ސިޔާސީ ބޭނުމަށް ވަޒީފާ އިން ވަކިކުރާ މައްސަލަ ދަނީ ލިބެމުން: ލޭބަރ ޕާޓީ
5 ފެބުރުއަރީ 2019 | އަންގާރަ 08:33ގާނޫނާ ހިލާފު އަމަލުތަކަށް ފުރުސަތު ނުދިނުމަށް ވަނީ ގޮވާލާފައި
ލޭބަރ ޕާޓީގެ ތަރުޖަމާނު މައުރޫފް ޒާކިރް
ވަޒީފާ އަދާކުރާ ފަރާތްތަކާ މެދު ސިޔާސީ ބޭނުމަށް ތަފާތު ފިޔަވަޅުތައް އަޅައި، ވަޒީފާ އިން ވަކިކުރުން ފަދަ މައްސަލަތަކުގެ ޝަކުވާ ލިބެމުންދާ ކަމަށް މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީން ބުނެފިއެވެ.
ލޭބަރ ޕާޓީން ނެރުނު ބަޔާނެއްގައި ބުނީ އެޕާޓީގެ އެންމެ މުހިންމު ބިންގަލަކީ މަސައްކަތްތެރިންގެ ހައްގުތައް ރައްކާތެރިކޮށް ކަށަވަރުކުރުމާއި، އިޖްތިމާއީ އަދާލަތު ގާއިމްކޮށްދިނުން ކަމަށެވެ. އަދި ގާނޫނާ ހިލާފަށް މަސައްކަތްތެރިން ވަޒީފާއިން ވަކިކުރުމާއި، ވަޒީފާގެ ބިރުދެއްކުން ކުރިމަތިކުރުމަކީ ބަލައިގަނެވޭނެ ކަމެއް ނޫން ކަމަށް ބަޔާނުގައި ބުންޏެވެ.
ލޭބަރ ޕާޓީން ބުނީ ވަޒީފާ އަދާކުރާ ފަރާތްތަކާ މެދު ސިޔާސީ ބޭނުމަށް ތަފާތު ފިޔަވަޅުތައް އަޅައި، ވަޒީފާގެ ބިރު ދައްކައި ހެދުމުގެ އިތުރުން ވަޒީފާ އިން ވަކިކުރުން ފަދަ މައުލޫމާތު ތަކުރާރުކޮށް އެ ޕާޓީއަށް ލިބޭ ކަމަށާއި، ގިނަ ބަޔަކު މި މައްސަލާގައި ކަންބޮޑުވުންފާޅު ކުރަމުން ގެންދާ ކަމަށެވެ.
ސިޔާސީ ސަބަބުތަކަށް ހިންގަމުންދާ މިފަދަ ގާނޫނާ ހިލާފު އަމަލުތަކަށް ފުރުސަތު ނުދިނުމަށް އެންމެހާ މަސައްކަތްތެރިން އެކުވެރިވެ އެކަތިގަނޑަކަށްވެ މަސައްކަތްތެރިންގެ ޔޫނިއަންތައް އުފެއްދުމަށް ލޭބާ ޕާޓީން ވަނީ ގޮވާލާފައެވެ.
މީގެ އިތުރުން އެޕާޓީން ބުނީ އެއްވެސް ފަރާތަކަށް ގާނޫނާ ހިލާފަށް ނުހައްގުން ފިޔަވަޅެއް އަޅައި، ވަޒީފާއިން ވަކިކޮށްފައި ވާނަމަ، އެފަރާތެއްގެ ހައްގުތައް ހޯދުމުގައި މަގުދައްކައި، ސިޔާސީ ގޮތުންނާއި ގާނޫނީ ގޮތުން ކުރަންޖެހޭ މަސައްކަތްތައް ކުރުމަށް އެ ޕާޓީން އެހީތެރިކަން ފޯރުކޮށްދޭނެ ކަމަށެވެ.
ލޭބަރ ޕާޓީން ބުނީ މި ފަދަ މައްސަލަތަކުގެ މައްސަލައާ، ޝަކުވާތައް އެ ޕާޓީއާ ހިއްސާ ކުރުމަށް ވެސް އެދޭ ކަމަށެވެ.
