އެފްއޭ ކަޕްގައި އާސެނަލް ބަލިކޮށް، ރެކޯޑަކާ އެކު މެންޗެސްޓާ ޔުނައިޓެޑު ފަސްވަނަ ބުރުން ޖާގަ ހޯދައިފިއެވެ.

ހުކުރު ދުވަހުގެ ރޭ ކުޅުނު މެޗުން ޔުނައިޓެޑު މޮޅުވީ އާސެނަލްއާ ވާދަކޮށް 1-3 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުން ދިޔައީ ޔުނައިޓެޑުންނެވެ. އެގޮތުން އެޓީމުން ވަނީ އާސެނަލްގެ ހާފަށް ބާރުބޮޑުކޮށް ލަނޑު ޖެހުމަށް ވެސް ފުރުސަތު ތަނަވަސްކޮށްފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ވެސް ޔުނައިޓެޑުންނެވެ. މި ލަނޑު 31 ވަނަ މިނެޓުގައި ރޮމެލޫ ލުކާކޫގެ އެހީތެރިކަމާ އެކު ކާމިޔާބުކުރީ އެލެކްސަސް ސަންޗޭޒްއެވެ. އޭގެ ދެ މިނެޓު ފަހުން ޔުނައިޓެޑަށް ލީޑު ފުޅާކޮށްދިނީ ޖެސޭ ލިންގާޑްއެވެ.

މި ލަނޑުތަކާ އެކު އާސެނަލް އިން އެޓީމުގެ ކުޅުން ރަނގަޅުކޮށް، ހަމަލާތައް އުފައްދަން މަސައްކަތް ކުރިއެވެ. އާސެނަލްއިން ނަތީޖާގެ ފަރަގު ކުޑަކުރީ 45 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އެލެގްޒެންޑްރާ ލަކަޒެޓްއެވެ.

ދެވަނަ ހާފްގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެން ގޮސްފައިވާއިރު، ލަނޑު ޖެހުމަށް ވެސް ގިނަ ފުރުސަތުތައް ދެޓީމަށް ވަނީ ލިބި ބޭކާރުވެފައެވެ.

މި ހާފްގައި ޔުނައިޓެޑުގެ ފަރާތުން ވަނީ ތިންވަނަ ލަނޑު ފެނިގެން ގޮސްފައެވެ. މި ލަނޑު 84 ވަނަ މިނެޓުގައި ރަނގަޅު ފޯމެއްގައި ހުރި އެންތޮނީ މާޝިއާލްއެވެ.

ޑިސެމްބަރު މަހު ހޯސޭ މޮރީނިއޯ ވަކިކޮށް މި ސީޒަނުގެ ނިޔަލަށް ޔުނައިޓެޑުގެ ކޯޗުކަން ސޯލްޝެއާއާ ހަވާލުކުރި ފަހުން އެ ޓީމު ކުޅުނު އަށް މެޗުން ވެސް ވަނީ މޮޅުވެފަ އެވެ. އަދި މިއީ 2017 ވަނަ އަހަރުގެ ޖެނުއަރީ އަށް ފަހު ޖެހިޖެހިގެން އަށް މެޗުން މޮޅުވި ފުރަތަމަ ފަހަރެވެ.