ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީނަށް ތާއިދު ހޯދުމަށް މާލޭގެ ބާޒާރު މައްޗަށް ޕީޕީއެމްގެ ކެމްޕެއިން ޓީމަކުން ނުކުތުމުން، ރައީސް އަބްދުﷲ ޔާމީނަށް އޮތް ނުރުހުމާއި ހިތްހަމަނުޖެހުން ރައްޔިތުން ފާޅުކޮށްފި އެވެ.

ރައީސް ޔާމީނަށް ތާއިދު ހޯދުމަށް ޕީޕީއެމްގެ ކެމްޕެއިން ޓީމަކުން އަޑުގަދަ ކުރާ ބޭނުންކޮށްގެން ބާޒާރުމަތީގައި ހަރަކާތެއް ހިންގާފައި ވަނީ ހޮނިހިރު ދުވަހުގެ ހަވީރުއެވެ. އެމްޕީއެލް ސަރަހައްދުން ފެށިގެން މަސް މާރުކޭޓާ ހަމައަށް ބޮޑުތަކުރުފާނު މަގުގައި ހިންގި އެ ހަރަކާތަށް ރައްޔިތުން އޮތް ނުކުރުން ފެނިގެންދާ ވީޑިއޯތަކެއް ސޯޝަލް މީޑިއާގައި ވަނީ އާންމުވެފައެވެ.

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުން ރައީސް ޔާމީނަށް ތާއިދު ހޯދުމަށް އަޑުގަދަކުރާއެއް ބޭނުންކޮށްގެން ރައީސް އޮފީހުގެ ސްޕޯކްސްޕާސަން އަބްދުﷲ މުއާޒު އަލީ (މުއާ) ވާހަކަ ދައްކަވަމުން ގެންދެވި ވަގުތު ރައީސް ޔާމީނަށް ތާއިދު ނެތް ކަމަށް ބުނެ، އެތަނުގައި ތިބި މީހުން އަޑުއުފުލަމުންދިޔައެވެ. އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)އަށް އޮތް ތާއިދު ހާމަކުރިއެވެ. އަދި އަތުގެ އިޝާރާތުން އިބޫގެ ކެންޑިޑޭޓް ނަމްބަރު ދައްކައި، އެމަނިކުފާނަށް އޮތް، ވަނީ ދައްކާލާފައެވެ.

އެ ވީޑީއޯއާއެކު ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ޓްވީޓު ކުރައްވާފައި ވަނީ ރައްޔިތުން ތިބި ގޮތް ސާފު ކަމަށެވެ.

ޕީޕީއެމުން މީގެ ކުރިން ވެސް ތާއިދު ހޯދުމަށް ހިންގި ދޮރުންދޮރަށް ހަރަކާތާ ގުޅިގެން ވެސް މާލޭގެ ރައްޔިތުން ވަނީ ސަރުކާރަށް އޮތް ނުރުހުން ދައްކާލާފައެވެ.