަމަށް އެމަނިކުފާނު ވިދާޅުވެފައިވެއެވެ.
