ވަގު ޑޮލަރު ދައުރުވާތީ ސަމާލުވުމަށް އަންގައިފި
30 އޯގަސްޓު 2018 | ބުރާސްފަތި 20:46އެމްއެމްއޭއިން ބުނީ ރަނގަޅު ފެންވަރެއްގައި ޗާޕުކޮށްފައިވާ 50 ޑޮލަރާއި 100 ޑޮލަރުގެ ވަގު ނޫޓް ފެނިފައިވާ ކަމަށް
މަރުކަޒީ ބޭންކް، އެމްއެމްއޭ
ވަގު ޑޮލަރުގެ ނޫޓްތަކެއް ދައުރުވަމުންދާތީ އެކަމަށް ސަމާލުވުމަށް ރާއްޖޭގައި ހިންގާ ބޭންކްތަކަށް މަރުކަޒީ ބޭންކް، އެމްއެމްއޭއިން އަންގައިފިއެވެ.
ވަގު ޑޮލަރުތަކެއް ދައުރުވާތީ އެމްއެމްއޭއިން ވަނީ ބުދަ ދުވަހު ބޭންކްތަކަށް ސިޓީ ފޮނުވާފައެވެ.
އެމްއެމްއޭގެ މިސިޓީގައި ބުނެފައިވަނީ ވަރަށް ރަނގަޅު ފެންވަރެއްގައި ޗާޕުކޮށްފައިވާ 50 ޑޮލަރާއި 100 ޑޮލަރުގެ ވަގު ނޫޓް ރާއްޖެއިން ފެނިފައިވާ ކަމަށާއި، މިފަދަ ނޫޓުތައް ދެނެގަތުމަށް ޚާއްސަ ސަމާލުކަމެއް ދިނުމަށް އެދޭ ކަމަށެވެ.
މި މައްސަލައާ ގުޅިގެން އެމްއެމްއޭއިން ބުނީ ވަގު ޑޮލަރު ނޫޓުތަކެއް މާބައިވަރު ދައުރު ނުވާ ކަމަށާއި، މަދުން ނަމަވެސް ދައުރުވާ ނަމަ އެކަން ސަމާލުކަމަށް ގެނައުމަކީ އެމްއެމްއޭގެ ޒިންމާއެއް ކަމަށެވެ. އެގޮތުން ބޭންކުތަކުން ސަމާލުވުމަށް އެންގީ ކަމަށް އެމްއެމްއޭއިން މައުލޫމާތުދެއެވެ.
ވަގު ޑޮލަރުގެ ނޫޓެއް ލިބިފައިވާނަމަ އެ ނޫޓެއް ނައްތާލުމަށް އެމްއެމްއޭއާ ހަވާލުކުރުމަށް ވެސް އެ އޮތޯރިޓީން ވަނީ އިލްތިމާސްކޮށްފައެވެ.
