މިދިޔަ މަހު 25 ވަނަ ދުވަހު މަހަށް ފުރި ދޯންޏެއް ގެއްލިގެން ހޯދަނީ
2 ފެބުރުއަރީ 2019 | ހޮނިހިރު 11:37މިދޯނި މަސްވެރިކަމަށް ނުކުތީ 13 މީހުންނާ އެކު
ހޯދަމުންދާ ޔުނިޓީ ދޯނި
ހއ. ފިއްލަދޫ އިން މިދިޔަ މަހު 25 ވަނަ ދުވަހު މަހަށް ފުރި ''ޔުނިޓީ'' ނަމަކަށް ކިޔާ ދޯންޏެއް ޚަބަރެއް ނުވެގެން އެމްއެންޑީއެފް ކޯސްޓްގާޑުން ހޯދަން ފަށައިފިއެވެ.
އެމްއެންޑީއެފުން ބުނީ 13 މީހުންނާ އެކު ފުރި މި ދޯނީގެ ޚަބަރެއް ނުވެގެން އުޅޭކަމުގެ މަޢުލޫމާތު އެމްއެންޑީއެފް ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައި ވަނީ ހުކުރު ދުވަހު 14:10 ހާއިރު ކަމަށެވެ.
މިދިޔަ މަހުގެ 29 ވަނަ ދުވަހު ހއ. ކެލަޔާ ދިމާލު ބޭރުގައި މި ދޯނި މަސްވެރިކަންކުރުމުގައި އުޅުނު ކަމަށް އެމްއެންޑީއެފް ކޯސްޓްގާޑަށް މައުލޫމާތު ލިބިފައިވާ ކަމަށެވެ.
މި ދޯންޏަކީ ދިގުމިނުގައި 30 މީޓަރު ހުރި ބޭރުގައި ގަދަނޫ ކުލައިގެ ދަވާދު ލާފައިވާ އަދި ހުދު ކުލައިގެ ގެގަޑެއް ލާފައިވާ ދޯންޏެކެވެ.
އެމްއެންޑީއެފް އިން އެދޯނި ހޯދުމުގެ މަސައްކަތް ކުރަމުން އަންނައިރު އެ ދޯންޏާ ބެހޭ މައުލޫމާތެއް ލިބިއްޖެނަމަ އެކަން ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުއްވަން އެމްއެންޑީއެފުން އެދެއެވެ.
