ބޮލީވުޑް ގެ މަޝްހޫރު ޖޯޑެއް ކަމަށްވާ ރަންވީރު ސިންގް އާއި ދިޕިކާ ޕަދުކޯންގެ ކައިވެންޏަށް އެ ދެ ފަންނާނުން އިޓަލީއަށް ގޮސްފިއެވެ. މި ދެ ލޯބިވެރިން އިޓަލީއަށް ފުރަންގޮސް، އެއާޕޯޓުގައި ތިއްބާ  ނޫސްވެރިންނަށް ވަނީ އެ މަންޒަރު ފެނިފައެވެ. ހޮނިހިރު ދުވަހު މި ދެ ފަންނާނުން އިޓަލީއަށް ފުރާފައި ވަނީ ދެ މީހުންގެ އާއިލާއާއި އެކު ކަމަށް އިންޑިއާގެ ބައެއް ނޫސް ތަކުން ރިޕޯޓު ކޮށްފައިވެއެވެ.

 މި މަހުގެ 14 އަދި 15 ވަނަ ދުވަހު އިޓަލީގައި ކުރިއަށް ގެންދިއުމަށް ހަމަޖެހިފައިވާ މި ދެ ފަންނާނުންގެ ކައިވެނި އިއުލާންކޮށްފައި ވަނީ އޮކްޓޫބަރު މަހު މީސްމީޑިއާ މެދުވެރިކޮށެވެ.

އިންޑިއާގެ މީޑިއާތަކުން މި ދެ ފަންނާނުންގެ ކައިވެނީގެ ހަބަރު ވަނީ ބޮޑު ސަމާލުކަމެއް ހޯދާފައެވެ.

ރިޕޯޓުތައް ބުނާ ގޮތުގައި މި ކައިވެނި އޮންނާނެ ކަމަށް ވަނީ އިޓަލީގެ ކޮމޯ ޕޮރޮވިންސް ގައި ހުންނަ މަޝްހޫރު ތަނެއް ކަމުގައިވާ ވިލާ ޑެލް ބަލްބިއަނެއްލޯ ގައެވެ. މަޝްހޫރު ހޮލީވުޑް ފިލްމު ކެސިނޯ ރޯޔަލްގެ އިތުރުން ސްޓާވޯރސް ސީރީޒްގެ ދެވަނަ ފިލްމުގެ ބައެއް މަންޒަރުތައް ވަނީ މިތަނުގައި ނަގާފައެވެ. ކުލަގަދަކޮށް ބާއްވަން ހަމަޖެހިފައިވާ ހަފްލާގައި ދިޕިކާ ބޭނުންކުރާނެ ކަމަށް ބެލެވޭ ގަހަނާއަށް 10 މިލިއަން އިންޑިއަން ރުޕީސް (137،969 އެމެރިކާ ޑޮލަރު) ހޭދަކޮށްފައިވާކަމަށް ރިޕޯޓުތައް ބުނެއެވެ.

ރަންވީރާއި ދީޕިކާގެ ކައިވެނީގެ ހަފްލާއަށް ދައުވަތު ދީފައިވަނީ ރައްޓެހިންނާއި އާއިލާ މީހުން ހިމެނޭ ގޮތަށް 30 މީހުންނަށެވެ. އިޓަލީ ގައި ބާއްވާ ކައިވެންޏަށް ފަހު ބެންގަލޫރު އަދި މުމްބާއީ ގައި އިތުރު ހަފްލާތަކެއް ބާއްވަން ހަމަޖެހިފައިވާކަމަށް މި ދެ ފަންނާނުންގެ ގާތް ފަރާތްތަކާއި ހަވާލާދީ އިންޑިއާގެ ނޫސްތަކުން ވަނީ ބުނެފައެވެ. ބޭންޑް ބަޖާ ބާރާތުން ބޮލީވުޑަށް ނިކުތް ރަންވީރު ސިންގް އާއި އޯމް ޝާންތީ އޯމް އިން ބޮލިވުޑަށް ތަޢާރުފުވި ދިޕިކާ ގެ ގުޅުން ފެށިފައިވަނީ 2012 ވަނަ އަހަރު ސަންޖޭލީލާ ބަންސާލީގެ ފިލްމު ރާމްލީލާގެ މަސައްކަތް ކުރަމުން ދިޔައިރުއެވެ. މިދެމީހުން ލޯބީގެ ގޮތުން ގުޅިގެން އުޅޭކަން ހާމަކޮށްފައިވަނީ ދާދި ފަހުންނެވެ.   

ރަންވީރު ސިންގް އެންމެ އަވަހަށް ފެނިގެންދާނީ ރޯހިތު ޝޭޓީ ޑައިރެކްޓްކުރާ ފިލްމު ސިމްބާ އިންނެވެ. މި އަހަރު ޑިސެމްބަރު އެކާވީހުގައި ނެރެން ހަމަޖެހިފައިވާ އާނަންދު އެލްރާއިގެ ފިލްމު ޒީރޯ ގައި ދިޕިކާ ފެނިގެންދާނީ ޝާހް ރުކް ޚާން އާއި އެކުއެވެ.