ޔޫތުޗެމްޕިއަންޝިޕްގެ ފެށުން އީގަލްސްއިން ރަނގަޅު ކޮށްފިއެވެ.

އަންގާރަ ދުވަހުގެރޭ ޔޫތު ޗެމްޕިއަންޝިޕްގައި އީގަލްސްއާއި ކްލަބް އޭދަފުށި ވާދަކުރި މެޗު 1-3 ނަތީޖާއަކުން ކާމިޔާބު ކުރީ ކްލަބްސް އީގަލްސްއިންނެވެ.

ވާދަވެރި ކުޅުމެއްފެނުނު މި މެޗުގެ ފުރަތަމަ ލަނޑު ޖަހާ ލީޑްހޯދީ އޭދަފުށިންނެވެ.

މެޗުގެ 15 ވަނަ މިނެޓުގައި އޭދަފުއްޓަށް ލިބުނު ހިލޭޖެހުމެއް ކާމިޔާބު ކޮށްދީ، އެޓީމަށް ލީޑް ހޯދައިދިނީ އަހުމަދު އައިހަމްއެވެ.

ކްލަބް އޭދަފުށިން ލަނޑު ޖެހިތާ މާގިނަ އިރުތަކެއްނުވެ، އީގަލްސްއިން އެ ޓީމުގެ ފުރަތަމަ ލަނޑުޖަހާ ނަތީޖާ ހަމަހަމަ ކުރިއެވެ. މި ލަނޑު އެ ޓީމަށް ޖަހައިދިނީ ހުސައިން އަހުސަމް މޫސާއެވެ.

ފުރަތަމަ ހާފް ނިމުނީ 1-1 ކުން ނަތީޖާ އަކުން އެއްވަރުވެގެންނެވެ.

ދެވަނަ ހާފް ފެށިގެން އީގަލްސްގެ ކުޅުން ރަނގަޅުކޮށް، ކްލަބް އޭދަފުށީގެ ގޯލަށް ހަމަލާތަކެށް ދިނެވެ. ނަތީޖާއެއްގެ ގޮތުން އީގަލްސްއިން އެ ޓީމުގެ ދެވަނަ ލަނޑު މެޗުގެ 65 ވަނަ މިނެޓުގައި ކާމިޔާބުކޮށް ލީޑު ނެގިއެވެ.

 އިސްމާއިލް ވިފާޤްގެ މި ލަނޑާއެކު އީގަލްސްއަށް އިތުރު ހިއްވަރެއްލިބި، 70 ވަނަ މިނެޓުގައި އީގަލްސްގެ ހަސަން ރާއިފް އެ ޓީމުގެ ތިންވަނަ ލަނޑު ޖަހާ ލީޑު އިތުރަށް ފުޅާ ކޮށްވެ.

މެޗުގެ ފުރިހަމަ ވަގުތު ހަމަވިއިރު ނަތީޖާއަކީ އީގަލްސް ތިނެއް، އޭދަފުށި އެކެކެވެ.

މެޗަށްފަހު ނޫސްވެރިންނާއި ވާހަކަ ދައްކަމުން އީގަލްސްގެ ކޯޗު އަހުމަދު ނިމާދު ބުނީ، މުބާރާތުގައި ޓީމު މިފަހަރު ލައްވާލީ އެންމެ ވަރުގަދަ އެއް ގްރޫޕްގައި ކަމަށާއި، ކުޅުނު ފުރަތަމަ މެޗުން ތިން ޕޮއިންޓް ހޯދުމުން ހިތްހަމަޖެހޭ ކަމަށެވެ. އަދި މޮޅަކާއި އެކު މުބާރާތް ފަށައިގަނެވުމުން ހިތްހަމަޖެހޭ ކަމަށެވެ.

މި މެޗުގެ މޮޅު ކުޅުންތެރިއަކަށް ހޮވުނީ އީގަލްގެ ހަސަން ރާއިފެވެ.