ފޭކް މެސެޖްތައް ފޮނުވާ މައްސަލަ ބޮޑުވެއްޖެ
އެ މެސެޖްތަކަކީ ފޭކް މެސެޖްތަކެއް ކަމަށް އެފަރާތްތަކުން ދަނީ ބުނަމުން
ވޯޓުލުމަށް ބަޔަކު ކިޔުގައި
ބައެއް ސިޔާސީ ބޭފުޅުންގެ ނަމުގައި ފޭކް މެސެޖްތަކެއް ފޮނުވާ މައްސަލަ ބޮޑުވެއްޖެއެވެ.
ވަކި ބޭފުޅަކަށް ތާއީދުކޮށް ވޯޓް ދެއްވުމަށް އެދި ސިޔާސީ ބައެއް ބޭފުޅުންގެ ނަމުގައި ފޮނުވާ އެސްއެމްއެސްތަކަކީ ފޭކް މެސެޖްތަކެއް ކަމަށް އެފަރާތްތަކުން ދަނީ ބުނަމުންނެވެ.
އެގޮތުން ޖުމްހޫރީ ޕާޓީގެ ބާނީ ގާސިމް އިބްރާހިމްގެ ނަމުގައި ފޮނުވާ މެސެޖްތައް އެއީ ފޭކެއް ކަމަށާއި އެއީ ބަޔަކު ހިންގާ ބޮޑު ޖަރީމާއެއް ކަމަށް ގާސިމް ކުރެއްވި ޓްވީޓެއްގައި ވަނީ ވިދާޅުވެފައެވެ.
މީގެ އިތުރުން އަދާލަތު ޕާޓީގެ ރައީސް އައްޝައިޚް އިމްރާން އަބްދުﷲގެ އަނބިކަނބަލުން މަރިޔަމް ރީމްގެ ފޯނު ނަންބަރު ކަމަށް ބުނާ ނަންބަރަކުން ދައުރުވާ މެސެޖަކީ ގޮތް ނޭނގޭ ބަޔަކު ހިންގާ ޖަރީމާއެއް ކަމަށް އޭނާ ވެސް ވަނީ ވިދާޅުވެފައެވެ.
މީގެ އިތުރުން ވެސް ވަރަށް ގިނަ މިފަދަ ފޭކް މެސެޖްތައް ފޮނުވާ މައްސަލަ ވަނީ ބޮޑުވެފައެވެ.
މިމައްސަލަ މޯލްޑިވްސް ޕޮލިސް ސާރވިސްގެ ސަމާލުކަމަށް ގެނެސްފައިވާ ކަމަށް އަދާލަތު ޕާޓީން ވަނީ ބުނެފައެވެ.
