އެންމެ ހިތްގައިމު ސިޔާސަތަކަށް ވެގެން ދާނީ ކައުންސިލްތައް ބާރުވެރިކުރެވުން: ހަސަން ލަތީފް

ކޯލިޝަން ސަރުކާރުގެ އެންމެ ހިތްގައިމު ސިޔާސަތަކަށް ވެގެންދަނީ ކައުންސިލްތައް ބާރުވެރިކުރެވުމުގެ ސިޔާސަތުކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއެްޖެއެވެ.

ގުޅިފައިވާ ސިޔާސީ ޕާޓީތަކުގެ ފަރާތުން ރ. އަލިފުށީގައި ބޭއްވި ކެމްޕެއިން ޖަލްސާގައި ބުރާސްފަތި ދުވަހުގެ ރޭ ވާހަކަފުޅު ދައްކަވަމުން ހަސަން ވިދާޅުވީ، ގަޑުބަޑުކޮށްފައިވާ ލާމަރުކަޒީ ނިޒާމް ހަމައަކަށް އަޅުވާ ކައުންސިލްތަކަށް ފުރިހަމަ ބާރު އެބޭފުޅުންގެ ވެރިކަމުގައި ދެވޭނޭކަމަށެވެ.

Advertisement

އޭނާ ވިދާޅުވީ، ރައްޔިތުންނަށް އެންމެ ގާތުން ޚިދުމަތް ދެވޭނެގޮތް ހެއްދެވުމަށް މިނިސްޓްރީތަކުން މިހާރު ކުރާ މަސައްކަތްތައް ކައުންސިލްތަކުން ކުރަން ފެށުމުން ރައްޔިތުންނަށް އިތުރު ލުއި ފަސޭހަތައް ލިބިގެންދާނޭކަމަށެވެ.

މީގެއިތުރުން ކައުންސިލްތައް ހިންގުމަށް އެ ރަށަކާއި ކައިރީގައި ހުރި ފަޅުތަކާއި ރަށްތަކާއި ފަޅުތަކުން ލިބޭ ފައިދާއިން ބައެއް ކައުންސިލްތައް ހިންގުމަށް ލިބޭނެކަމަށެވެ. އަދި ރަށުގައި ލޯކަލް ޓޫރިޒަމް ފުޅާކޮށް ރަށުގައި ފަތުރުވެރިކަން ކުރާނެގޮތާއި ގުޅޭ ވެބްސައިޓެއް ކައުންސިލުން މެދުވެރިކޮށް ހިންގޭނެގޮތް ހައްދަވާނެކަމަށެވެ. އެގޮތުން ރަށުގެ ކައުންސިލް ވެގެން ދާނީ ފްރަންޓް އޮފީހަށް ކަމަށާއި، އަދި ކައުންސިލްގެ ރައީސް ވެގެން ދާނީ ރަށުގެ ޖެނެރަލް މެނޭޖަރަށް ކަމަށް ހަސަން ވިދާޅުވިއެވެ.

އޭނާ އިތުރަށް ވިދާޅުވީ، މުޅި ރާއްޖޭ ދަތުރުފަތުރުގެ ވިއުގައަކުން ގުޅާލެވޭނެކަމަށާއި، ދަނޑުވެރިކަމުގެ ހަރުދަނާ ސިޔާސަތެއް ގާއިމްކޮށް އެގްރި ބޯޓްތަކަށް ދަނޑުވެރިކަމުން ހައްދާތަކެތި ވަގުތުން ކިރާލާ ވަގުތުން ފައިސާ ލިބޭނެ ނިޒާމެއް ގާއިމް ކުރެވޭނޭކަމަށެވެ. އަދި ދަނޑުވެރިކަން ކުރާ އަންހެން ކަނބަލުންނަށް ޚާއްސައިނާޔަތެއް ލިބޭނެގޮތް ތަނަވަސްކޮށްދެއްވާނެކަމަށް ވެސް އޭނާ ވިދާޅުވިއެވެ.