ކަންބޮޑުވުން ހިފައިގެން އީސީއަށް ދިޔަ މީހުން ދުރައްްޖައްސައި، މަގުތައް ވެސް ބަންދުކޮށްފި
24 އޯގަސްޓު 2018 | ހުކުރު 14:22އިސްލާހު ހުށަހަޅަން ދިން މުއްދަތު ކުރުވުމުން ޝަކުވާ ބޮޑު
އީސީގެ މައި ގޭޓް ސަރަހައްދުން މީހުން ދުރަށް ޖައްސައި، ގޭޓް ބަންދު ކުރަނީ
ރީ-ރަޖިސްޓްރޭޝަން މައްސަލާގައި ހުރި ކަންބޮޑުވުންތައް ހިފައިގެން އިލެކްޝަންސް ކޮމިޝަން (އީސީ)ގެ އިންތިހާބާ ބެހޭ މަރުކަޒަށް ދިޔަ މީހުން އެ ސަރަހައްދުން ދުރަށް ޖައްސައި، އެތަނަށް ނުވަދެވޭ ގޮތަށް މަގުތައް ފުލުހުން ބަންދުކޮށްފިއެވެ.
އިންތިހާބާ ބެހޭ މަރުކަޒުގެ ގޮތުގައި ބޭނުންކުރާ ބާޖަމާލުއްދީން، ވަށައިގެންވާ މަގުތައް ފުލުހުން ބަންދުކޮށްފައި ވަނީ ހުކުރު ދުވަހުގެ ހަވީރު 4:30 އެހާކަންހާއިރުއެވެ. ފުލުހުން އެތަން ބަންދު ކުރީ އެ ސަރަހްދަށް މީހުން ޖަމާވެ، ޝަކުވާތައް ކުރުމަށްޓަކާ އިންތިހާބާ ބެހޭ މަރުކަޒަށް ބައެއް މީހުން ވަނުމުންނެވެ.
އިލެކްޝަންސް ކޮމިޝަން ހިމެނޭ ސަރަހައްދުގައި ހަރަކާތްތެރިވި ނޫސްވެރިން ދުރަށް ޖައްސަނީ-- ފޮޓޯ/ މުހައްމަދު ޝަރުހާން
އިންތިހާބާ ބެހޭ މަރުކަޒު ކައިރިއަށް މަދު ބަޔަކު ޖަމާވެފައި ތިއްބާ އެސްއޯ ފުލުހުންނާއި އޮޕަރޭޝަނަލް ޔުނީފޯމް އަޅައިގެން ތިބި ބައެއް ފުލުހުން ވަނީ އެތަނުގައި ތިބި މީހުނާއެކު މީޑިއާ ވެސް އެ ސަރަހައްދުން ދުރައްޖައްސާފައެވެ. އަދި ދުއްވާ އެއްޗެއްސަށް ނުވަދެވޭ ގޮތަށް އެ ސަރަހައްދުގެ މަގުތައް ވެސް ފުލުހުން ބަންދުކުރިއެވެ.
ރީރަޖިސްޓްރޭޝަން މައްސަލާގައި އެ ސަރަހައްދުގައި ހުރެ މީޑިއާއަށް މައުލޫމާތު ދެއްވަމުން، ގުޅިފައިވާ ޕާޓީތަކުގެ ރިޔާސީ ކެންޑިޑޭޓުގެ ސްޕޯކްސްޕާސަން މާރިޔާ އަހުމަދު ދީދީ ވިދާޅުވީ ރީރަޖިސްޓްރޭޝަންގެ ފޯމުތައް ބާތިލު ކުރި މީހުން އަލުން ރަޖިސްޓްރީވުމަށް ހުށަހަޅާފައިވާ މުއްދަތު ކުރު ކަމަށެވެ.
ރީރަޖިސްޓްރޭޝަނާ ގުޅޭ ގޮތުން ހުރި ކަންބޮޑުވުންތައް މާރިޔާ މީޑިއާއަށް ހިއްސާ ކުރައްވަނީ--- ފޮޓޯ/ މުހައްމަދު ޝަރުހާން
އީސީން ބުނީ ބާތިލްކުރި ފޯމުތައް ރައްދުވާ މީހުން އަލުން ރަޖިސްޓަރީވުމަށް ފޯމު ހުށަހަޅަންޖެހޭނީ އަންނަ ހޯމަ ދުވަހުން ފެށިގެން ބުދަ ދުވަހުގެ ނިޔަލަށެވެ. ފޯމު ދޫކުރުމާއި ބަލައިގަންނާނީ ކޮންމެ ދުވަހެއްގެ ވެސް ހެނދުނު 8:00 އިން ހަވީރު 6:00 އަށް ކަމަށް އީސީން ބުންޏެވެ.
ރީރަޖިސްޓްރޭޝަނަށް ހުށަހެޅި ފޯމުތަކުގެ ތެރެއިން ބާތިލުކޮށްފައި ވަނީ 5،626 ފޯމެވެ. އެ ފޯމުތަކެއް ބާތިލުކޮށްފައިވާއިރު، ރަޖިސްޓްރީ ކުރަން ހުށަހަޅާފައި ނުވާ މީހުން ވެސް ރާއްޖެއިން ބޭރަށާއި ރަށްވެހިވެފައިވާ ރަށް ނޫން އެހެން ރަށްރަށަށް ރީރަޖިސްޓްރީކުރި މައްސަލަ ވަނީ ބޮޑުވެފައެވެ. ރީރަޖިސްޓްރޭޝަނަށް ހުޅުވާލި މުއްދަތު ބަންދުވިތާ 13 ދުވަސްވީއިރު ވެސް އެ މައްސައްކަތް އެ ކޮމިޝަނަށް އެއްކޮށް ނިންމާލެވޭ ގޮތެއް ނުވެއެވެ.
