ސަރަހައްދީ ސަބްމެރިން ކޭބަލް އެސޯސިއޭޝަންގެ 35ވަނަ އަހަރީ ބައްދަލުވުން ފަށައިފި
ސިއޮކްމާގައި ސޮއިކޮށްފައިވާ 48 މެމްބަރު ކުންފުނީގެ ފަރާތުން 144 ބައިވެރިން މި ފަހަރުގެ ބައްދަލުވުމުގައި ބައިވެރިވޭ
ސިއޮކްމާގެ 35 ވަނަ އަހަރީ ބައްދަލުވުމުގެ ތެރެއިން
ސަރަހައްދީ ސަބްމެރިން ކޭބަލް އެސޯސިއޭޝަން، ސައުތް އީސްޓް އޭޝިއާ އެންޑް އިންޑިއަން އޯޝަން ކޭބަލް މެއިންޓެނަންސް އެގްރީމެންޓް (ސިއޮކްމާ)ގެ މެނޭޖީރިއަލް ކޮމިޓީގެ 35 ވަނަ އަހަރީ ބައްދަލުވުން ފަށައިފިއެވެ.
އަންގާރަ ދުވަހު ބަނޑޮސް އައިލެންޑް ރިސޯޓުގައި ފެށި ބައްދަލުވުމުގައި ބައިވެރިވެ ވަޑައިގަންނަވަނީ ސިއޮކްމާގައި ސޮއިކޮށްފައިވާ 48 މެމްބަރު ކުންފުނީގެ ފަރާތުން 144 ބައިވެރިންނެވެ. މި މަހުގެ 21 ވަނަ ދުވަހާއި ހަމައަށް ކުރިޔަށްދާ ބައްދަލުވުން އިންތިޒާމް ކޮށްގެން ކުރިޔަށް ގެންދަނީ ދިރާގުންނެވެ. މި ބައްދަލުވުމުގައި މައިގަނޑު ގޮތެއްގައި ބައިވެރިން މަޝްވަރާކުރަން ހަމަޖެހިފައިވަނީ ސަބްމެރިން ކޭބަލްގެ ނިޒާމް އިތުރަށް ހަރުދަނާ ކުރެވޭނެ ގޮތްތަކާއި ބެހޭގޮތުންނާއި ސަބްމެރިން ކޭބަލް މެއިންޓެނަންސްގައި ދިމާވާ ދަތިތަކާއި ބެހޭގޮތުންނެވެ.
ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ދިރާގުގެ ޗެއަރަމަން ވިދާޅުވީ ސިއޮކްމާއަކީ މި ސަރަހައްދުގެ އެއްމެ ފުންނާބު އުސް ސަބްމެރިން ކޭބަލް މެއިންޓެނަންސް ފޯރުކޮށްދޭ ފަރާތް ކަމަށެވެ. އަދި މިހާތަނަށް ދިރާގުގެ ސަބްމެރިން ކޭބަލްތަކަށް ދިމާވި މައްސަލަތައް ހައްލުކޮށް ދިނުމުގައި ސިއޮކްމާއިން ފޯރުކޮށްދީފައިވާ އަވަސް އަދި ފުރިހަމަ ހިދުމަތަށް އޭނާ ވަނީ ތައުރީފްކޮށް ޝުކުރު އަދާކުރައްވާފައެވެ. އޭނާ ވަނީ ދިރާގުގެ ހިދުމަތްތައް އިތުރަށް ފުރިހަމަ ކުރުމުގެ ގޮތުން ސަބްމެރިން ކޭބަލް މެއިންޓެނަންސްގެ އަގުތައް ދަށްކުރުމަށް ސިއޮކްމާގެ މެމްބަރުން އަރިހުން އެދިވަޑައިގެންފައެވެ.
މި ބައްދަލުކުރެއްވުމާއި ބެހޭގޮތުން މަޢުލޫމާތު ދެމުން ދިރާގުގެ ޓެކްނޮލޮޖީ ޑިޕާޓްމެންޓްގެ މެނޭޖަރ އިބްރާހިމް އަންވަރު ވިދާޅުވީ ސިއޮކްމާއާއެކު ދިރާގުން ބައިވެރިވާން ނިންމީ އެއީ މި ސަރަހައްދުގައި އެއްމެ އަވަހަށް ސަބްމެރިން ކޭބަލްއަށް ދިމާވާ މައްސަލަތައް ހައްލުކޮށް ދިނުމުގެ ގާބިލިއްޔަތު ހުރި ފަރާތަށް ވުމުން ކަމަށެވެ.
ދިރާގު ސިއޮކްމާގެ މެމްބަރަކަށްވީ އެ ކުންފުނިން 2006 ވަނަ އަހަރު އިންޓަނޭޝަނަލް ކޭބަލް ބޭނުންކުރަން ފެށި ހިސާބުންނެވެ. ސިއޮކްމާގެ ކޭބަލް މެއިންޓެނަންސް ފެސިލިޓީތައް ލަންކާ، ސިންގަޕޫރު އަދި ފިލިޕީންސްގައި ގާއިމްކުރެވިފައި ވާއިރު، މައްސަލައެއް ދިމާވާތާ 24 ގަޑި އިރުގެ ތެރޭގައި ސިއޮކްމާގެ އެހީ ލިބެއެވެ.
