ނ. އަތޮޅު ވެލިދޫ ގެސްޓް ހައުސްއެއްގައި ދެ އަންހެން ފަތުރުވެރިން ރަމްޒީ ކައިވެންޏެއް ކުރި މައްސަލަ ޓޫރިޒަމް މިނިސްޓްރީން ބަލަން ފަށައިފިއެވެ.

މި ދެ އަންހެން ފަތުރުވެރިން ރަމްޒީ ކައިވެނިކުރި ފޮޓޯ ވަނީ ސޯޝަލް މީޑިއާގައި ވަނީ އާންމުވެފައެވެ. އަދި ގިނަ ބައެއްގެ ފާޑު ކިޔުން ވެސް ވަނީ އަމާޒުވެގެން ގޮސްފައެވެ.

މި މައްސަލައާ ގުޅިގެން ޓޫރިޒަމް މިނިސްޓްރީން ނެރުނު ބަޔާނެއްގައި ބުނީ އެ މިނިސްޓްރީގެ ހުއްދަ ނެތި، ގަވާއިދާ ހިލާފަށް ރަމްޒީ ކައިވެނީގެ ހަފްލާއެއް ބޭއްވިކަމުގެ މައުލޫމާތު ލިބިފައިވާތީ އެ މައްސަލަ ބަލަމުންދާ ކަމަށެވެ.

ޓޫރިޒަމް މިނިސްޓްރީން ބުނީ ރާއްޖެއަށް ޒިޔާރަތްކުރާ ފަތުރުވެރިންގެ ރަމްޒީ ކައިވެނީގެ ހަފްލާއެއް ބޭއްވޭނީ ދިވެހިރާއްޖޭގެ ޓޫރިޒަމާ ބެހޭ ގާނޫނުގެ 44 ވަނަ މާއްދާގެ ދަށުން ހަދާފައިވާ ''ފަތުރުވެރިންގެ ރަމްޒީ ކައިވެނީގެ ހަފްލާ ބޭއްވުމާ ބެހޭ ގަވާއިދު''ގެ 3 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން އެ މިނިސްޓްރީއަށް ހުށަހަޅައި، މިނިސްޓްރީގައި ރަޖިސްޓްރީކޮށް ހުއްދަ ހޯދުމަށް ފަހު ކަމަށެވެ.

ހަމަ އެގަވާއިދުގެ 4 ވަނަ މާއްދާގެ (ބ) ގައިވާގޮތުން ''ރަމްޒީ ކައިވެނީގެ ހަފްލާގައި އެއްވެސް ދީނަކަށް ނުވަތަ ރާއްޖޭގެ ތަޤާފަތާއި ދިވެހި އާދަކާދައަށް ހުތުރުވާ ގޮތަށް ނުވަތަ ފުރައްސާރަކުރާ ގޮތަށް އެއްވެސް ކަމެއް ރަމްޒީ ކައިވެނީގެ ހަފްލާގެ އިސްމީހާ އާއި ހަފްލާގައި ބައިވެރިވާ އެއްވެސް ފަރާތަކުން އަމަލުން ވިޔަސް ނުވަތަ ބަހުން ވިޔަސް ހިންގައިގެން ނުވާނެ ކަމަށެވެ.

ޓޫރިޒަމް މިނިސްޓްރީގެ ހުއްދަ ނެތި ގަވާއިދާ ހިލާފަށް އެއްވެސް ތަނެއްގައި ރަމްޒީ ކައިވެނީގެ ހަފްލާއެއް ނުބޭއްވުމަށް ވެސް އެ މިނިސްޓްރީން ވަނީ އިލްތިމާސްކޮށްފައެވެ.