ޕްރިމިއާ ލީގުގައި މެންޗެސްޓާ ސިޓީ އާއި ޓޮޓެންހަމް ހޮޓްސްޕާ ކުޅުނު މެޗުތަކުން މޮޅުވެއްޖެއެވެ.

އާދީއްތަ ދުވަހުގެ ރޭ ކުޅުނު މެޗުން ސިޓީ މޮޅުވީ ހަޑަސްފިލްޑް ޓައުންއާ ވާދަކޮށް 0-3 ގެ ނަތީޖާއަކުންނެވެ.

ހަޑަސްފިލްޑް ދަނޑުގައި ކުޅުނު މި މެޗު ފެށިގެން 18 ވަނަ މިނެޓުގައި ސިޓީން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޑެނީލޯއެވެ.

މި ލަނޑަށްފަހުވެސް ސިޓީގެ ފަރާތުން ގިނަ ހަމަލާތަކެއް ފެނިގެން ގޮސްފައިވާއިރު، ހަޑަސްފިލްޑުން ވަނީ ސިޓީގެ ގިނަ ހަމަލާތަކެއް ދިފާއުކޮށްފައެވެ.

ފުރަތަމަ ހާފް ނިމުނީ ޑެނިލޯގެ ލަނޑުން ހަޑަސްފިލްޑްގެ މައްޗަށް ސިޓީ ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ސިޓީން ވަނީ ލީޑު ފުޅާކޮށްފައެވެ. މި ލަނޑު ކާމިޔާބުކުރީ ރަހީމް ސްޓާލިންއެވެ. އޭގެ ދެ މިނެޓު ފަހުން ލީރޯއި ސާނޭ ވަނީ އެޓީމުގެ ތިންވަނަ ލަނޑު ކާމިޔާބުކޮށްފައެވެ.

މުޅި މެޗުގައިވެސް ހަޑަސްފިލްޑްގެ ފަރާތުން މާ އެދެވޭ ކުޅުމެއް ފެނިގެން ގޮސްފައިނުވާއިރު، ލަނޑު ޖެހުމަށްވެސް މާ އެދެވޭ ފުރުސަތުތަކެއް އެޓީމަށް ލިބިފައެއް ނުވެއެވެ.

މި ނަތީޖާއާއެކު ސިޓީ އޮތީ ކުޅުނު 23 މެޗުން ލިބުނު 56 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ހަޑަސްފިލްޑް އޮތީ ކުޅުނު 23 މެޗުން ލިބުނު 11 ޕޮއިންޓާއެކު ޕޮއިންޓް ތާވަލުގެ ފުލުގައެވެ.

އާދީއްތަ ދުވަހުގެ ރޭ ކުޅުނު މެޗުން ޓޮޓެންހަމް މޮޅުވީ ފުލަމްއާ ވާދަކޮށް 1-2 ގެ ނަތީޖާއަކުންނެވެ.

ފުލަމް ދަނޑުގައި ކުޅުނު މި މެޗު ފެށިގެން 17 ވަނަ މިނެޓުގައި ފުލަމްއިން ވަނީ މެޗުގެ ލީޑު ނަގާފައެވެ. މި ލަނޑަކީ ސިޓީގެ ލޮރެންޓޭ އަތުން ބައިކޮޅަށް ވަތް ލަނޑެކެވެ.

މި ލަނޑާއެކު ސިޓީން އެޓީމުގެ ކުޅުން ރަނގަޅުކޮށް، ގިނަ ހަމަލާތަކެއް ފުލުފުލުގައި ވަނީ ފުލަމްގެ ގޯލަށް ފޮނުވާލާފައެވެ. އަދި ލަނޑު ޖެހުމަށްވެސް ހުސް ފުރުސަތުތައް ވަނީ ލިބި ބޭކާރުވެފައެވެ.

ފުރަތަމަ ހާފް ނިމުނީ ލޮރެންޓޭ ބައިކޮޅަށް ޖެހި ލަނޑާ އެކު ސިޓީގެ މައްޗަށް ފުލަމް ކުރީގައި އޮވެގެންނެވެ.

ދެވަނަ ހާފް ފެށިގެން ޓޮޓެންހަމް އިން ވަނީ ނަތީޖާ ހަމަހަމަކޮށްފައެވެ. މި ލަނޑު 51 ވަނަ މިނެޓުގައި އެޓީމަށް ކާމިޔާބުކޮށްދިނީ ޑެލެއަލީއެވެ. މި ލަނޑަށްފަހުވެސް ޓޮޓެންހަމުން ދިޔައީ ފުލަމްގެ ގޯލަށް ނުރައްކާ ކުރަމުންނެވެ.

އެގޮތުން މެޗުގެ އިތުރުވަގުތުގައި ވިންކްސް ކާމިޔާބުކުރި ލަނޑުން ޓޮޓެންހަމުން ވަނީ މެޗުގައި ތިން ޕޮއިންޓް ކަށަވަރުކޮށްފައެވެ.

މި ނަތީޖާއާއެކު ޓޮޓެންހަމް އޮތީ ކުޅުނު 23 މެޗުން ލިބުނު 51 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި ފުލަމް އޮތީ ކުޅުނު 23 މެޗުން ލިބުނު 14 ޕޮއިންޓާއެކު ޕޮއިންޓް ތާވަލުގެ 19 ވަނައިގައެވެ.