އެމެރިކާ ލީގުގެ ގިނަ ރެކޯޑްތައް އޮންނަ ރިއަލް ސޯލްޓް ލޭކްގެ ކީޕަރ ނިކް ރިމާންޑޯ މި ސީޒަނަށް ފަހު ރިޓަޔާކުރާނެކަން އިއުލާންކޮށްފިއެވެ.
މި އަހަރުގެ ޖޫން މަހު 40 އަހަރުވާ ރިމާންޑޯއަކީ އެމެރިކާ ލީގުގައި މި ސީޒަނުގެ އެ ކްލަބުގެ އެއް ނަމްބަރ ކީޕަރަށްވާއިރު، އޭނާ ވަނީ މި ސީޒަނަކީ އޭނާގެ ފަހު ސީޒަންކަން އިއުލާންކޮށްފައެވެ.
ރިމާންޑޯ ބުނީ، ފުޓުބޯޅައިން އޭނާއަށް ގިނަ ކަންކަން ހާސިލްވެފައިވާ ކަމަށާއި، މި ހިސާބަށް އޭނާއަށް އާދެވުނީ ގިނަ ބައެއްގެ އެއްބާރުލުމާ އެކު ކަމަށެވެ. އެގޮތުން އޭނާ ވަނީ އެ ހުރިހާ ފަރާތްތަކަށް ޝުކުރު އަދާކޮށްފައެވެ.
މިއާމީ ފިއުޝަންއިން 2000 ވަނަ އަހަރު ކެރިޔަރު ފެށި ރިމާންޑޯ ވަނީ އެ ކްލަބަށް ކުޅުނު ދެ ސީޒަނުގައި 56 މެޗު ކުޅެފައެވެ. އެއަށްފަހު އޭނާ ބަދަލުވީ 2002 ވަނަ އަހަރު ޑީސީ ޔުނައިޓެޑަށެވެ. އޭނާ ވަނީ އެ ކްލަބާ އެކު ފަސް އަހަރު ހޭދަކޮށް، 109 މެޗު ކުޅެފައެވެ.
Thank you for everything. pic.twitter.com/ftn2OmncLn
— Nick Rimando (@NickRimando) March 1, 2019
ޑީސީ ޔުނައިޓެޑު ދޫކޮށް 2007 ވަނަ އަހަރު ރިމާންޑޯ ބަދަލުވީ އޭނާ މިހާރުވެސް ކުޅެމުން އަންނަ ރިއަލް ސޯލްޓް ލޭކްއަށެވެ. އޭނާ ވަނީ މިހާތަނަށް އެޓީމަށް މިހާތަނަށް 354 މެޗު ކުޅެފައެވެ. އަދި އޭނާ ވަނީރިއަލް ސޯލްޓް ލޭކްއާއެކު އެމްއެލްއެސް ކަޕް ކާމިޔާބުކޮށްފައެވެ.
އެމެރިކާ 20 އަހަރުން ދަށުގެ ޓީމަށް 31 މެޗު ކުޅެފައިވާ ރިމާންޑޯ ވަނީ ސީނިއާ ޓީމަށް 22 މެޗު ކުޅެ، 2013 ވަނަ އަހަރު ކޮންކާކަޕް ގޯލްޑް ކަޕް ކާމިޔާބުކޮށްފައެވެ.
ރިމާންޑޯ ވަނީ އެމްއެލްއެސް ކަޕްގެ އެންމެ މޮޅު ކުޅުންތެރިޔާގެ މަގާމު 2009 ވަނަ އަހަރު ހޯދުމުގެ އިތުރުން 2010 ވަނަ އަހަރުން ފެށިގެން 2015 ގެ ނިޔަލަށް ޖައްސަ ޖައްސައިގެން އެމްއެލްއެސްގެ އޯލްސްޓާ ޓީމުގައި ހިމެނިފައެވެ.
މީގެއިތުރުން ފުޓުބޯޅަ ކެރިޔަރުގައި ގިނަ ކާމިޔާބީތަކެއް ހޯދާފައިވާ ރިމާންޑޯ ވަނީ 2012 ވަނަ އަހަރު އަދި 2013 ވަނަ އަހަރު އެމްއެލްއެސްގެ ސޭވް އޮފް ދަ އިޔާގެ މަގާމު ހޯދާފައެވެ.
