ސަރުކާރުގެ ހުށަހެޅުންތައް މަޖިލީހުން ފެއިލްވާ ތަން ބަލަން ބޭނުމެއް ނުވޭ: ރައީސް

ސަރުކާރުން ރައްޔިތުންގެ މަޖިލީހަށް ހުށަހަޅާ ކަންކަން މަޖިލީހުން ފެއިލްވާ ތަން، ވެރިކަމުގައި ހުންނަވައިގެން ބަލަން ބޭނުންފުޅު ނުވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ކެލާ ދާއިރާއަށް ވާދަ ކުރައްވާ އެމްޑީޕީ ކެންޑިޑޭޓް އިބްރާހިމް ޝަރީފަށް ތާއިދު ހޯއްދެވުމަށް ހއ. ފިއްލަދޫއަށް ވަޑައިގެން، އެ ރަށުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ސަރުކާރެއް ހިންގުމުގައި މަޖިލީހުގެ އެއްބާރުލުން ބޭނުންވާ މިންވަރު ތަޖުރިބާ ކުރެވިފައިވާ ކަމަށެވެ. އެމްޑީޕީގެ ސަރުކާރަށް މަޖިލީހުގެ އެއްބާރުލުން ނުލިބުމުން ވަރަށް ގިނަ ގޮންޖެހުންތަކެއް ކުރިމަތިވި ކަމަށް ފާހަގަ ކުރައްވައި ރައީސް ވިދާޅުވީ އެ ދުވަސްވަރު ރޭގަނޑު ނުނިދައި ހުރެ، މަޖިލީހަށް ދާން ޖެހޭ ދުވަސް އަންނަ ކަމަށާއި ސަރުކާރުން ހުށަހަޅާ ބިލުތައް ފާސްކުރުމަށް ގޮންޖެހުންތަކާ ކުރިމަތިވި ކަމަށް ރައީސް ވިދާޅުވިއެވެ.

"ބައެއް ރޭރޭ އަޅުގަނޑު ހުންނާނެ ރޭގަނޑު ހޭލަ ހުރެ، އަނެއް ދުވަހު ރައްޔިތުންގެ މަޖިލީހުގެ ޖަލްސާއަށް ގޮސްފައި. އެއީ ހުށަހަޅާ ބިލުތަކަށް ވޯޓު ހޯދުމަށްޓަކާ ލޮބީ ކުރުމަށް. މެމްބަރުންނާ ގުޅިގެން. އެހެން ނަމަވެސް ރައްޔިތުންގެ މަޖިލީހުގައި އަޅުގަނޑުމެންނަށް އަގުލަބިއްޔަތު ނެތުމާ އެކީގައި މެނިފެސްޓޯ ތަންފީޒު ކުރުމަށް ގޮންޖެހުންތަކެއް ދިމާވި،" ރައީސް ސޯލިހު ވިދާޅުވިއެވެ.

"އަޅުގަނޑެއް ހަމަ ގައިމު ވެސް ވެރިކަމުގައި ހުރެ، ދެކޭކަށް ބޭނުމެއް ނުވޭ، ރައްޔިތުންގެ މަޖިލީހުގެ ތެރޭގައި މިކަންތައްތައް [ސަރުކާރުގެ ވައުދުތައް] ފެއިލްވެގެން ދާތަށް ބަލާކަށް."

ފިއްލަދޫގައި ވާހަކަފުޅު ދައްކަވަމުން ރައީސް ސޯލިހު ވަނީ ކެލާ ދާއިރާގައި ހިމެނޭ ތިން ރަށް ކަމުގައިވާ ހއ. ކެލާ އާއި ހއ. ފިއްލަދޫ އާއި ހއ. ވަށަފަރަށް ކޮށްދެއްވާނެ ކަންތައްތައް ވިދާޅުވެ ދެއްވާފައެވެ. އެގޮތުން ކެލާގެ މަގު ހެދުމާއި ބަނދަރުގެ ދެ ވަނަ ފިޔަވަހީގެ މަސައްކަތް ފެށުމާއި ފެނުގެ ނިޒާމު ގާއިމު ކުރުމުގެ މަސައްކަތް ފަށާނެ ކަމަށް ވިދާޅުވިއެވެ.

ފިއްލަދޫގައި މިއަހަރު ފެނާއި ނަރުދަމާ ނިޒާމު ގާއިމު ކުރުމުގެ މަސައްކަތް ފަށާނެ ކަމަށާއި ފިއްލަދޫއާ އެއްފަސްގަނޑަކުން ގުޅިފައިވާ ފަޅުރަށް، ހއ. ދައްޕަރު ފަތުރުވެރި ކަމަށް ހުޅުވާލާނެ ކަމަށް ރައީސް ވިދާޅުވިއެވެ. އަދި ވިދާޅުވީ ފިއްލަދޫގެ ސިއްހީ މަރުކަޒުގެ ޖާގައިގެ ދަތިކަން ހައްލުކޮށް، މުވައްޒަފުން އިތުރު ކުރައްވާނެ ކަމަށާއި އެ ރަށުގެ މަގުތައް ހެދުމުގެ މަސައްކަތް ވެސް ފައްޓަވާނެ ކަމަށެވެ.

ހއ. ވަށަފަރުގެ ފެނާއި ނަރުދަމާ ނިޒާމުގެ ގާއިމު ކުރުމުގެ މަސައްކަތް މިއަހަރު ފަށާނެ ކަމަށް ވެސް ރައީސް ވިދާޅުވިއެވެ.

ތިލަދުއްމަތީގެ ރަށްތަކަށް ރައީސް އިއްޔެ ފެއްޓެވި ދަތުރުފުޅުގައި ހަތް ރަށަށް ވަޑައިގެންނެވިއެވެ.