އެމެރިކާއިން ރަޝިޔާއަށް ދަތި ކުރުމުގެ އިތުރު ފިޔަވަޅުތަކެއް އަޅައިފި

ބައިނަލްއަގްވާމީ މުޖުތަމައު ގަބޫލުކުރާ ކަންކަމާއި ހިލާފަށް އަމަލުކުރާ ކަމަށް ތުހުމަތުކޮށް، އެމެރިކާއިން ރަޝިއާއާ ދެކޮޅަށް ދަތިކުރުމުގެ އިތުރު ފިޔަވަޅުތަކެއް އަޅަން ނިންމައިފިއެވެ.

ދަތިކުރުމުގެ ފިޔަވަޅުތައް އަޅާފައި މިވަނީ "ޕްރޮޖެކްޓް ލަކްތާ" އާއި ގުޅުން ހުރި ފަރާތްތަކަށް ކަމަށް އެމެރިކާއިން ވަނީ ހާމަކޮށްފައެވެ. ޕްރޮޖެކްޓް ލަކްތާއަކީ ރަޝިއާގެ އިންޓަނެޓް ރިސާޗް އޭޖެންސީއިން އެމެރިކާގެ އިންތިހާބަށް ނުފޫޒު ފޯރުވަން ހިންގި އަމަލުތަކަށް ދެވިފައިވާ ނަމެކެވެ.

ރަޝިއާގެ ޖާސޫސީ އިދާރާގެ ބައެއް އޮފިސަރުން ވެސް ވަނީ މި ފަހަރުގެ ލިސްޓުގައި ހިމަނާފައެވެ. އެ މީހުންގެ މައްޗަށް ކުރަނީ ވަރލްޑް ޑޯޕިން އެޖެންސީއާއި އެހެން ބައެއް ޖަމިއްޔާތަކަށް ސައިބަރ ހެކިންގެ ހަމަލާތައް ދިން ކަމަށެވެ.

މީގެ އިތުރުން، އިނގިރޭސިވިލާތުގެ ހިމާޔަތް ހޯދައިގެން ހުރި ކުރީގެ ރަޝިއާގެ ޖާސޫސް، ސަރގޭ ސްކްރިޕާލްއާއި އޭނާގެ އަންހެން ދަރިފުޅަށް ވިހަ ދީގެން މަރާލަން އުޅުން ކަމުގެ ތުހުމަތު ކުރެވޭ ރަޝިޔާގެ ދެ އޭޖެންޓަކު ވެސް ވަނީ މި ލިސްޓުގައި ހިމަނާފައެވެ.

ދަތިކުރުމުގެ މި ފިޔަވަޅުތައް އިއުލާން ކޮށްފައި ވަނީ، ކުރިން ދަތިކުރުމުގެ ފިޔަވަޅު އަޅާފައި ހުރި ލިސްޓުން ރަޝިއާ ބައެއް ކުންފުނިތައް އުނިކުރިކަން އިއުލާން ކުރި ދުވަހުއެވެ.

ޒަމާނުއްސުރެން ވާދަވެރި ރަޝިއާއާއި އެމެރިކާއާ ދެމެދު އޮތް ގުޅުން ވަނީ، އެމެރިކާގެ އިންތިހާބަށް ނުފޫޒު ފޯރުވުމާއި، ސީރިޔާ އާއި އިރާނުގެ މައްސަލައިގައި އިތުރަށް ގޯސްވެފައެވެ.