ޑިސެމްބަރު މަހުގެ 17 ވަނަ ދުވަހު އިމާރާތަކުން ސިމެންތި ބަސްތާއެއް ވެއްޓި ޖެހުމުގެ ސަބަބުން މަރުވި ރައުޝަން ޖިއާންގެ މަރުގެ މައްސަލައިގައި ހަ މީހެއްގެ މައްޗަށް ޖިނާއީ ދައުވާ އުފުލައިފިއެވެ.

މިމައްސަލަ ފުލުހުން ތަހްގީގުކޮށް ޕްރޮސެކިއުޓަރ ޖެނެރަލް (ޕީޖީ) އޮފީހަށް ފޮނުވާފައި ވަނީ މި މަހުގެ ކުރީ ކޮޅުއެވެ.  މި މައްސަލައިގައި ޖިނާއީ ދައުވާ އުފުލާފައިވަނީ، ގާނޫނުލް އުގޫބާތުގެ 111 ވަނަ މާއްދާގެ (ހ) އާއި ހަވާލާދީ (ނ) ގެ ދަށުންނެވެ.

އެގޮތުން އިންޑިއާގެ ރައްޔިތެއް ކަމަށްވާ ރައްޖާވް އަލީގެ މައްޗަށް ދައުވާކޮށްފައި ވަނީ، މީހަކު މަރުވެ ދިއުމުގައި ފަރުވާކުޑަ އަމަލެއް ހިންގުމުގެ ކުށުގެ ދައުވާއެވެ. މިދައުވާ އޭނާގެ މައްޗަށް ކޮށްފައިވަނީ، އެވަގުތު އޭނާ އޮޕަރޭޓް ކުރަމުންދިޔަ ވިންޗް އިން ސިމެންތި ބަސްތާތަކެއް ސަވާޖީގެ އެހީގައި މ. ނަލަހިޔާމަންޒިލްގެ ނުވަވަނަ ފަންގިފިލާއަށް އަރުވަމުންދަނިކޮށް، ވިންޗު ލައިނަށް މާ ބޮޑަށް ދޫދެވި، ސަވާޖީން ސިމެންތި ބަސްތާއެއް ވެއްޓި، އެވަގުތު ފަރީދީ މަގުން ހުޅަންގު ދެކުނަށް ހިނގާފައި ދިޔަ ރައުޝަން ޖިއާންގެ ކަނދުރާ މަތީގައި ޖެހި ލިބުނު އަނިޔާތަކަށް ފަރުވާދެމުން ދަނިކޮށް ނިޔާވެފައިވާތީއެވެ.

މީހަކު މަރުވެ ދިއުމުގައި ފަރުވާ ކުޑަ އަމަލެއް ހިންގުމުގެ ކުށަކީ، ޖިނާއަތުގެ ދެވަނަ ދަރަޖައިގެ ކުށެކެވެ. އެހެންކަމުން އޭނާގެ މައްޗަށް މި ކުށް ސާބިތުވެއްޖެ ނަމަ ހަ އަހަރުގެ ޖަލު ހުކުމެއް އަންނާނެއެވެ.

ރައްޖާވް އަލީގެ އިތުރުން، ދެން ދައުވާ ކުރަނީ އިންޑިއާގެ ރައްޔިތެއް ކަމަށްވާ، މުުތުމަނި ރަމަޗަންދުރަންގެ މައްޗަށެވެ. އޭނާގެ މައްޗަށް ވެސް ކުރަނީ މީހަކު މަރުވެ ދިއުމުގައި ފަރުވާ ކުޑަ އަމަލެއް ހިންގުމުގެ ކުށުގެ ދައުވާއެވެ.

އެ ދެ މީހުންގެ އިތުރުން ދެން ދައުވާކުރަނީ، އިންޑިއާގެ ރައްޔިތެއް ކަމަށްވާ ކެޝަރިރަލް ޗައުހަން އާއި ގުލަން މަހަމަދުގެ މައްޗަށެވެ. އެ މީހުގެ މައްޗަށް ކުރަނީ، ނުރައްކަލެއްގައިވާ މީހާއަށް ކުރިމަތިވެދާނެކަން އެނގޭ ނުރައްކަލެއްގެ އިންޒާރު، އެކަށީގެންވާ ސަބަބެއް ނެތި ނުދިނުމުގެ ކުށުގެ ދައުވާއެވެ. މިއީ ޖުހަނުގެ ތިންވަނަ ދަރަޖައިގެ ކުށެކެވެ. އަދަބަކީ، 1 މަހާއި 6 ދުވަހުގެ ޖަލު ހުކުމެކެވެ.

މި މައްސަލައިގައި ދެން ދައުވާ ކުރަނީ ދެ ދިވެއްސެއްގެ މައްޗަށެވެ. އެއީ މާލޭ ދަފުތަރު 8424 މޫސާ ހަސަން އާއި، މަލޭ ދަފްތަރު 7198 އާދަމް ޝަފީގުގެ މައްޗަށެެވެ. މި ދެ މީހުންގެ މައްޗަށް އުފުލީ، މީހަކު މަރުވެ ދިިއުމުގެ އިހުމާލުގެ އަމަލެއް ކުރުމުގެ ކުށުގެ ދައުވާއެވެ. މުސާ ހަސަންއަކީ ޑަބްލިއު ކޮންސްޓަކްޝަން ކުންފުނީގެ ސީނިއަރ ސައިޓް ސުޕަވައިޒަރެކެވެ. އަދި އާދަމް ޝަފީގަކީ އެ ކުންފުނީގެ މެނޭޖިންގ ޑިރެކްޓަރެވެ.

އެ ދެ މީހުންގެ މައްޗަށް އުފުލި ދައުވާގައި ބުނެފައިވަނީ، ޒިންމާދާރު މަގާމެއްގައި ތިބެ، މަސައްކަތް ކުރަމުންދިޔަ އިރު، ސަލާމަތީ ގޮތުން އަޅަން ޖެހޭ ފިޔަވަޅުތަކަށް އިހުމާލުވުމުގެ ސަބަބުން ރައުޝަންގެ ގައި މައްޗަށް ސިމެންތި ބަސްތާ ވެއްޓި ލިބުނު އަނިޔާތަކުގައި އެކުއްޖާ ނިޔާވެފައިވާތީއެވެ. މި ކުށަކީ ޖިނާއަތުގެ 4 ވަނަ ދަރަޖައިގެ ކުށެކެވެ. މި ކުށަށް ކަނޑައަޅާފައިވާ އަދަބަކީ، 1 އަހަރާއި 7 މަހާއި، 6 ދުވަހުގެ ޖަލު ހުކުމެކެވެ.

މިދިޔަ އަހަރު 16 ވަނަ ދުވަހު ހިނގި ސިމެއްތި ބަސްތާ ވެއްޓުމުގެ ހާދިސާގައި އަނިޔާ ލިބުނު އަށް އަހަރުގެ ރައުޝަން ޖިއާން މަރުވެފައި ވަނީ ލިބުނު އަނިޔާތަކަށް އައިޖީއެމް ހޮސްޕިޓަލްގައި ފަރުވާ ދެމުން ދަނިކޮން ޑިސެމްބަރު މަހުގެ 17 ވަނަ ދުވަހުއެވެ.