ދިރާގު 13 އަހަރުން ދަށުގެ ލީގު ޗެމްޕިއަންކަން އާލީ ޓަޗް ފުޓުބޯލް އެކަޑަމީން ހޯދައިފިއެވެ.

ހޮނިހިރު ދުވަހު މާޒިޔާ ފުޓްބޯލް އެކަޑަމީ އަދި އާލީ ޓަޗް ބައްދަލުކުރި މެޗަށްފަހު ލީގުގެ ކުޅުން ނިމިފައި ވާއިރު، އާލީ ޓަޗް އިން ވަނީ ކުޅުނު 14 މެޗުން 37 ޕޮއިންޓް ހަމަކޮށްފައެވެ. އާލީ ޓަޗްގެ ފަހަތުން ދެވަނަ ލިބުނީ ކުޅުނު 14 މެޗުން 33 ޕޮއިންޓް ހަމަކުރި މާޒިޔާށެވެ. ތިން ވަނަ ލިބުނީ 14 މެޗުން 31 ޕޮއިންޓް ހަމަކުރި ހުޅުމާލޭ ސްޕޯޓްސް ސްކޫލަށެވެ.

ލީގުގައި ކުޅުނު ފަހު މެޗުގައި މާޒިޔާ އިން ވަނީ އާލީ ޓަޗްގެ މައްޗަށް 1-3 ގެ ނަތީޖާ އިން ކުރިހޯދާފައެވެ. މެޗުގައި މާޒިޔާގެ ލަނޑުތައް ކާމިޔާބުކޮށް ދިނީ މުހައްމަދު އިޔާން ހަސަން އާއި އަބްދުﷲ ރިފާހު އަދި އިބްރާހިމް ނަބްހާން ނަޝީދެވެ. އާލީ ޓަޗްގެ ހަމަ އެކަނި ލަނޑު ކާމިޔާބުކުރީ އާމިން އުމަރު މޫސާއެވެ.

ލީގުގައި އެންމެ ގިނަ ލަނޑު ޖެހި ކުޅުންތެރިޔަކަށް 26 ލަނޑާއެކު މާޒިޔާގެ މުހައްމަދު އިޔާން ހަސަން ހޮވިފައި ވާއިރު، ފެއާ ޕްލޭ ޓީމަކަށް ހޮވުނީ މޯލްޑިވްސް ސޮކާ މޭޓްސްއެވެ.

ލީގުން ޑްރީމް ޓީމަށް ހޮވިފައި ވަނީ ހުޅުމާލޭގެ ޔޫސުފް ޝާއިފް އާއި މުހައްމަދު އަނޫފް އިބްރާހިމް އާއި މާޒިޔާގެ މުހައްމަދު އިޔާން ހަސަން އާއި ޔޫޝައު ބިން އަލީ ނަޝީދު އާއި އީޓީއެފްއޭ. ގެ ދައްޔާން އަހުމަދު އާއި އަހުމަދު ޒަހާން ނަޒީއު އާއި އަހުމަދު ޔާޒިން މަހުދީ އާއި މުހައްމަދު ނަވީން ނަސީމް އަދި ސޮކާ މޭޓްސްގެ އަހުމަދު ޝިޔާހްއެވެ.