ޕްރިމިއާ ލީގުގައި ލިވަޕޫލް އާއި މެންޗެސްޓާ ޔުނައިޓެޑު ކުޅުނު މެޗުތަކުން މޮޅުވެއްޖެއެވެ.

ހޮނިހިރު ދުވަހުގެ ރޭ ކުޅުނު މެޗުން ލިވަޕޫލް މޮޅުވީ ކްރިސްޓަލް ޕެލަސް ވާދަކޮށް 3-4 ގެ ނަތީޖާއަކުންނެވެ.

ލިވަޕޫލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ލަނޑު ޖެހުމަށްވެސް ފުރުސަތުތަކެއް ތަނަވަސްކުރިއެވެ.

ނަމަވެސް ލިވަޕޫލުން ރަނގަޅަށް ކުޅެމުންދަނިކޮށް 34 ވަނަ މިނެޓުގައި ޕެލަސްއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޒާހާގެ އެހީތެރިކަމާއެކު ޓައުންސެންޑްއެވެ.

މި ލަނޑާއެކު ލިވަޕޫލުން އެޓީމުގެ އެޓޭކްތައް ވަރުގަދަކޮށްފައިވާއިރު، ލަނޑު ޖެހުމަށް ފުލުފުލުގައި ފުރުސަތުތައް ތަނަވަސްކުރިއެވެ. ނަމަވެސް ފުރަތަމަ ހާފް ނިމުނީ 0-1 ގެ ނަތީޖާއިން ލިވަޕޫލްގެ މައްޗަށް ޕެލަސް ކުރީގައި އޮވެގެންނެވެ.

ދެވަނަ ހާފް ފެށިގެން ފުރަތަމަ މިނެޓުގައި ލިވަޕޫލުން ވަނީ ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކުރީ މުހައްމަދު ސަލާހުއެވެ. އޭގެ ހަތް މިނެޓު ފަހުން ނަބީ ކެއިޓާގެ އެހީތެރިކަމާއެކު ރޮބާޓޯ ފިރްމީނޯ ވަނީ ލަނޑެއް ކާމިޔާބުކޮށް އެޓީމަށް ފުރަތަމަ ފަހަރަށް ލީޑު ނަގައިދީފައެވެ.

ނަމަވެސް 65 ވަނަ މިނެޓުގައި ޕެލަސްއިން ވަނީ ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކޮށްދިނީ ޓޮމްކިންސްއެވެ. ލިވަޕޫލުން ދެވަނަ ފަހަރަށް މެޗުގެ ލީޑު ނެގީ 75 ވަނަ މިނެޓުގައި ސަލާހު ކާމިޔާބުކުރި ލަނޑުންނެވެ.

މެޗުގެ 89 ވަނަ މިނެޓުގައި ލިވަޕޫލްގެ ޖޭމްސް މިލްނާއަށް ދެވަނަ ރީނދޫ ކާޑާއެކު ރަތް ކާޑު ދައްކާ ފޮނުވާލާފައިވާއިރު، އިތުރުވަގުތުގައި ލިވަޕޫލުން ވަނީ ލީޑު ފުޅާކޮށްފައެވެ. މި ލަނޑު ކާމިޔާބުކުރީ ސާޑިއޯ މާނޭއެވެ.

މެޗު ނިމުމުގެ ކުރިން ޕެލަސްއިން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު ކާމިޔާބުކުރީ މެޔާއެވެ.

މި ނަތީޖާއާއެކު ލިވަޕޫލް ވަނީ ކުޅުނު 23 މެޗުން 60 ޕޮއިންޓް ހަމަކޮށް، ޕޮއިންޓް ތާވަލުގެ އެއްވަނައިގައި ހަމަޖެހިލާފައެވެ. މެޗުން ބަލިވި ޕެލަސް އޮތީ ކުޅުނު 23 މެޗުން ލިބުނު 22 ޕޮއިންޓާއެކު ޕޮއިންޓް ތާވަލުގެ 14 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ޔުނައިޓެޑު މޮޅުވީ ބްރައިޓަންއާ ވާދަކޮށް 1-2 ގެ ނަތީޖާއަކުންނެވެ.

ޔުނައިޓެޑު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ލަނޑު ޖެހުމަށްވެސް ގިނަ ފުރުސަތުތައް އެޓީމުން ވަނީ ތަނަވަސްކޮށްފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ޔުނައިޓެޑުންނެވެ. މި ލަނޑު 27 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކުރީ ޕައުލް ޕޮގްބާއެވެ. މި ލަނޑަށްފަހުވެސް ލީޑު ފުޅާކުރަން ޔުނައިޓެޑަށް ވަނީ ފުރުސަތުތަކެއް ލިބި ބޭކާރުވެފައެވެ.

ޔުނައިޓެޑުން މެޗުގެ ލީޑު ފުޅާކުރީ 42 ވަނަ މިނެޓުގައެވެ. މި ލަނޑު ޑިއޮގޯ ޑަލޮޓްގެ އެހީތެރިކަމާއެކު ކާމިޔާބުކުރީ މާކަސް ރަޝްފޯޑްއެވެ.

ފުރަތަމަ ހާފް ނިމުނީ 0-2 ގެ ނަތީޖާއިން ބްރައިޓަންގެ މައްޗަށް ޔުނައިޓެޑު ކުރީގައި އޮވެގެންނެވެ.

ދެވަނަ ހާފް ފެށިގެންވެސް ޔުނައިޓެޑުގެ ފަރާތުން ގިނަ ހަމަލާތައް ފެނިގެން ގޮސްފައިވާއިރު، ލަނޑު ޖަހަންވެސް ފުރުސަތުތަކެއް ލިބި ބޭކާރުވިއެވެ. އެގޮތުން އެންތޮނީ މާޝިއާލްއަށް ލިބުނު ފުރުސަތުތައް ހިމެނެއެވެ.

މެޗުގައި ބްރައިޓަންގެ ފަރާތުން ފެނިގެންދިޔަ ހަމައެކަނި ލަނޑު 72 ވަނަ މިނެޓުގައި ކާމިޔާބުކުރީ ޕްރޮޕާގެ އެހީތެރިކަމާއެކު ގްރޮބްއެވެ.

މި ނަތީޖާއާއެކު ޔުނައިޓެޑު އޮތީ ކުޅުނު 23 މެޗުން ލިބުނު 44 ޕޮއިންޓާއެކު ޕޮއިންޓް ތާވަލުގެ ހަވަނައިގައެވެ. މެޗުން ބަލިވި ބްރައިޓަން އޮތީ ކުޅުނު 23 މެޗުން ލިބުނު 26 ޕޮއިންޓާއެކު ޕޮއިންޓް ތާވަލުގެ 13 ވަނައިގައެވެ.