ޕްރިމިއާ ލީގު: އާސެނަލް ފަސްވަނަ އަށް ޖެހިލިއިރު، ޔުނައިޓެޑު ހަވަނައަށް ވެއްޓިއްޖެ

ޕްރިމިއާ ލީގުގައި އާސެނަލް ފަސްވަނައަށް ޖެހިލިއިރު، ޔުނައިޓެޑު ހަވަނައަށް ވެއްޓިއްޖެއެވެ.

އާސެނަލް ފަސްވަނައަށް ޖެހިލީ އަންގާރަ ދުވަހުގެ ރޭ ކާޑިފް ސިޓީއާ ދެކޮޅަށް ކުޅުނު މެޗު 1-2 ގެ ނަތީޖާއަކުން ކާމިޔާބު ކޮށްގެންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލް ކޮށްގެން ރަނގަޅަށް ކުޅެމުން ދިޔައީ އެޓީމުންނެވެ. އެގޮތުން އެޓީމުން ވަނީ ކާޑިފްގެ ގޯލަށް ނުރައްކާކޮށް ހަމަލާ އުފެއްދުމަށް މަސައްކަތް ކޮށްފައެވެ.

މި ހާފްގައި ކާޑިފްގެ ފަރާތުން ހަމަލާތަކެއް ފެނިގެން ދިޔަ ނަމަވެސް، އެ ހަމަލާތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރު ވެގެންނެވެ.

ދެވަނަ ހާފް ފެށިގެން އާސެނަލްއިން އެޓީމުގެ ކުޅުން ވަރުގަދަކުރިއިރު، 66 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބު ކޮށްދިނީ އެމެރިކް އޮބަމަޔަންގްއެވެ.

މި ލަނޑަށްފަހު ވެސް އާސެނަލްގެ ފަރާތުން ހަމަލާތަކެއް ވަނީ ފެނިގެން ގޮސްފައެވެ. އެގޮތުން 83 ވަނަ މިނެޓުގައި އޮބަމަޔަންގްގެ އެހީތެރިކަމާއެކު އެލެގްޒެންޑްރާ ލަކަޒޭޓް ކާމިޔާބުކުރި ލަނޑުން އެޓީމުން ވަނީ ލީޑު ފުޅާކޮށްފައެވެ.

މެޗުގައި ކާޑިފްގެ ފަރާތުން ފެނިގެންދިޔަ ހަމައެކަނި ލަނޑު އިތުރުވަގުތުގައި ކާމިޔާބުކުރީ ޒޮހޯރްގެ އެހީތެރިކަމާއެކު، މެންޑޭޒް ލެއިންގް އެވެ.

މި ނަތީޖާއާއެކު އާސެނަލް އޮތީ ކުޅުނު 24 މެޗުން ހޯދި 47 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ. ހަތަރުވަނައިގައި އޮތް ޗެލްސީއަށް 23 މެޗުން 47 ޕޮއިންޓް ލިބިފައިވާއިރު، އާސެނަލްއަށް ފަސްވަނަ ލިބުނީ ލަނޑުގެ ތަފާތުންނެވެ. މެޗުން ބަލިވި ކާޑިފް އޮތީ ކުޅުނު 24 މެޗުން ލިބުނު 19 ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ.

ޔުނައިޓެޑު ހަވަނައަށް ވެއްޓުނީ، އަންގާރަ ދުވަހުގެ ރޭ ބާންލީއާ ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވެގެންނެވެ.

ޔުނައިޓެޑު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ ޔުނައިޓެޑުންނެވެ. ނަމަވެސް ފުރަތަމަ ހާފްގައި ދެޓީމަށް ވެސް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފްގައި ބާންލީގެ ފަރާތުން ޑިފެންސިވް ފުޓުބޯޅައެއް ފެނިގެން ގޮސްފައިވާއިރު، އެޓީމުން ވަނީ ޔުނައިޓެޑުގެ ގިނަ ހަމަލާތަކެއް ދިފާއު ކޮށްފައެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ބާންލީން ވަނީ މެޗުގެ ލީޑު ނަގާފައެވެ. މި ލަނޑު ކޯކްގެ އެހީތެރިކަމާއެކު ކާމިޔާބު ކުރީ އޭޝްލީ ބާނެސްއެވެ. މި ލަނޑާއެކު ބާންލީން ވަނީ އެޓީމުގެ ޑިފެންސް އިތުރަށް ވަރުގަދަ ކޮށްފައެވެ.

ޔުނައިޓެޑު ސިއްސުވާލުމަށް ފަހު، 81 ވަނަ މިނެޓުގައި ބާންލީން ވަނީ މެޗުގެ ލީޑު ފުޅާ ކޮށްފައެވެ. މި ލަނޑު ވެސްޓްވުޑްގެ އެހީތެރިކަމާއެކު ކާމިޔާބު ކުރީ ކްރިސް ވުޑްއެވެ.

ނަމަވެސް ޔުނައިޓެޑުން ވަނީ އެޓީމުގެ ކުޅުން ވަރުގަދަކޮށް، މެޗު ނިމެން ދެ މިނެޓަށްވެފައި ވަނިކޮށް ނަތީޖާގެ ފަރަގު ކުޑަކޮށްފައެވެ. މި ލަނޑު ކާމިޔާބުކުރީ އެޓީމަށް ލިބުނު ޕެނަލްޓީއަކުން ޕައުލް ޕޮގްބާއެވެ.

މެޗުގެ އިތުރުވަގުތުގައި ޔުނައިޓެޑުން ވަނީ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ވިކްޓާ ލިންޑެލޯފްއެވެ.

މި ނަތީޖާއާއެކު ޔުނައިޓެޑު ވަނީ ކުޅުނު 24 މެޗުން 45 ޕޮއިންޓް ހަމަކޮށްފައެވެ. މެޗުން އެއްވަރުވި ބާންލީ އޮތީ ކުޅުނު 24 މެޗުން ލިބުނު 23 ޕޮއިންޓާއެކު ޕޮއިންޓް ތާވަލުގެ 15 ވަނައިގައެވެ.

މެޗުން ޔުނައިޓެޑު މޮޅުވިނަމަ 47 ޕޮއިންޓް ހަމަކޮށް، ފަސްވަނައިގައި ހަމަޖެހިލެވޭނެއެވެ. އަދި ހަތަރުވަނައިގައި އޮތް ޗެލްސީއާ އެއް އަދަދަކަށް ޕޮއިންޓް ހަމަކުރެވޭނެއެވެ.