ގައުމީ ވޮލީބޯޅަ މުބާރާތުގެ އަންހެން ޑިވިޝަންގެ ފުރަތަމަ މެޗުން ކްލަބް ވެމްކޯ އަތުން ފޮނަދޫ މެދުއަވަށު ސްޕޯޓްސް ކްލަބް މޮޅުވެއްޖެއެވެ.

ޒުވާނުންގެ މަރުކަޒު އެތެރެ ކޯޓުގައި ހުކުރު ދުވަހު ހަވީރު ކުޅުނު މެޗުން ވެމްކޯއާ ވާދަކޮށް ފޮނަދޫ މޮޅުވީ ސީދާ ތިން ސެޓުންނެވެ.

ގައުމީ މުބާރާތަށް އެންމެ ވަރުގަދައަށް ތައްޔާރުވި ޓީމުގެ ގޮތުގައި ބެލެވިފައިވާ ފޮނަދޫ ޓީމުން މެޗުގެ ސެޓުތައް ގެންދިޔައީ 25-21، 25-22 އަދި 25-18 އިންނެވެ.

މެޗުގެ މޮޅު ކުޅުންތެރިއަކަށް ހޮވުނީ އައިޝަތު މާޖިދާއެވެ.

ހުކުރު ދުވަހު ހަވީރު ފެށި ގައުމީ ވޮލީބޯޅަ މުބާރާތުގެ އަންހެން ޑިވިޒަޝަނުގައި އެންމެ ފަހުން ދެ ފަހަރު ގައުމީ ޗެމްޕިއަންކަން ހޯދި ފުވައްމުލަކު މިސްކިތްމަގު އެންމެންގެ ގުޅުމުން ބައިވެރިއެއް ނުވެއެވެ.

އަންހެން ޑިވިޝަނުގައި ވާދަކުރާ އަނެއް ޓީމަކީ އެންމެ ފަހުގެ ރަނަރަޕް ޕޮލިސް ކްލަބެވެ.

މި ފަހަރުގެ މުބާރާތް ކުރިއަށްދާނީ ތިން ޓީމުގެ މެދުގައި ކުޅުމަށް ފަހު އެންމެ ގިނަ ޕޮއިންޓް ހޯދާ ޓީމެއް ފައިނަލަށްދާ ގޮތަށެވެ. ފައިނަލުގެ އަނެއް ޖާގަ ލިބޭނީ ދެން އޮތް ދެ ޓީމު ކުޅޭ ސެމީ ފައިނަލް މެޗުން މޮޅުވާ ޓީމެކެވެ.

ޒުވާނުންގެ މަރުކަޒު އެތެރެ ކޯޓު ލިބުނު މުއްދަތަށް މުބާރާތްތައް ފައްތަން ޖެހޭތީ މި ފަހަރު ގައުމީ ލީގުގެ އަންހެން އަދި ފިރިހެން މުބާރާތް ނުބާއްވަން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ވަނީ ނިންމައިފައެވެ.

ގައުމީ ވޮލީބޯޅަ ލީގަކީ ކުރިން މާލޭ ލީގުގެ ނަމުގައި ފަށައި ގިނަ އަހަރުތަކެއް ވަންދެން ކުރިއަށް ދިޔަ މުބާރާތެކެވެ.

ކުރިން ގައުމީ މުބާރާތަށް ގައުމީ ލީގުން ޓީމުތައް ކޮލިފައިވާއިރު މި ފަހަރު އަންނަ ބަދަލުތަކުގެ ތެރޭގައި އެސޯސިއޭޝަން ކަޕަށް ބަލައިގެން ގައުމީ މުބާރާތަށް ޓީމުތައް ކޮލިފައިވާ ގޮތަށް ވަނީ ރާވާފައެވެ.

އާންމުކޮށް ކޮންމެ އަހަރަކު ވެސް ވޮލީގެ ގިނަ މުބާރާތްތައް އޮންނަނީ އަހަރު ފަހު ކޮޅުގައެވެ. މި އަހަރުގެ މިހާތަނަށް ފިރިހެން ކުޅުންތެރިންނަށް އޮތީ އިންޓަ ރިސޯޓް ވޮލީބޯޅަ މުބާރާތެވެ.