45 މީހުންގެ މައްސަލަ ތަހުގީގުކޮށް ނިމިފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވިސްއިން ބުނެފިއެވެ.

އެޗްއާރްސީއެމުން އަންގާރަ ދުވަހު ނެރުނު ބަޔާނުގައި ބުނެފައިވަނީ އެ ކޮމިޝަނުގެ ގާނޫނު ނަންބަރު (6/2006) ގެ 21 ވަނަ މާއްދާގެ (ހ) އަދި (ށ) އަށް ރިއާޔަތްކޮށް 2007 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ދައުލަތުގެ ބެލުމުގެ ދަށުގައި ހުއްޓާ ނުވަތަ ދައުލަތުގެ މުއައްސަސާއެއްގެ އިހުމާލުން ނުވަތަ އަނިޔާވެރިގޮތަކަށް މަރާފައިވާ ނުވަތަ ނިޔާވެފައިވާ މީހުންގެ މައްސަލަތަކުގެ އިތުރުން ވީގޮތެއް ނޭނގި ގެއްލިފައިވާ ތަފާތު މައްސަލަތަކެއް އެ ކޮމިޝަނުން ތަހުގީގުކޮށްފައިވާ ކަމަށެވެ.

އެގޮތުން ތަހުގީގު ކޮށްފައިވާ މައްސަލަތަކުގެ ތެރޭގައި މަރުވެފައިވާ މީހުންގެ މައްސަލަތަކާއި، ވީގޮތެއް ނޭނގި ގެއްލިފައިވާ ކަމަށް ބުނެ އެކި ފަރާތްތަކުން ހުށައަޅާފައިވާ 16 މައްސަލައާއި، ކޮމިޝަނުން އިސްނަގައިގެން ބަލަމުންދާ 37 މައްސަލައެއްގެ ތަހްގީގު ކޮމިޝަނުން ކުރިޔަށް ގެންގޮސްފައިވާކަމަށް ބަޔާނުގައި ވެއެވެ. މީގެއިތުރުން މި މައްސަލަތަކުގެ ތެރޭގައި ދައުލަތުގެ އިހުމާލުން ކުއްޖަކު ނިޔާވުމުގެ މައްސަލައަކާއި، ވީގޮތެއް ނޭނގި ގެއްލިގެން ހުށައަޅާފައިވާ 5 ފަރާތެއްގެ މައްސަލައާއި، މިނިވަންކަން ގެއްލޭގޮތަށް ދައުލަތުގެ ބެލުމުގެދަށުގައި ހުއްޓާ ނިޔާވެފައިވާ 28 ފަރާތެއްގެ މައްސަލައާއި، ބޭސްފަރުވާ ފޯރުކޮށްދިނުމާއި، ވިހެއުމުގެތެރޭގައި ހޮސްޕިޓަލާއި ސިއްޙީ ޙިދުމަތް ފޯރުކޮށްދޭ މަރުކަޒުތަކުގެ އިހުމާލުން ނިޔާވެފައިވާ ކަމަށް ބުނެ ހުށައަޅާފައިވާ 17 ފަރާތެއްގެ މައްސަލައާއި، ތޫނު އެއްޗަކުން ހަމަލާދީ މަރާލާފައިވާ 2 ފަރާތެއްގެ މައްސަލަ މޯލްޑިވްސް ޕޮލިސް ސަރވިސްއިން އެކަށީގެންވާ ގޮތެއްގައި ތަޙުޤީޤު ކޮށްފައިނުވާ ކަމަށް ބުނެ ހުށަހަޅާފައިވާ 2 މައްސަލައެއް ބެލި ކަމަށް އެޗްއާރުސީއެމުން ވަނީ ބުނެފައެވެ.

މި މައްސަލަތަކުގެ ތެރެއިން ޖުމްލަ 45 މައްސަލައިގެ ތަހުޤީގު ނިމިފައިވާއިރު، 1 މައްސަލައިގައި ޢަމަލުކުރެވިދާނެގޮތުގެ ލަފާ ކަމާބެހޭ ފަރާތްތަކަށް ދެވިފައިވެއެވެ. އެގޮތުން 8 މައްސަލައެއްގައި ތަހުޤީޤަށް ފާހަގަ ކުރެވިފައިވާ ކަންކަމާ ގުޅޭގޮތުން ކަމާގުޅުންހުރި މުއައްސަސާތަކަށް ހުށަހެޅުންތައް ހުށަހަޅައި، އެހުށައެޅުންތައް ތަންފީޒުވަމުންދާ މިންވަރު ގަވައިދުން ކޮމިޝަނުން ބަލަމުން ދާ ކަމަށް ވަނީ ބުނެފައެވެ. މީގެއިތުރުން 23 މައްސަލައެއްގައި އިހުމާލެއް ނުވާ ކަމަށް ތަޙުޤީޤަށް ފާހަގަކުރެވިފައިވުމާ ގުޅިގެން މި މައްސަލަތައް ނިންމާފައިވާ ކަމަށާއި ، 7 މައްސަލައެއްގައި އިހުމާލުވެފައިވާ ފަރާތްތަކާމެދު ފިޔަވަޅުއަޅައި، މިފަދަ މައްސަލަތައް ތަކުރާރުނުވާނެކަން ކަށަވަރު ކުރުމަށްޓަކައި ކަމާގުޅުން ހުރި މުއައްސަސާއިން ފިޔަވަޅުއެޅުމުން އެ މައްސަލަތައް ނިންމާފައިވާ ކަމަށް ވަނީ ބުނެފައެވެ.

ކުޑަކުއްޖަކު ވީގޮތެއް ނޭނގި ގެއްލިފައިވާ ކަމަށް ބުނެ ހުށައަޅާފައިވާ މައްސަލައިގައި އެ ކުއްޖާ ގެއްލިފައި ނުވާކަމަށް ތަޙުޤީޤަށް ފާހަގަކުރެވުމުން އެ މައްސަލަ ނިންމުމުގެ އިތުރުން މީހަކަށް ވީގޮތެއް ނޭނގި ގެއްލިގެން ހުށައަޅާފައިވާ މައްސަލައެއްގައި މޯލްޑިވްސް ޕޮލިސް ސަރވިސްއިން ކުރިޔަށް ގެންދިޔަ ތަހުގީގަށް އެއްވެސް ކުރިއެރުމެއް ނުލިބި މައްސަލަ ފައިލް ކޮށްފައިވާކަން ކޮމިޝަނަށް ފާހަގަކުރެވިފައިވުމާއެކު، އެ މައްސަލައިގެ ތަޙުޤީޤު ނިންމާފައިވާ ކަމަށް ވެސް ވަނީ ބުނެފައެވެ.

އަދި ވީގޮތެއް ނޭނގި ގެއްލިގެން ހުށައަޅާފައިވާ 2 މީހެއްގެ މައްސަލައިގައި ކަމާގުޅުން ހުރި މުއައްސަސާތަކުން އެކަށީގެންވާ މަސައްކަތްތަކެއް ކޮށްފައިވާކަން ކޮމިޝަނުގެ ތަޙުޤީޤަށް ފާހަގަ ކުރެވުމާގުޅިގެން އެ މައްސަލަތަކުގައި ވަކި ފަރާތެއްގެ މައްޗަށް ދައުވާކުރެވޭ މިންވަރަށް ހެއްކާއި ޤަރީނާ ލިބިފައިނެތުމުން އެ 2 މައްސަލަ ނިންމާފައިވާ ކަމަށް އެޗްއާރުސީއެމްގެ ބަޔާނުގައިވެއެވެ. މީގެ އިތުރުން، 2 މައްސަލައެއްގައި އިހުމާލުވެފައިވާ ކަމަށް ކޮމިޝަނުގެ ތަޙުޤީޤަށް ފާހަގަވުމާއި ގުޅިގެން އެފަރާތްތަކާމެދު ދައުވާ ކޮށްދިނުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވަން ނިންމާފައިވާ ކަމަށް އެޗްއާރުސީއެމުން ވަނީ ހާމަކޮށްފައެވެ.

45 މީހުންގެ މައްސަލަ ތަހުގީގުކޮށް ނިމިފައިވާއިރު 2017ވަނަ އަހަރުން 2018 ވަނަ އަހަރުގެ ނިޔަލަށް މީހަކަށް ވީގޮތެއް ނޭނގި ގެއްލިފައިވާ ކަމަށް ބުނެ ހުށަހަޅާފައިވާ މައްސަލައަކާއި އިހުމާލުގެ ސަބަބުން ނިޔާވެފައިވާ 8 މީހުންގެ މަރުގެ މައްސަލައިގެ ތަހުޤީޤު ކޮމިޝަނުން މިހާރު ވެސް ކުރަމުން ދާކަމަށް ބަޔާނުގައި ވެއެވެ.