ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ހޭލުންތެރިކުރުމުގެ މަސައްކަތު ބައްދަލުވުމެއް ކަސްޓަމްސްގައި ބާއްވައިފިއެވެ.
މިމަސައްކަތު ބައްދަލުވުން ފަރުމާކޮށް ތައްޔާރުކުރުމަށްޓަކައި ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ކަސްޓަމްސްއިންވަނީ އޮންލައިން ސަރވޭއެއް ހިންގާފައެވެ.
މި މަސައްކަތު ބައްދަލުވުން ފައްޓަވައިދެއްވުމުގެ ގޮތުން ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ނުޢުމާން ދެއްކެވި ވާހަކަފުޅުގައި ކުދި އަދި މެދު ފަންތީގެ ވިޔަފާރިތަކަކީ އިޤްތިސާދުގެ ވަރަށް މުހިންމު ބައެއް ކަމަށާ، އެފަދަވިޔަފާރިތައް ކުރިއެރުމަކީ އޭގެ ސަބަބުން ރައްޔިއްތުންނަށާ ޤައުމަށް ގިނަގުނަ ފައިދާކުރާނެ ކަމެއްކަމުގައި ފާހަގަކުރެއްވިއެވެ.
މިގޮތުން ސަރުކާރުން މިސެކްޓަރއަށް އަމާޒުކޮށް ޙާއްސަ ސިޔާސަތުތަކެއް ކަނޑައަޅާފައިވާ ކަމަށާ، ކަސްޓަމްސްގެ އަމާޒަކީ ވެސް އެފަރާތްތަކަށް ކަސްޓަމްސްގެ ދާއިރާއިން ހުރި ގޮންޖެހުންތައް ދެނެގަނެ އާންމު ވިޔަފާރިވެރިންގެ ޚިޔާލާއެކު ޚިދުމަތްތައް އިތުރަށް ހަރުދަނާކޮށް ހަލުވިކުރުން ކަމަށް ބުނެފައިވެއެވެ.
17 ބައިވެރިންނާއިއެކު ކުރިއަށް ގެންދިޔަ މަސައްކަތު ބައްދަލުވުމުގައި، އިމްޕޯޓް / އެކްސްޕޯޓްކުރުމަށްޓަކައި ކަސްޓަމްސްގައި ރަޖިސްޓްރީ ކުރުމާއި މުދަލުގެ ޑިކްލަރޭޝަން ހުށަހެޅުމާއި، މުދަލުގެ އަގު ފާސްކޮށް ޑިކްލަރޭޝަން ޕްރޮސެސް ކުރުމުގައި އަމަލު ކުރަމުންދާ ގޮތްތަކާއި، ރިސްކް މެނޭޖްމެންޓް ސިސްޓަމް "ހިރާސް ނިޒާމް" ދަށުން މުދަލުގެ ޑިކްލަރޭޝަންތައް ޗެނަލް ވަމުންދާގޮތުގެ މަޢުލޫމާތު ބައިވެރިންނަށް ދީފައިވެއެވެ.
މީގެ އިތުރުން ޕޯސްޓް ކްލިއަރަންސް މަރުޙަލާގައި ކަސްޓަމްސްއިން އަމަލުކުރާގޮތްތަކާއި ޚިދުމަތް ހޯއްދަވާ ފަރާތްތަކަށް ތަފާސްހިސާބު ލިބޭނޭ ލުއިފަސޭހަ ގޮތްތައް ބައިވެރިންނަށް އޮޅުންފިލުވައިދީފައިވެއެވެ.
މިއީ "ޚިދުމަތުގައި ކުރިއަށް" މިޝިއާރުގެ ދަށުން އަހަރުގެ ފުރަތަމަ ތިންމަސް ދުވަހަށް އަމާޒުކޮށް ކަސްޓަމްސްއިން ކަނޑައަޅާފައިވާ 24 ލަނޑުދަނޑީގެ ތެރޭގައި ހިމެނޭ ހަރަކާތެކެވެ.
