އެކީއްވެހޭ އޮޅުންއެރީ: ތިން ތަރިންގެ ވާހަކަ

ރާއްޖެ ޓީވީގެ ލޮޖިސްޓިކް އޮފިސަރެއްގެ ގޮތުގައި މަސައްކަތް ކުރާ ގަމަރުއްދީން ފަހުމީ އާއި ޖާނަލިސްޓް ސިމާހާ ނަސީމް އަދި އޮންއެއަރ އޮޕަރޭޓަރ އަމަތުﷲ އާދަމް އެކްޓްކުރަން ކެމެރާގެ ކުރިމައްޗަށް އަރަން ޖެހުނީ އޮފީހުން ހަވާލު ކުރާ އެއްވެސް މަސައްކަތަކަށް ނޫނެކޭ ނުބުނުމުގެ ގޮތުން ކަމަށް އެ ތިން މުވައްޒަފުން ވަނީ ބުނެފައެވެ.

މި ތިން މުވައްޒަފުން ވެސް ފުރަތަމަ ހަރަކާތްތެރިވެފައި ވަނީ ރާއްޖެ ޓީވީން ކޮންމެ ރަމަޟާން މަހަކު ތައްޔާރުކުރާ ހެއްވާ މަޖާ ޕްރޮގްރާމް "ދަންބައި" އިންނެވެ. އޭގެ ފަހުން ރާއްޖެ ޓީވީން އަޟްހާ އީދަށް ޚާއްސަކޮށް ތައްޔާރުކުރި "ކުކުޅެއް ކާން" މި ލަވައިން ވެސް މި ތިން މުވައްޒަފުން ވަނީ ފެނިގެން ގޮސްފައެވެ.

އެންމެ ބޮޑަށް މި ތިން މުވައްޒަފުން ބެލުންތެރިންގެ މެދުގައި ފާހަގަ ވެގެން ދިޔައީ ރިޔާސީ އިންތިޚާބާ ގުޅިގެން ރާއްޖެ ޓީވީން އުފެއްދި "އެކީއްވެހޭ އޮޅުންއެރީ" ވީޑިއޯ ކްލިޕް ތަކުންނެވެ. އެކަން ރާއްޖެ ޓީވީގެ ފޭސްބުކް ޕޭޖަށް ލިބިފައިވާ ލައިކްސް އެކަނި ވެސް އެނގެ އެވެ.

ރާއްޖެ ޓީވީގެ ފޭސްބުކް ޕޭޖްގައި ޝެއަރ ކޮށްފައިވާ މި ކްލިޕްތައް ވަނީ އެއްލައްކައާ ގާތްކުރާ އަދަދަކަށް މީހުން ބަލައިފައެވެ.

ރާއްޖެ ޓީޥީގެ "ކުލަ ސްކްރީން" ޕްރޮގްރާމަށް ދިން އިންޓަވިއުއެއްގައި ގަމަރު ބުނެފައިވަނީ އިންތިޚާބާ ގުޅޭ ވީޑިއޯ ކްލިޕްތައް ނަގަމުން ދިޔައިރު އެންމެ އުނދަގޫކަމަށް ދިމާވެފައިވަނީ ރުއި މަންޒަރު ކުޅުމަށް ކަމަށެވެ.

އިންތިޚާބާ ގުޅޭ ގޮތުން އާންމުން ހޭލުންތެރިކުރުމަށް ރާއްޖެ ޓީވީން ޖުމްލަ ހަ ކްލިޕެއް އުފެއްދިއިރު، ގިނަ ކްލިޕްތައް ނިމޭއިރު ގަމަރު ފެނިގެން ދިޔައީ ކޮޅުކެހި ލިބޭ މީހާގެ ގޮތުގައެވެ. ނަމަވެސް އާންމު ދިރިއުޅުމުގައި ގަމަރަކީ ވަރަށް ކާމިޔާބު މީހެއް ކަމަށް އޭނާ ވަނީ ބުނެފައެވެ.

ސިމާހާގެ ކްލިޕްތަކުން ބެލުންތެރިން އެންމެ ބޮޑަށް ފާހަގަ ކޮށްފައިވަނީ ކަދުރު ކާ މަންޒަރު ކަމަށް ސިމާހާ ވަނީ ބުނެފައެވެ. ނޫސްވެރިއެއްގެ ގޮތުން ގަލަން ހިންގުމުގެ އިތުރުން، ސިމާހާ އެކްޓްކުރުމުގެ ހުނަރަށް ވެސް ގިނަ ބަޔަކު ތައުރީފު ކުރެ އެވެ.

އޮންއެއާ އޮޕަރޭޓަރެއްގެ ގޮތުން، އަމަތު ބުރަކޮށް މަސައްކަތްކުރަމުން ދިއުމުގެ އިތުރުން އެކްޓްކުރަން ވެސް ޝައުގުވެރިކަން ވަރަށް ބޮޑެވެ. އަދި މި ބެލުންތެރިންގެ ފަރާތުން ލިބޭ ތަރުޚީބަކީ މި ދާއިރާއިން ކުރިއަށް ދިއުމަށް ލިބޭ ހިތްވަރެއް ކަަމަށް އަމަތު ފާހަގަކުރެ އެވެ.

މި ތިން މުވައްޒަފުން ބުނެފައިވަނީ އަދިވެސް އިތުރު އުފެއްދުންތަކުން ފެނިގެންދާނެ ކަމަށެވެ.

އިންތިޚާބަށް ހޭލުންތެރިކުރުމަށް އުފެއްދި ކްލިޕްތަކަކީ ރާއްޖެ ޓީވީގެ ޕްރޮގްރާމް ހެޑް އާމިރު ސަލީމް ޑައިރެކްޓް ކޮށްފައިވާ އަދި ރާޢްޖެ ޓީވީގެ ޗީފް ކެމެރާމަން މުހައްމަދު އަނިލް ކެމެރާކޮށްފައިވާ ވީޑިއޯ ކްލިޕް ތަކެކެވެ. ގަމަރަށް ޝޫޓިންގގެ ތެރޭގައި އެންމެ ބޮޑު އެހީތެރިކަމެއް ލިބިގެން ގޮސްފައިވަނީވެސް އަނިލްގެ ފަރާތުންކަން ގަމަރު ވަނީ ފާހަގަ ކޮށްފައެވެ.

ގަމަރުގެ އެކްޓިންއަށް އާންމުންގެ ފަރާތުން ލިބޭ ތަރުހީބު ގަމަރު ވަނީ ފާހަގަ ކޮށް ޝުކުރު އަދާކޮށްފައެވެ.