ޗެމްޕިއަންސް ލީގު: ޑޯޓްމަންޑްގެ މައްޗަށް އެޓްލެޓިކޯ ކުރިހޯދައިފި

ޔުއެފާ ޗެމްޕިއަންސް ލީގުގައި ބްރޫޝިއާ ޑޯޓްމަންޑްގެ މައްޗަށް އެޓްލެޓިކޯ މެޑްރިޑުން ކުރި ހޯދައިފިއެވެ.

އަންގާރަ ދުވަހުގެ ރޭ ކުޅުނު މެޗުގައި ޑޯޓްމަންޑްގެ މައްޗަށް އެޓްލެޓިކޯ ކުރިހޯދީ 0-2 ގެ ނަތީޖާއަކުންނެވެ.

އެޓްލެޓިކޯ ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުން ފެނުނީ ހަމަހަމަ ކުޅުމެކެވެ. އެގޮތުން ދެޓީމުންވެސް ވަނީ ކުރިއަށް ޖެހި ހަމަލާތައް އުފައްދާފައެވެ.

އެޓްލެޓިކޯ އިން މެޗުގައި ލީޑު ނެގީ 33 ވަނަ މިނެޓުގައެވެ. މި ލަނޑު ފިލިޕޭ ލުއިޒްގެ އެހީތެރި ކަމާއެކު ކާމިޔާބުކުރީ ސައުލްއެވެ. މި ލަނޑަށްފަހު ވެސް އެޓްލެޓިކޯ އިން ވަނީ ޑޯޓްމަންޑްގެ ގޯލަށް ނުރައްކާ ކޮށްފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ޑޯޓްމަންޑްގެ މައްޗަށް އެޓްލެޓިކޯ ކުރީގައި އޮވެގެންނެވެ.

ދެވަނަ ހާފް ފެށިގެންވެސް ރަނގަޅަށް ކުޅެމުން ދިޔައީ އެޓްލެޓިކޯ އިންނެވެ. އެގޮތުން އެޓީމުން ވަނީ ޑޯޓްމަންޑްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ.

ދެވަނަ ހާފްގައި ޑޯޓްމަންޑްގެ ފަރާތުންވެސް ހަމަލާތަކެއް ފެނިގެން ދިޔައެވެ. އެހެންނަމަވެސް އެ ހަމަލާތަކުގެ ބޭނުން އެންމެ އެދެވޭ ގޮތެއްގައި އެޓީމަށް ހިފިފައި ނުވެއެވެ.

އެޓްލެޓިކޯ އިން ލީޑު ފުޅާކުރީ 80 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ ޕާޓޭގެ އެހީތެރިކަމާއެކު އެންޓޯނިއޯ ގްރިޒްމަންއެވެ.

މި ނަތީޖާއާއެކު އެޓްލެޓިކޯ އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކު ގްރޫޕްގެ ދެވަނައިގައެވެ. މި އަދަދަށް ޕޮއިންޓް ހޯދައިގެން ޑޯޓްމަންޑް އޮތީ ލަނޑުގެ ތަފާތުން ގްރޫޕްގެ އެއްވަނައިގައެވެ.

މި ގްރޫޕްގައި ހިމެނޭ މޮނާކޯ އަދި ކްލަބް ބްރޫޖް ބައްދަލުކުރި މެޗު 0-4 ގެ ތަފާތުބޮޑު ނަތީޖާއަކުން ކާމިޔާބުކުރީ ބްރޫޖް އިންނެވެ.

މި ނަތީޖާއާއެކު މޮނާކޯ އޮތީ ކުޅުނު ހަތަރު މެޗުން ލިބުނު އެއް ޕޮއިންޓާއެކު ގްރޫޕްގެ ފުލުގައެވެ. މެޗުން މޮޅުވީ ބްރޫޖް އޮތީ ކުޅުނު ހަތަރު މެޗުން ލިބުނު ހަތަރު ޕޮއިންޓާއެކު ގްރޫޕްގެ ތިންވަނައިގައެވެ.