އެސްޓީއޯ އިން ކާޑުގެ އަގުހެޔޮ ކޮށްފި

ރާއްޖޭގެ ހުރިހާ ރަށެއްގައި ކާޑު ވިއްކާ އަގު ހެޔޮކޮށްފިއެވެ.

އެސްޓީއޯ އިން ބުނީ މި މަހު 1 ވަނަ ދުވަހުން ފެށިގެން ކާޑުގެ ބާވަތްތައް އަގު ހެޔޮވާނެ ކަމަށެވެ.

Advertisement

އެގޮތުން ހަނޑޫ ބަސްތާއެއް ދެން ވިއްކާނީ 240ރ. އަށް، ހަކުރު ބަސްތާއެއް 241ރ. އަދި ގޮދަންފުށް ބަސްތާއެއް 109ރ. އަށެވެ. މި ބަދަލާ އެކު ހަކުރު ކިލޯއެއް ވަކިން ވިއްކާނީ 4.82ރ. އަށެވެ. ހަނޑޫ ކިލޯއެއް 4.80ރ. އަދި ފުށް ކިލޯއެއް 3.80ރ. އަށް ވިއްކާނެވެ.

ކާޑުގެ އަގުހެޔޮކޮށްފައިވާއިރު، މާލެއާ އެއް އަގެއްގައި ހުރިހާ ރަށެއްގައި ކާޑުގެ ބާވަތްތައް ވިއްކުމަށް އެސްޓީއޯ އިން ނިންމީ މިދިޔަ މަހު އެވެ. އަދި ނާލާއި މަޖޫރީ ފީ އެސްޓީއޯ އިން ދޭ ގޮތަށް ވެސް ނިންމާފައިވާއިރު، ކާޑު ވިއްކާނީ އެސްޓީއޯ އިން ކަނޑައަޅާ އެޖެންޓުންތަކެއް މެދުވެރިކޮށެވެ.

އެސްޓީއޯ އިން ބުނީ ކާޑު ވިއްކާ އެޖެންޓުން ހޯދަންކުރި އިއުލާނާ އެކު ހުށަހެޅި ފަރާތްތަކަށް ބަލައި މިހާތަނަށް 112 ރަށެއްގައި އެޖެންޓުން ކަނޑައަޅާފައިވާ ކަމަށެވެ. އަދި އިތުރު 10 ރަށަކުން ކަނޑައަޅާފައިވާ އެޖެންޓުންނާ އެކު ސޮއިކުރުމަށް ތައްޔާރުވަމުން އަންނަ ކަމަށް ވެސް އެސްޓީއޯ އިން ބުންޏެވެ. މިހާތަނަށް ހުށަހެޅުމެއް ލިބިފައި ނުވަނީ 61 ރަށަކަށް ކަމަށާއި އެ ރަށްރަށުން ވެސް އެޖެންޓުން ހޯދުމުގެ މަސައްކަތްކުރަމުން އަންނަ ކަމަށް އެސްޓީއޯ އިން ބުންޏެވެ.

އެސްޓީއޯ އިން ބުނީ އެޖެންޓުންނަށް ކާޑު ދޫކުރުމުގެ މަސައްކަތް މާރޗް މަހުގެ 26 އިން ފެށިގެން ކުރަމުން އަންނަ ކަމަށާއި އެހެންކަމުން މިހާތަނަށް ކާޑު ދޫކުރެވިފައިވާ ރަށްތަކުން ހެޔޮ އަގުގައި ކާޑުގެ ބާވަތްތައް ލިބޭނެ ކަމަށެވެ.

ކާޑުގެ އަގުތައް ހެޔޮކޮށް ހަމަހަމަކުރުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދުގެ ތެރޭގައި ހިމެނޭ ކަމެކެވެ. އެމަނިކުފާނު ވަނީ ކާޑުގެ ބާވަތްތައް އަގުހެޔޮ ކުރުމަށް އެސްޓީއޯގެ މެނޭޖްމަންޓާއި ސްޓާފުން ކޮށްދިން މަސައްކަތަށް ޝުކުރު އަދާކުރައްވާފައެވެ.