ބިން ހިއްކުމަށްފަހު ޒަމާންތަކެއް ވަންދެން ގޯތި ދޫނުކޮށް ހުރި ރަށްތަކުން ގޯތި ދޫކުރައްވާނެ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވައުދުވެވަޑައިގެންނެވުމުން، ބިން ހިއްކާފައިވާ ރަށްތަކުން ގޯތި ދޫކުރުމަށް ސަރުކާރުން ކައުންސިލްތަކަށް އަންގައިފިއެވެ.
ހައުސިން މިނިސްޓަރު ޑރ. މުހައްމަދު މުއުއިއްޒު ޕީއެސްއެމަށް ދެއްވި އިންޓަވިއުއެއްގައި ވިދާޅުވީ ބިން ހިއްކާފައިވާ ރަށްތަކުން ގޯތި ދޫކުރުމަށް ކައުންސިލްތަކަށް ސަރުކާރުން އަންގަމުންދާ ކަމަށެވެ. ބިން ހިއްކުމަށްފަހު ވަގުތުން އެއްވެސް ރަށެއްގައި މިހާތަނަށް ސަރުކާރުން ގޯތި ދޫކޮށްފައި ނުވާނެ ކަމަށާއި ބިން ހިއްކާފައިވާ ރަށްތަކުން ގޯތި ދޫކުރެވޭނީ ހިއްކި ބިން ބޭނުން ކުރާނެ ޕްލޭނެއް ހެދުމަށްފަހު ކަމަށް މުއިއްޒު ވިދާޅުވެފައިވެއެވެ.
މިދިޔަ މަހުގެ 28 ވަނަ ދުވަހު ގުޅިފައިވާ ޕާޓީތަކުން ބ. ތުޅާދޫގައި ބޭއްވި ޖަލްސާއެއްގައި ވާހަކަފުޅު ދައްކަވަމުން އިބޫ ވިދާޅުވެފައި ވަނީ ބިން ހިއްކާފައިވާ ރަށްތަކުން ބިން ދޫނުކޮށް ހިފަހައްޓާފައި އޮތް އޮތުން، އެމަނިކުފާނުގެ ވެރިކަމެއްގައި ނިމުމަކަށް ގެންނާނެ ކަމަށެވެ. އެގޮތުން ފުރަތަމަ ހަ މަސް ދުވަހުގެ ތެރޭގައި ލޭންޑު ޔޫސް ޕްލޭން ހަދައި، އެފަދަ ރަށްތަކުން ގޯތި ދޫކުރަން ފަށާނެ ކަމަށް އިބޫ ވައުދުވެވަޑައިގެންފައިވެއެވެ.
ތުޅާދޫގައި އިބޫ އެ ވައުދުވެވަޑައިގެންފައި ވަނީ އެ ރަށުގައި ރައީސް ނަޝީދުގެ ސަރުކާރުން ހިއްކާފައިވާ ބިމުން ގޯތި ދޫނުކޮށް ސަރުކާރުން ހިފަހައްޓާފައިވާތާ ހަތް އަހަރުވެފައިވާތީއެވެ. ރައީސް ނަޝީދުގެ ސަރުކާރުގައި ބިން ހިއްކި ރަށްތަކުގެ ތެރޭގައި ހދ. ކުޅުދުއްފުއްޓާއި ހއ. ދިއްދޫ އާއި ނ. ވެލިދޫ އާއި ޅ. ހިންނަވަރާއި ކ. މާފުށީގެ އިތުރުން ގުޅީފަޅު ވެސް ހިމެނެއެވެ.
