އާއްމު އިންތިޚާބާ ގުޅޭ އިންތިޚާބީ ޝަކުވާގެ ހަތް މައްސަލަ ހުށަހެޅިފައިވާ ކަމަށް ދިވެހިރާއްޖޭގެ ހައިކޯޓުން ބުނެފިއެވެ. 

ބުދަ ދުވަހު ހައި ކޯޓުން ބުނެފައި ވަނީ އާއްމު އިންތިޚާބާ ގުޅޭ ޝަކުވާގެ ހަތް މައްސަލަ ދިވެހިރާއްޖޭގެ ހައިކޯޓަށް ހުށަހެޅިފައިވާ ކަމަށާއި، މި ހަތް މައްސަލައަކީ ވެސް ވޯޓުލާ މީހުންގެ ލިސްޓްގައި ނަން ނެތިގެން ހުށަހަޅާފައިވާ ހަތް މައްސަލަ ކަމަށެވެ. އެ މައްސަލަތަކުގެ އަޑުއެހުންތައް އަދި ތާވަލު ނުކުރާ ކަމަށް ވެސް އެ ކޯޓުން ބުނެފައި ވެއެވެ. 

ހައި ކޯޓުން އެހެން ބުނެފައިވާއިރު، 10 އޭޕްރީލް ވާ ބުދަ ދުވަހުގެ މެންދުރު ފަހު 02:00 އާ ހަމައަށް އިންތިހާބާ ގުޅޭ ޝަކުވާ ބަލައިގަތުމަށް ހަމަޖެހިފައިވާ ކަމަށާއި، އެކަމަށް ހުށައަޅާ ފޯމު އަތޮޅު ނުވަތަ ސިޓީ ކޮމްޕްލެއިންސް ބިއުރޯތަކުންނާއި، ކައުންސިލްގެ އިދާރާ އަދި އިލެކްޝަންސް ކޮމިޝަނުން ލިބެން ހުންނާނެ ކަމަށް އިލެކްޝަންސް ކޮމިޝަނުން ވަނީ ބުނެފައެވެ. 

އިންތިޚާބީ ޝަކުވާގެ މައްސަލަތައް ބެލުމުގެ އިޚްތިޞާޞް ލިބިދީފައި ވަނީ ދިވެހިރާއްޖޭގެ ހައިކޯޓަށެވެ. އިންތިޚާބީ ޝަކުވާގެ މައްސަލަތައް، އިންތިޚާބުގައި ވާދަކުރާ ކެންޑިޑޭޓަކަށް ނުވަތަ، ސިޔާސީ ޕާޓީއަކަށް، އޮބްޒަރވަރަކަށް މޮނިޓަރ ކުރާ މީހަކަށް ނޫން ނަމަ އިންތިޚާބާ ބެހޭ ކަންކަން ހިންގައި ބަލަހައްޓާ މީހަކަށް ވެސް ހައިކޯޓަށް ހުށަހެޅިދާނެއެވެ