އަލިދީގެ ތާއީދު އިބޫއަށް!
އިބޫ އަކީ ކެތްތެރި ވަރުގަދަ ޝަހުސިއްޔަތެއްކަމަށް ވިދާޅުވި
ޔޫރަޕިއަން ޔޫނިއަންގެ ރާއްޖޭގެ ކުރީގެ ސަފީރު އަލީ ހުސެއިން ދީދީ
ރާއްޖެއިން ޔޫރަޕިއަން ޔޫނިއަން ގައި ހުންނެވި ކުރީގެ ސަފީރު އަލީ ހުސެއިން ދީދީ އިދިކޮޅު ކެނޑިޑޭޓް އިބުރާހިމް މުހައްމަދު ސޯލިހް އެންޑޯސް ކުރައްވައިފިއެވެ.
އިމިގްރޭޝަންގެ ކުރީގެ ކޮންޓްރޯލަރ ކަންވެސް ކުރައްވާފައިވާ އަލީ ދީދީ އިބޫއަށް ތާއީދުކުރެއްވުމަށް ނިންމެވީ، އިބޫގެ ކިބައިގައި ހުރި އެންމެ ވަރުގަދަ ސިފަ ކަމުގައިވާ ކެތްތެރިކަމާއި ތަފާތު ވިސްނުންތަކާއި އަދި އިދިކޮޅު ފަރާތްތަކާއި އެކު ވެސް މަސައްކަތް ކުރެއްވުމުގެ ގާބިލްކަން ހުރި ޝަހުސިއްޔަތަކަށް ވާތީ ކަމަށް ވިދާޅުވިއެވެ. އަދި މިވަގުތު މިރާއްޖެއަށް އެންމެ ބޭނުންވަނީވެސް އެ ސިފަތައްކެއްހުރި ވެރިއެެއްކަމަށް އަލީދީދީ ވިދާޅުވިއެވެ.
ވޭތުވެ މިދާ 10 އަހަރުގެ ތެރޭގައި ސިޔާސީ ހަނގުރާމަ ގަނޑެއްގެ ތެރޭގައި ފިކުރުގެ ގޮތުން ރާއްޖޭގެ އާބާދީ ވަނީ ވަރަށް ބޮޑަށް ދެބައިވެފައި ކަމަށް އަލިދީދީ ވިދާޅުވިއެވެ.
ވަރަށް ގިނަ ދުވަސްތަކެއް ވަންދެން ސިޔާސީ މައިދާނާއި ދުރުގައި ހުންނެވުމަށްފަހު ނުކުންނަވަން ޖެހިވަޑައިގަތީ، މިއަދު ގައުމު އޮތް ހާލަތުންކަމަށް އޭނާ ވިދާޅުވިއެވެ. އެގޮތުން މިއަދު މި ގައުމު އޮތީ، ވަރަށް މުހިއްމު ހުރަސް މަގެއްގައި ކަމަށާއި، މިއަދު ނިންމާ ނިންމުން ވަރަށް ގިނަ ދުވަސްތަކަކަށް އޭގެ އަސަރު ދެމިގެން ދާނެކަމަށް އޭނާ ވިދާޅުވިއެވެ.
އިބޫގެ ވެރިކަމެއްގައި ގައުމުގައި މިހާރު އޮތް ބައިބައިވުން ނެތިކޮށްލާ ސިޔާސީ މަޝްރަހުގައި މި އޮތް ހޫނުކަމަށް ހިހޫ ކަމެއް ގެނެސް ދެއްވާނެކަމަށް އޭނާ ވިދާޅުވިއެެވެ.
ރާއްޖޭގެ ހާލަތު ވަރަށް ގާތުން އީޔޫ އިން ބަލަމުންދާކަމަށާއި، ޚާއްސަކޮށް ކުރިއަށް އޮތް ރިޔާސީ އިންތިޚާބު މިނިވަން އިންސާފުވެރި އިންތިޚާބަކަށް ވޭތޯ ވަރަށް ބޮޑަށް ފާރަވެރިވެ ބަލަމުންދާނެކަމަށެވެ.
"އިންސާފުވެރިކޮށް ދާކަމަށް ވާނަމަ ފިޔަވަޅެއް ނާޅާނެކަމަށާއި، ހަމަ އެކަނި އިންތިޚާބެއް ނޫން. އިދާރީގޮތުން ކަންތައްތައް ހިނގަމުންދާ ގޮތާއި އިންސާނީ ހައްގުތަކާއި ދޭތެރޭ ކަންތައްތައް ހިނގަމުންދާ ގޮތާއި، މި ހުރިހާކަމަކާއި ދޭތެރޭ އެބޭފުޅުން ވިސްނަވާނެ" އަލީދީދީ ވިދާޅުވިއެވެ.
ރައްޔިތުން ވޯޓުލުމަށް ނިންމާއިރު ނިންމަން ވާނީ ގައުމަށް ފައިދާހުރީ ކިހިނެއް ވޯޓްލައިގެންތޯ އާއި ގައުމަށް އެންމެ ފައިދާ ހުރި ގޮތުގައި އެކި ތަފާތު ވިސްނުންތަކާއި އިދިކޮޅު ފަރާތްތަކާއި އެކު ވާހަކަ ދައްކައިގެން ނަތީޖާ ނެރެވޭނޭ ބޭފުޅަކު ހޮއްވެވުމަށް އިސްކަން ދެއްވުމަށް އެނާ ގޮވާލެއްވިއެވެ. އަދި އެފަދަ ޝަހުސިއްޔަތަކީ އިބޫކަމަށް އޭނާ ވިދާޅުވިއެވެ.
