އިމްރާން އަށް ލިބިފައިވާ ފްލެޓަކީ އަނބިކަބަލުންގެ ބައްޕަ ގަނެދިން ފްލެޓެއް: ޑރ. އިޔާޒު
11 ޖެނުއަރީ 2019 | ހުކުރު 18:08ފްލެޓް ގަނެދިނީ އަނބިކަބަލުންގެ ބައްޕަ، ސާބިތު ކުރެވޭނެ
ދީނީ އިލްމުވެރިޔާ ޑރ. އިޔާޒް
ހޯމް މިނިސްޓަރު ޝޭހް އިމްރާން އަބްދުﷲ އަށް ލިބިފައިވާ ފްލެޓަކީ އިމްރާންގެ އަނބިކަބަލުންގެ ބައްޕަ ގަނެދިން ފްލެޓެއް ކަމަށް މަޝްހޫރު ދީނި އިލްމުވެރިޔާ ޑރ. މުހައްމަދު އިޔާޒު ވިދާޅުވެއްޖެއެވެ.
ސަރުކާރުގެ ވަޒީރުންގެ މާލީ ބަޔާންތައް ބުރާސްފަތި ދުވަހުގެރޭ ރައީސް އޮފީހުން އާންމުކޮށްފައިވާއިރު، ހޯމް މިނިސްޓަރ ޝެިއހް އިމްރާންގެ މިލްކިއްޔާތުގައި 2.5 މިލިއަނަށް ބައްލަވައިގެންނެވި ފްލެޓެއްވެއެވެ.
އަމީން އެވެނިއު އިން ބައްލަވައިގެންނެވި އެ ފްލެޓާއި ގުޅޭގޮތުން ކުރީގެ ނައިބް ރައީސް އަހުމަދު އަދީބްގެ އެމްޓީޑީގެ އެކްޓިވިސްޓުން ސޯޝަލް މީޑިއާގައި ތަފާތު ވާހަކަތައް ފަތުރަމުންގެންދާތީވެ، ޓުވީޓަކަށް ރައްދުދެއްވަމުން ޑރ. އިޔާޒް ވިދާޅުވީ އެ ފްލެޓަކީ އިމްރާންގެ އަނބިކަނބަލުން މަރިޔަމް ރީމްގެ ބައްޕަ އޭނާގެ ކޮންމެ ދަރިޔަކަށް ގަނެދިން ފްލެޓްތަކުގެ ތެރެއިން ފްލެޓެއް ކަމަށެވެ.
ޑރ. އިޔާޒް ވިދާޅުވީ، އެކަން އިތުރަށް ސާބިތު ކުރަން ބޭނުންވާނަމަ އެންޓި ކޮރަޕްޝަން ކޮމިޝަން (އެސީސީ) އިން އެކަން ބެލިޔަސް ހަގީގަތް ހާމަވާނެ ކަމަށެވެ.
އަދީބްގެ އެމްޓީޑީގެ އެކްޓިވިސްޓުން، ޝެއިހް އިމްރާނަށް ފާޑުކިޔުންތައް އަމާޒުކުރަމުންގެންދަނީ، އަދީބް ޖަލަށް ގެންދިޔަ މައްސަލާގައެވެ.
