ކުޅިވަރަކީ އެންމެން އެއްބައިވަންތަ ކުރުވާ އެއްޗެއްކަމަށާއި، ޚިޔާލު ތަފާތުވުންތައް ދޫކޮށް އެންމެން އެއްތާކުން ފެނުމަކީ ވަރަށް އުފާވެރި މަންޒަރެއް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދުޅަހެޔޮ ހަށިހެޔޮ ޢީދާއި ގުޅިގެން ހޯމަ ދުވަހުގެ ރޭ ބޭއްވި ޚާއްޞަ ފުޓްބޯޅަ މެޗުތަކުގެ ތެރެއިން ދެއްކެވި ވާހަކަފުޅުގައެވެ.
މި ކުޅިވަރު ޢީދާއި ގުޅިގެން ހޯމަ ދުވަހުގެ ރޭ ބޭއްވި ޚާއްޞަ ފުޓްބޯޅަ މެޗެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ރައީސުލްޖުމްހޫރިއްޔާގެ ނާއިބު ފައިޞަލް ނަޞީމް ވަނީ ބައިވެރިވެވަޑައިގެންފައެވެ.
ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވެސް ވަނީ މި މެޗްތައް ބައްލަވާލެއްވުމަށް ރަސްމީ ދަނޑަށް ވަޑައިގެންފައެވެ.
މި ފުޓްބޯޅަ މެޗުތަކުގައި ބައިވެރިވެ ވަޑައިގެންނެވި ބޭފުޅުންގެ ތެރޭގައި ރައްޔިތުންގެ މަޖިލީހުގެ ރައީސާއި، ކުރީގެ ރައީސުލްޖުމްހޫރިއްޔާ މުޙައްމަދު ނަޝީދާއި، ވަޒީރުންގެ މަޖިލީހުގެ މެންބަރުންނާއި، ރައްޔިތުންގެ މަޖިލީހުގެ ބައެއް މެންބަރުން ހިމެނިވަޑައިގަންނަވައެވެ.
މި ފުޓްބޯޅަ މެޗުތައް ބައްލަވާލެއްވުމަށް ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލް ޤައްޔޫމާއި ސަރުކާރުގެ އިސް ބައެއް ބޭފުޅުން ވެސް ރަސްމީ ދަނޑަށް ވަޑައިގެންނެވިއެވެ.
