ދިރާގު ދިވެހި ލީގުގައި އަހުމަދު ރިޒުވާން (ރިޒޭ) ގެ ހެޓްރިކާއެކު ފ.ނިލަންދޫގެ މައްޗަށް ކްލަބް އީގަލްސް ކުރިހޯދައިފިއެވެ.

އާދީއްތަ ދުވަހުގެ ރޭ ނިލަންދޫއާ ދެކޮޅަށް ކުޅުނު މެޗު އީގަލްސް އިން ކާމިޔާބުކުރީ 0-8 ގެ ތަފާތު ބޮޑު ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯގެން ރަނގަޅަށް ކުޅެމުން ދިޔައީ އީގަލްސް އިންނެވެ. އެގޮތުން 23 ވަނަ މިނެޓުގައި ހުސެއިން ސިފާއު ޔޫސުފްގެ ލަނޑުން އީގަލްސް އިން ވަނީ މެޗުގެ ލީޑު ނަގާފައެވެ.

އީގަލްސް އިން މެޗުގެ ލީޑު ފުޅާ ކުރީ 40 ވަނަ މިނެޓުގައި އަހުމަދު ނާއިމްއެވެ. އޭގެ ތިން މިނެޓު ފަހުން އީގަލްސްގެ ތިންވަނަ ލަނޑު ކާމިޔާބުކުރީ އެޓީމުގެ ބިދޭސީ ކުޅުންތެރިޔާ ކޮމިލޮވް އަބްދުއްރަސުލްއެވެ.

ފުރަތަމަ ހާފް ނިމުމުގެ ކުރިން އީގަލްސް އިން ވަނީ މެޗުގެ ހަތަރުވަނަ ލަނޑު ކާމިޔާބު ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ މުހައްމަދު ނާއިމްއެވެ.

މި ލަނޑުތަކާއެކު ފުރަތަމަ ހާފް ނިމުނީ 0-4 ގެ ނަތީޖާއަކުން ނިލަންދޫގެ މައްޗަށް އީގަލްސް ކުރީގައި އޮވެގެންނެވެ.

ދެވަނަ ހާފް ފެށިގެން ވެސް ރަނގަޅަށް ކުޅުނީ އީގަލްސް އިންނެވެ. އެގޮތުން 52 ވަނަ މިނެޓުގައި ރިޒޭ ވަނީ އީގަލްސްގެ ފަސްވަނަ ލަނޑު ކާމިޔާބު ކޮށްފައެވެ. އޭގެ ހަ މިނެޓު ފަހުން ރިޒޭ ވަނީ އެޓީމުގެ ހަވަނަ ލަނޑު ކާމިޔާބުކޮށްފައެވެ.

މެޗު ނިމެން 10 މިނެޓަށް ވެފައިވަނިކޮށް ރިޒޭ ވަނީ އީގަލްސްގެ ހަތްވަނަ ލަނޑު ކާމިޔާބުކޮށް އޭނާގެ ހެޓްރިކް ފުރިހަމަ ކޮށްފައެވެ. މިއީ މި ސީޒަނުގައި އޭނާ ކާމިޔާބުކުރި 23 ވަނަ ލަނޑެވެ. އޭނާ ވަނީ އެންމެ ފަހުން ކުޅުނު ފަސް މެޗުގައި 16 ލަނޑު ކާމިޔާބު ކޮށްފައެވެ.

އީގަލްސްގެ 8 ވަނަ ލަނޑު 89 ވަނަ މިނެޓުގައި ކާމިޔާބުކޮށް މުހައްމަދު ނާއިމް ވެސް ވަނީ މެޗުގައި އޭނާގެ ހެޓްރިކް ފުރިހަމަކޮށްފައެވެ.

މި ނަތީޖާއާއެކު އީގަލްސް ވަނީ ކުޅުނު 10 މެޗުން 23 ޕޮއިންޓް ހަމަކޮށް، ޕޮއިންޓް ތާވަލުގެ ދެވަނަ އަށް ޖެހިލާފައެވެ. މެޗުން ބަލިވި ނިލަންދޫ އޮތީ ކުޅުނު 10 މެޗުން ލިބުނު ހަތް ޕޮއިންޓާއެކު ޕޮއިންޓް ތާވަލުގެ 8 ވަނައިގައެވެ.