އަދާލަތު ޕާޓީގެ ރައީސް އިމްރާން އަބްދުﷲގެ މައްޗަށް 12 އަހަރުގެ ޖަލު ހުކުމް އޮއްވައި ހޯމް މިނިސްޓަރުކަމުގެ މަގާމަށް އައްޔަން ކުރެއްވުމުން، އެ މަގާމަށް އޭނާ ޝަރުތު ހަމަވާ ކަމާމެދު ސުވާލު އުފައްދައިފި އެވެ. 

ދެ ހާސް ފަހަރަ ވަނަ އަހަރު މެއި 1 ވަނަ ދުވަހު، ރައީސް އަބްދުﷲ ޔާމީންގެ ސަރުކާރާ ދެކޮޅަށް ބޭއްވި ބޮޑު މުޒާހަރާގައި އެންމެ އިސްކޮށް ހުންނެވި ޝެއިޚް އިމްރާން ހައްޔަރުކޮށް އުފުލި ޓެރަރިޒަމްގެ ދައުވާ ސާބިތުވާ ކަމަށް ކަނޑައަޅައި 12 އަހަރަށް ޖަލަށް ލުމަށް ހުކުމް އިއްވި އެވެ.

ސެޕްޓެމްބަރު 23 ގައި ބޭއްވި ރިޔާސީ އިންތިޚާބު ކުރީގެ ރައީސް އަބްދުﷲ ޔާމީނަށް ނާކާމިޔާބު ވެފައި ވަނިކޮށް، ޝެއިޚް އިމްރާނުގެ ހުކުމުގެ ބާކީ އޮތް ބަޔަށް އަމަލުކުރުން ފަސްކުރަން ސުޕްރީމް ކޯޓުން ނިންމީ މި ނޮވެމްބަރު މަހުގެ 1ގަ އެވެ. އޭރު ތިން އަހަރަށް ވުރެ ގިނަ ދުވަހު އޭނާ ވަނީ ޖަލު ހުކުމުގައި ހޭދަކުރައްވައިފަ އެވެ.

ކޯލިޝަންގެ ކެންޑިޑޭޓެއްގެ ގޮތުގައި ރިޔާސީ އިންތިޚާބު ކާމިޔާބު ކުރެއްވި އިބްރާހިމް މުހައްމަދު ސޯލިހް، ރައީސުލްޖުމްހޫރިއްޔާކަމުގެ ހުވާ ކުރެއްވުމަށް ހޮނިހިރު ދުވަހުގެ ބޭއްވި ހައިބަތު ބޮޑު ރަސްމިއްޔާތަށް ފަހު އެކުލަވާލެއްވި ވަޒީރުންގެ މަޖިލީހުގެ ހޯމް މިނިސްޓަރަކަށް އިމްރާން އައްޔަން ކުރެއްވިއިރު، ގާނޫނު އަސާސީގެ 130 ވަނަ މާއްދާގައި ވަޒީރުންގެ ޝަރުތު ބަޔާންކޮށްފައިވާ ޝަރުތު އޭނާގެ ހަމަވާކަމާމެދު ގާނޫނީ ދާއިރާގެ ބޭފުޅުން ސުވާލު އުފައްދަވަ އެވެ.

އެ މާއްދާގެ ށ. ގައި ބުނެފައިވަނީ  "ޖިނާއީ ކުށެއް ކުރިކަން ސާބިތުވެގެން ބާރާ މަސްދުވަހަށް ވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކުނަމަ، އެހުކުމެއް ތަންފީޒްކޮށް ނިމުނުތާއި، ނުވަތަ އެހުކުމަކުން ކަނޑައެޅުނު އަދަބު މާފްކުރެވުނުތާ ތިން އަހަރުނުވާ މީހަކުކަމުގައިވުން" ކަމަށެވެ.

މި މާއްދާއަށް ބަލާއިރު، އިމްރާންގެ ވަޒީރު ކަމުގެ ޝަރުތެއް ހަމަވޭތޯ ސުވާލު އުފެދެ އެވެ. ސަބަބަކީ އޭނާގެ މައްޗަށް އިއްވާފައިވާ ހުކުމް ތަންފީޒުކުރުން ފަސްކުރުމަކީ، ޝަރުއީ ކޯޓަކުން ކޮށްފައިވާ ހުކުމެއް ނެތުން ކަމަށް ނުވުމެވެ. އިމްރާން ވަނީ ހުކުމުން ތިން އަހަރަށް ވުރެ ގިނަ ދުވަސް ޖަލުގައި ތަންފީޒުކޮށްފަ އެވެ.

"ގާނޫނު އަސާސީގައި ބުނެފައިވާ ގޮތުން ވަރަށް ޞަރީހަކޮށް އެނގޭ، އިމްރާންގެ މަގާމުގެ ޝަރުތު ހަމަ ނުވާކަން. އޭނާގެ މައްޗަށް އެއް އަހަރަށް ވުރެ ދިގު މުއްދަތަކަށް ތަންފީޒުކޮށްފައިވާ ހުކުމެއް އެބަ އޮތް،" ގާނޫނީ ދާއިރާގެ ތަޖުރިބާކާރު ބޭފުޅަކު ވިދާޅުވި އެވެ.

ސުޕްރީމް ކޯޓުން ނޮވެމްބަރު 1 ވަނަ ދުވަހު އިއްވި ހުކުމުގައި ބުނެފައިވަނީ އިމްރާންގެ ހުކުމުގެ ބާކީ ބައި ތަންފީޒުކުރުން ފަސްކުރުމަށެވެ.

ރާއްޖޭގެ އުއްތަމަ ފަނޑިޔާރު ޑރ. އަހްމަދު އަބްދުﷲ ޑީޑީގެ ކުރިފުޅުމަތީގައި އިބްރާހިމް މުހައްމަދު ސޯލިހްގެ ވަޒީރުން ހުވާކުރެއްވިއިރު، އިމްރާނުގެ ވަޒީރުގެ ކަމުގެ ޝަރުތާމެދު ގިނަ ބަޔަކު ސުވާލު އުފެއްދެވި ނަމަވެސް ގާނޫނީ ދާއިރާގެ ބައެއް ބޭފުޅުން ވިދާޅުވާ ގޮތުގައި ހުކުމް ފަންފީޒުކުރުން "ފަސްކުރުމަށް" ހުކުމުގައި ބުނެފައި އޮތުމަކީ، އިމްރާނުގެ ވަޒީރުކަމުގެ ޝަރުތު ގެއްލިގެންދާނެ ކަމެއް ނޫނެވެ.  

ސުޕްރީމް ކޯޓުން ގޮތެއް ނިންމަންދެން، އެ ހުކުމުގެ ދަށުން އިމްރާނާ މެދު އެއްވެސް ފިޔަވަޅެއް ނާޅަން ސުޕްރީމް ކޯޓުގެ އަމުރުގައި އަންގާފައިވިޔަސް އިމްރާންގެ ޖަލު ހުކުމް އަދިވެސް ސުޕްރީމް ކޯޓުން ބާތިލެއް ނުކުރެ އެވެ.

ގާނޫނީ ދާއިރާ މާހިރުން ވިދާޅުވަނީ އިމްރާނަށް ކުރެވުނު ޖަލު ހުކުމަކީ ރަނގަޅު ހުކުމަކަށް ނުވިޔަސް އިމްރާނަށް މިވަގުތު ހޯމް މިނިސްޓަރުކަމުގެ މަގާމު އަދާކުރެއްވޭނެ ކަމާ މެދު ސުވާލު އުފެދޭ ކަމަށެވެ. ހުކުމް ތަންފީޒު ކުރުން ފަސް ކުރިޔަސް، މިހާތަނަށް އެ ހުކުމް ބާތިލްކޮށްފައި ނެތެވެ. 

ހޯމް މިނިސްޓަރު އިމްރާނުގެ ޝަރުތާމެދު މިގޮތަށް ސުވާލު އުފައްދާއިރު، އެ ސުވާލަށް އާ ސަރުކާރުން އަދި ޖަވާބެއް ނުދެއްވަ އެވެ.