ދެ ގްރޭޑް އެއްކޮށްގެން ކިޔަވައި ދިނުން ހުއްޓާލުމުން، އދ. ހަންޏާމީދު ސްކޫލުގެ ގްރޭޑް ހަތަރެއް އަދި ފަހެއް ވަކިކޮށް ކިޔަވައިދޭން ބުދަ ދުވަހު ފަށައި، ކުދިން ސްކޫލަށް ދާން ފަށައިފިއެވެ.

އެ ނިންމުން ބަދަލުކޮށްފައި ވަނީ އެޑިއުކޭޝަން މިނިސްޓްރީ އާއި ސްކޫލުގެ ބެލެނިވެރިން ދެމެދު މަޝްވަރާތަކެއް ކުރުމަށްފަހުއެވެ.

ދެ ގްރޭޑް އެއްކޮށްގެން ކިޔަވައިދެމުން ދާތީވެ ބެލެނިވެރިން އެކަމާ ނުރުހުންފާޅުކޮށް ކުދިން ސްކޫލަށް ނުފޮނުވާތާ ތިން ދުވަސް ވެއްޖެއެވެ. ބެލެނިވެރިން ޝަކުވާކުރަމުން ދިޔައީ، ދެ ގްރޭޑް އެއްކޮށް ކިޔަވައި ދިނުމުގެ ސަބަބުން ދަރިވަރުންގެ ނަތީޖާ ދަށްކަމަށް ބުނެއެވެ.

އެޑިއުކޭޝަން މިނިސްޓްރީން އެ ރަށަށް ދިޔަ ވަފުދުގެ ތެރޭގައި ހިމެނޭ އިސް ބޭފުޅަކު "ރާއްޖެއެމްވީ" ވިދާޅުވީ، ބެލެނިވެރިން އެދުމުގެ މަތިން އެ މައްސަލައަށް ހައްލެއް ލިބިފައިވާ ކަމަށެވެ. އަދި ބުދަ ދުވަހުން ފެށިގެން ސްކޫލަށް ކުދިން ފޮނުވަން ފަށާފައިވާ ކަމަށެވެ.

ހަންޏާމީދު ކައުންސިލްގެ ރައީސް މޫސާ ނާޒިމް ވިދާޅުވީ، ދެ ގްރޭޑް ވަކިކުރިކަން ނިންމާފައި ވަނީ އެޑިއުކޭޝަން މިނިސްޓަރީން ސްކޫލަށް ފޮނުވި ލިޔުމެއްގައި ކަމަށެވެ.

''ބެލެނިވެރިން ތިބީ ވަރަށް ބޮޑަށް އުފާވެފައި މި ނިންމުމަށް'' ނާޒިމް ވިދާޅުވިއެވެ.

ހަންޏާމީދޫ ސްކޫލްގައި 110 ދަރިވަރުން ތައުލީމް ހާސިލްކުރަމުންދާއިރު، ގްރޭޑް ހަތަރެއް އަދި ފަހެއް އެއްކޮށްލައިގެން ކިޔަވާ 18 ދަރިވަރުން އުޅެއެވެ.

ގްރޭޑް ހަތަރެއް އަދި ފަހެއް އެއްކޮށްގެން ހަންޏާ މީދު ސްކޫލުގައި ކިޔަވައިދެމުން އަންނަތާ ދެ އަހަރު ވެއްޖެއެވެ.