ޖިންސީ ގޯނާ ކުރިކަމުގެ ތުހުމަތުގައި މޮރޮކޯގެ ނޫސްވެރިޔަކު 12 އަހަރަށް ޖަލަށްލާން ހުކުމްކޮށްފި
12 ނޮވެމްބަރު 2018 | ހޯމަ 08:00ބުއެޝްރިން ދޫކޮށްލުމަށް ނޫސްވެރިން ދަނީ އަޑު އުފުލަމުން
މޮރޮކޯގެ ނޫސްވެރިޔާ ތައުފީގު ބުއެޝްރިން
އަންހެން މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި މޮރޮކޯގެ ނޫސްވެރިޔަކު ބާރަ އަހަރަށް ޖަލަށްލާން ހުކުމުކޮށްފިއެވެ.
މޮރޮކޯގެ ނޫހެއް ކަމުގައިވާ އަޙްވަރް އަލް ޔައޮއުމް ނޫހުގެ ޑައިރެކްޓަރު ތައުފީގު ބުއެޝްރިން 12 އަހަރަށް ޖަލަށް ލުމަށް ހުކުމްކޮށް 200،000 ދިރްހަމް ދައްކަން ކޯޓުން ހުކުމްކޮށްފައި ވަނީ ހުކުރުދުވަހުގެ ވަގުތެއްގައެވެ.
ބުއެޝްރިން ހައްޔަރުކޮށްފައި ވަނީ ފެބްރުއަރީ މަހު ފުލުހުން ކަސަބްލަންކާގައި ހުންނަ އޭނާގެ އޮފީސް ފާސްކުރުމަށް ފަހުގައެވެ. ބުއެޝްރިންގެ އޮފީހުން އޭނާގެ ބަރަހަނާ ވީޑިއޯތަކެއް ފެނިފައިވާ ކަމަށް ފުލުހުން ބުނެފައި ވާއިރު އޭނާ ވަނީ މިކަމާ ދެކޮޅު ހަދާފައެވެ.
މި މައްސަލަ ބެއްލެވި ޕޮރޮސިކިއުޓާ ޖެނެރަލް ވިދާޅުވީ ބުއެޝްރިން ހައްޔަރު ކުރެވިފައި ވަނީ ޖިންސީ ޝިކާރައަށް ވީ އަންހެން މުވައްޒަފުންތަކެއް ފުލުހުންނަށް ދިން ބަޔާނާ ގުޅިގެންނެވެ.
ޖިންސީ ގޯނާ ލިބިފައިވާ ކަމަށް 15 އަންހެނަކު ހެކި ބަސް ދީފައިވާއިރު މި ތުހުމަތުތައް ވެސް ބުއެޝްރިން ވަނީ ދޮގުކޮށްފައެވެ. އުމުރުން 49 އަހަރުގެ ނޫސްވެރިޔާ ދޫކޮށްލުމަށް ގޮވާލައި ހުކުރުދުވަހު ނޫސްވެރިންގެ އިތުރުން އެކްޓިވިސްޓުންތަކެއް ވަނީ މަޖިލީސް ދޮށަށް އެއްވެ އަޑުއުފުލާފައެވެ.
އެއްވި މީހުން ތުހުމަތުކުރާ ގޮތުގައި ބުއެޝްރިން ޖަލަށްލާފައި ވަނީ ސައުދީ ސަރުކާރަށް ފާޑުކިޔެ ލިޔެފައިވާ ލިޔުންތަކާ ގުޅިގެން ކަމަށެވެ.
