ޖާބިރު މާލެވަޑައިގެންފި
ދިވެހި އެއްވެސް ރައްޔިތަކު ރައީސް ޔާމީނަށް މަޢާފުކޮށްގެން ނުވާނެ ކަމަށް ވިދާޅުވި
އަބުދުﷲ ޖާބިރު
ކުރީގެ ރައީސް މުހައްމަދު ނަޝީދުގެ އެޑްވައިޒަރު އަދި ޔޮޓް ޓުއާޒްގެ ޗެއާމަން އަބުދުﷲ ޖާބިރު ބުދަ ދުވަހުގެރޭ ރާއްޖެ ވަޑައިގަންނަވައިފިއެވެ.
އޭނާ މާލެ މި ވަޑައިގެންނެވީ ޕާސްޕޯޓް ވެސް ހިފަހައްޓާ ކެންސަލް ކޮށްފައި ވަނިކޮންނެވެ. ޖާބިރު ރާއްޖެ ވަޑައިގެންނެވި އިރު، މަރުހަބާ ދެންނެވުމަށް އެމްޑީޕީގެ ޗެއާޕާސަން ހަސަންލަތީފާއި، އެޕާޓީގެ ނައިބު ރައީސް މުހައްމަދު ޝިފާޒުގެ އިތުރުން އިދިކޮޅު ޕާޓީތަކުގެ ބައެއް އިސްވެރިން ބައިވެރިވެ ވަޑައިގެންނެވިއެވެ.
ޖާބިރުގެ ޕާސްޕޯޓު ހިފަހައްޓާފައިވަނީ ފުލުހުން ތަހުގީގުކުރާ މައްސަލައަކާ ގުޅިގެން ޖާބިރުގެ ޕާސްޕޯޓު ކެންސަލް ކުރަން ފުލުހުން އެދުމުންނެވެ. އިނގިރޭސިވިލާތުން ހިމާޔަތް ހޯއްދަވައިގެން ދިރިއުޅުއްވަމުން ގެންދެވި ޖާބިރު ހޯދުމަށް ފުލުހުން ދަނީ މަސައްކަތް ވެސް ކުރަމުންނެވެ. ޖާބިރު ކުރެއްވި ޓުވީޓަކުން މިއަދު ރާއްޖެ ވަޑައިގަންނަވާނެ ކަމަށް ވިދާޅުވެ އޭނާ ރާއްޖެ ވަޑައިގަންނަވާ ފްލައިޓުގެ ތަފްސީލް ދެއްވައިފައިވީ ނަމަވެސް، މިއަދު ޖާބިރު ރާއްޖެ ވަޑައިގެންނެވިއިރު އެއްވެސް ފުލުހަކު އޭނާ ހައްޔަރުކުރުމަށް މަސައްކަތްކޮށްފައެއް ނުވެއެވެ.
ޖާބިރުގެ މައްސަލައެއް ފުލުހުން ތަހުގީގު ކުރަމުންދާއިރު މީރާއިން ވަނީ ޖާބިރުގެ ޔޮޓް ޓުއާސް ކުންފުނިން 46 މިލިއަން ރުފިޔާ ހޯދަން ސިވިލް ކޯޓަށް މައްސަލަވެސް ހުށަހަޅާފަ އެވެ. ރައްޔިތުންގެ މަޖިލީހާއި، ރައްޔިތުންގެ ހާއްސަ މަޖިލީހުގެ މެންބަރުކަން ވެސް މީގެކުރިން ކުރައްވާފައިވާ ޖާބިރު ވިދާޅުވީ، ގައުމުން ބޭރުގަައި ގިނަ ދުވަސްތަކަކު ދިރިއުޅުއްވުމަށް ފަހު ރާއްޖެވަޑައިގެންނެވީ ތިމާގެ މީހުންނާއި، ރަހުމަތްތެރިނާއި ބައްދަލުކޮށް، ބިރެއްނެތި އަރާމުގައި ދިރިއުޅެ ވިޔަފާރިކުރުމަށް ކަމަށެވެ. އަދި ރައީސް އަބްދުﷲ ޔާމީންގެ ގޮތް އެންމެ ރަނގަޅަށް އެނގިވަޑައިގަންނަވާނެ އެއް ބޭފުޅަކީ އޭނާ ކަމަށާއި ދިވެހި އެއްވެސް ރައްޔިތަކު ރައީސް ޔާމީނަށް މަޢާފުކޮށްގެން ނުވާނެ ކަމަށް ވެސް ޖާބިރު ވިދާޅުވި އެވެ. މިރޭ ރާއްޖެ ވަޑައިގެން މީޑިއާތަކާއި ވާހަކަ ދައްކަވަމުން ޖާބިރު އިތުރަށް ވިދާޅުވީ، ހުރިހާ ސިޔާސީ ހައްޔަރީން ދޫކޮށްލަން ޖެހޭ ކަމަށާއި މިހާރު ހޯދަންވީ ރައީސް ޔާމީން ހައްޔަރުކުރާނެ ކޯޓު އަމުރެއް ކަމަށެވެ. އަދި ރައީސް ޔާމީން ފިއްލެވުމުގެ ފުރުސަތު ދިވެހި އެއްވެސް ރައްޔިތަކު ދީގެން ނުވާނެ ކަމަށް ވެސް ޖާބިރު ވިދާޅުވިއެވެ. ރައީސް ނަޝީދުގެ އެޑްވައިޒަރެއްގެ ގޮތުގައި މިވަގުތު ހުންނެވި ޖާބިރު ރާއްޖެވަޑައިގެންނެވިއިރު، އިބްރާހިމް މުހައްމަދު ސޯލިހް (އިބޫ) އިންތިހާބު ކާމިޔާބުކުރެއްވުމާއެކު ގިނަ ބޭފުޅުން އަންނަނީ ރާއްޖެ ވަޑައިގަތުމަށް ތައްޔާރުވަމުންނެވެ. އެގޮތުން ކުރީގެ ރައީސް މުހައްމަދު ނަޝީދު ވަރަށް އަވަހަށް ރާއްޖެ ވަޑައިގަންނަވާނެ ކަމަށް އެމްޑީޕީން ބުނެއެވެ.
