މަންދު ކޮލެޖްގެ ބިއްލޫރިގަނޑު ތަޅާލައިފި
މި ހާދިސާއާގުޅޭ ގޮތުން ފުލުހުންގެ ބަހެއް އަދި ނުލިބޭ
ތަޅާލާފައިވާ މަންދު ކޮލެޖްގެ ބިއްލޫރިގަނޑު
މަންދު ކޮލެޖްގެ ބިއްލޫރިގަނޑު ތަޅާލައިފިއެވެ.
އެ ކޮލެޖްގެ ބިއްލޫރިގަނޑު ތަޅާލާފައިވަނީ ހޯމަ ދުވަހުގެ ރޭ ދަންވަރުގެ ވަގުތެއްގައެވެ. އެ ކޮލެޖްގެ ވެރިޔާ އިބުރާހިމް އިސްމާއިލް އެކަން ހާމަކުރައްވާ ޓްވީޓް ކުރައްވާފައިވަނީ މެންދަމު 1:39 ގައެވެ.
މި ހާދިސާއާއި ގުޅޭގޮތުން ފުލުހުންގެ ބަހެއް އަދި ނުލިބެއެވެ.
މަންދު ކޮލެޖް ހިންގަވާ އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބްރާ) އިސްލާމް ދީނަށް ފާޑު ކިޔައި، ކީރިތި ރަސޫލާއަށް ފުރައްސާރަކުރިކަމަށް ބުނެ ޒުވާނުން ތަކެއް ހޯމަ ދުވަހުގެ ރޭ ވަނީ މަންދު ކޮލެޖް ކައިރިއަށް އެއްވެ އަޑު އުުފުލާފައެވެ. ނަމަވެސް ގިނަ އިރުތަކެއް ނުވަނީސް ފުލުހުން ވަނީ އެ ސަރަހައްދަށް ގޮސް އެ މީހުން ދުރުކޮށްފަ އެވެ.
އިބުރާއާ ދެކޮޅަށް މިރޭ މުޒާހަރާ ކޮށްފައިވާއިރު، އާދިއްތަ ދުވަހުގެ ރޭ އިބްރާވަނީ ފުލުސް އޮފީހަށްވެސް ހާޒިރުކޮށްފައެވެ. ފުލުހުން ބުނީ އިބްރާ ފުލުސް އޮފީހަށް ހާޒިރުކުރީ މިހާރު ސޯޝަލް މީޑިއާގައި ނަފްރަތު އުފެދޭ ގޮތަށް ދައްކާ ވާހަކަތަކާއި ގުޅިގެން ފުލުހުން ފިޔަވަޅުއަޅާ އުސޫލުގެ ދަށުން ކަމުގައެވެ.
