ފުލުހުންގެ މުވައްސަސާއަކީ ރައްޔިތުންގެ އިތުބާރު އޮތް މުވައްސަސާއަކަށް ހަދާ ފުލުހުންގެ ޔުނިފޯމަށް ލިބިފައިވާ އިއްޒަތް ގުޅިފައިވާ ޕާޓީތަކުގެ ވެރިކަމުގައި ހޯދަދޭނެކަމަށް ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހު (އިބޫ)ގެ ތަރުޖަމާނު މާރިޔާ އަހުމަދުދީދީ ވިދާޅުވެއްޖެއެވެ.
މައްޗަންގޯޅީގައި ހުކުރު ދުވަހުގެރޭ ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ ގުޅިފައިވާ ޕާޓީތަކުގެ ވެރިކަމެއްގައި ގާނޫނުގައި ކަނޑައަޅާފައިވާ ގޮތަށް ކަންކަން ކުރުމަށް ފުރުސަތު ލިބިގެންދާނެ ކަމަށެވެ. އެއްކަމެއް ވަކި ބަޔަކު ކުރީމަ ކުށަކަށްވެފައި އަނެއްބަޔަކު ކުރީމަ ކުށަކަށްނުވާ ވާހަކަ ފުލުހުން ރައްޔިތުންގެ ކައިރީގައި ބުނަންޖެހެނީ ލަދުވެތިކަމާއި އެކުގައި ކަމަށް ވެސް މާރިޔާ ވިދާޅުވިއެވެ.
އެކަމުގެ ސަބަބުން ފުލުހުންނަން ކުރާ އިތުބާރު ގެއްލިގެންދާއިރު، ފުލުހުންނަށް ރައްޔިތުންގެ އިތުބާރު ލިބޭގޮތަށް މަސައްކަތް ކުރުމުގެ މާހައުލެއް ހޯދަދީ، ފުލުހުންގެ ޔުނީފޯމްގެ އިއްޒަތް ފުލުހުންނަން ހޯދަދޭނެ ކަމަށް މާރިޔާ ވިދާޅުވިއެވެ. އަދި ގުޅިފައިވާ ސިޔާސީ ޕާޓީތަކުގެ ޖަލްސާ ޕްރޮމޯޓް ކުރުމަށް އަޑުގަދަ ކުރާ ހަރުކޮށްގެން މާލޭގައި އެކި ސަރަހައްދުތަކުގައި ހުކުރު ދުވަހުގެ ހަވީރު ދުއްވި ޕިކަޕު ޓޯޔާޑަށް ގެންގޮސްފައިވާތީ އެކަމަށް މާރިޔާ ވަރަށް ބޮޑަކަށް ފާޑު ވިދާޅުވިއެވެ.
މާރިޔާ ވިދާޅުޅީ ސުލްހަވެރި ސިޔާސީ ހަރަކާތް ހަމަހަމަކަމާއި އެކު ކޮންމެ ޕާޓީތަކަށް ވެސް ހިންގެންޖެހޭނެ ކަމަށެވެ. އެތަކެއް ދުވަހެއް ފަހުން ކަންމަތީ ބައްދަލުވުންތައް ބޭއްވުމުގެ ފުރުސަތު ލިބިފައިވާކަން ފާހަގަކުރައްވާ މާރިޔާ ވިދާޅުޥި ވީހާވެސް ގިނަ ރައްޔިތުން ހޮނިހިރު ދުވަހުގެ ރޭ ބާއްވާ ޖަލްސާގައި ބައިވެރިވުމަށް އެދޭ ކަމަށެވެ.
މި ބައްދަލުވުމުގައި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އިވާ އަބްދުﷲ އާއި މާލޭ ސިޓީ ކައުންސިލްގެ މޭޔަރު ޝިފާ މުހައްމަދު ބައިވެރިވަޑައިގެންނެވިއިރު، މައްޗަންގޯޅިއަށް ނިސްބަތްވާ ގިނަ އަދަދެއްގެ ރައްޔިތުން ބައިވެރިކަން ފާހަގަކޮށްލެވެއެވެ.
