މޯލްޑިވިސް އެސޯސިއޭޝަން ހިއުމަން ރިސޯސަސް ( އެމްއޭއާރްއެޗްޕީ) އިން އިންތިޒާމް ކޮށްގެން ބާއްވާ ނެޝަނަލް ހިއުމަން ރިސޯސް ކޮންވެންޝަން އެންޑް އެކްސްޕޯ 2019 ފަށައިފިއެވެ.
އެޗްއާރްގެ ދާއިރާގައި ހަރަކާތްތެރިވާ ފަރާތްތަކަށް ހާއްސަކޮށްގެން ދަރުބާރުގެ ރަންނަބަނޑޭރި މާލަމުގައި ހޯމަ ދުވަހު ހެނދުނު ފެށި މިކޮންވެންޝަން ގައި އެޗްއާރްގެ ދާއިރާގައި މަސައްކަތް ކުރާ 300 އަށް ވުރެ ގިނަ މީހުން ބައިވެރިވެއެވެ. މި ރަސްމިއްޔާތު ޝަރަފްވެރި ކޮށްދެއްވީ ވަނީ ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަންއެވެ.
ދެދުވަހުގެ މުއްދަތަކަށް ކުރިޔަށް ގެންދާ މި ކޮންވެންޝަންގެ ތީމަކީ ''ފިއުޗާ އޮފް އެޗްއާރް އެންޑް ވޯކް" އެވެ.
އެޗްއާރްގެ ދާއިރާއިން ހުރި ފުރުސަތުތަކުގެ އިތުރުން އެޗްއާރްގެ ދާއިރާގައި ހަރަކާތްތެރިވާ ފަރާތްތަށް ކުރިއެރުވުމަށް ކުރެވޭނެ މަސައްކަތާއި ބެހޭ ގޮތުން މިކޮންވެންޝަންގައި މައުލޫމާތުދެވޭނެއެވެ.
ރާއްޖޭގައި މުޅިން އަލަށް ބާއްވާ މި އެކްސްޕޯ ގައި އިންޑިއާ، ސިންގަޕޫރް، އިނގިރޭސިވިލާތް، ސްރީލަންކާގެ އިތުރުން ސްވިޑަންގެ އެޗްއާރް ޕްރޮފެޝަނަލް ފަރާތްތަކުން ބައިވެރިވާނެ ކަމަށް އެމްއޭއާރް އެޗްޕީން މައުލޫމާތުދެއެވެ.
މި އެކްސްޕޯއާ ބެހޭގޮތުން ވާހަކަ ދައްކަމުން އެމްއޭއާރް އެޗްޕީގެ ރައީސް ހުސެން އަފީފް ވިދާޅުވީ، މި އެކްސްޕޯގެ ސަބަބުން ހިއުމަން ރިސޯސަސް ދާއިރާގައި ހަރަކާތްތެރިވާ ފަރާތްތަކަށް ރާއްޖޭގެ އިތުރުން އެހެނިހެން ގައުމުތަކުގައި އެޗްއާރް ހިންގާ ގޮތުގެ މައުލޫމާތު ލިބިގެން ދާނެ ކަމަށާއި، ބައިވެރިންނަށް އެޗްއާރް ގައި ހުރި ފުރުސަތުތަކުގެ މައުލޫމާތުވެސް ފޯރުކޮށްދެވޭނެ ކަމަށެވެ.
ހިއުމަން ރިސޯސެސް ދާއިރާގައި ގިނަ ދުވަސް ތަކެއް ވަންދެން ހަރަކާތްތެރިވަމުން އަންނަ އަފީފް ވިދާޅުވީ، މި ފަދަ ހަރަކާތެއް ހިންގުމުގެ އެންމެ ބޮޑު ބޭނުމަކީ އެޗްއާރްގައި ހަރަކާތްތެރިވާ ފަރާތްތަކަށް ރާއްޖޭގައި ތިބެގެން މި ފަދަ ފުރުސަތުތައް ހޯދައި ދިނުން ކަމަށެވެ. ކޮންވެންޝަންގެ ކޮންމެ ބައިވެރިޔަކަށް ސެޓްފިކެޓް އެއް ހަވާލު ކުރަން ހަމަޖެހިފައިވާ ކަމަށް ވެސް އަފީފް ވިދާޅުވިއެވެ.
