2 މިލިއަން ރުފިޔާގެ މައްސަލަ ކޯޓުން ބޭރުކޮށްލުމުން ރާއްޖެ ޓީވީން ކަންބޮޑުވުން ފާޅުކޮށްފި
ރާއްޖެ ޓީވީ 2 މިލިއަން ރުފިޔާއިން ޖޫރިމަނާކުރި މައްސަލައިގައި ކޮމިޝަނުން އަމަލުކޮށްފައިވަނީ ޝަރުޢީ އަދި ޤާނޫނީ ހަމަތަކާއި ޚިލާފަށްކަމަށް ފާހަގަކުރެވިފައިވޭ
އަބުރުފުޅު ފަންޑަށް މީހުން އެހީވަނީ
އިންސާފުން އެއްކިބާވެ ބްރޯޑްކާސްޓިންގ ކޮމިޝަނުން ރާއްޖެ ޓީވީ ދެ މިލިއަން ރުފިޔާއިން ކުރި ޖޫރިމަނާ ދެެއްކުން މަޑުޖައްސާލުމަށް ސިވިލް ކޯޓަށް ހުށަހެޅި މައްސަލަ ބޭރުކޮށްލުމުން ރާއްޖެ ޓީވީން ކަންބޮޑުވުން ފާޅުކޮށްފި އެވެ.
ރާއްޖެ ޓީވީއިން ބުދަ ދުވަހުގެ ނެރުނު ބަޔާނެއްގައި ބުނީ ބްރޯޑްކާސްޓިންގ ކޮމިޝަނުން ރާއްޖެ ޓީވީ 2 މިލިއަން ރުފިޔާއިން ޖޫރިމަނާކުރި މައްސަލައިގައި އެކޮމިޝަނުން އަމަލުކޮށްފައިވަނީ ޝަރުޢީ އަދި ޤާނޫނީ ހަމަތަކާއި ޚިލާފަށްކަމަށް ކަމަށެވެ. އެހެންކަމުން އެކަމުގައި ބަލަން ޖެހޭ ކަންކަން ބެލުމަށް ނަގާ ވަގުތަކީވެސް ޖޫރިމަނާގެ މުއްދަތުގެ ގޮތުގައި ގުނޭ މުއްދަތަށްވާތީ އެކަމުން ސްޓޭޝަނަށް އިތުރު ގެއްލުންތަކެއް ލިބެމުންދާތީ މިމައްސަލަ އިތުރަށް ބަލައި ނިމެންދެން ޖޫރިމަނާ ދެއްކުން ލަސްކޮށްދިނުމުގެ އަމުރެއް ނެރެދިނުމަށް ހުށަހެޅި މައްސަލަ ބޭރުކޮށްލުމަކީ ސްޓޭޝަނުން ކަންބޮޑުވާ ކަމެއްކަމަށެވެެ.
މި މައްސަލަ ސިވިލް ކޯޓްގެ ރަޖިސްޓްރާ ބަލައި ނުގަނެ، ބޭރުކޮށްލާފައި ވަނީ އަބުރުގެ ގާނޫނުގެ ދަށުން ކުރާ ޖޫރިމަނާއެއްގެ މައްސަލަ އިސްތިއުނާފު ކުރެވޭނީ، ޖޫރިމަނާ ދެއްކުމަށް ފަހު ކަމަށް އެ ގާނޫނުގައި ބުނެފައިވާ މާއްސާއާ ހަވާލާ ދީފަ އެވެ.
ނަމަވެސް، ރާއްޖެ ޓީވީގެ ބަޔާނުގައި ބުނެފައިވަނީ އެމައްސަލައަކީ ޚިޔާލުފާޅުކުރުމާއި އަބުރު ރައްކާތެރިކުރުމާއި ބެހޭ ޤާނޫނުގައި ބުނާ ޖޫރިމަނާ އިސްތިއުނާފުކުރުން ނޫންކަމަށާއި، އެއީ މައްސަލަ ބަލައިފައިވާ ގޮތުން މައްސަލަ އިންސާފުވެރިކަމާއިއެކު ބެލޭނެ ފުރުސަތެއް ތަަނަސްވޭތޯ އާއި، އެފަދަ ގޮތަކަށް މައްސަލަ ބެލެންދެން ޖޫރިމަނާ ދެއްކުން ފަސްކުރުމުގެ އަމުރެއް ހޯދުމަށް ހުށަހެޅި މައްސަލައެއްކަމަށެވެ.
ރާއްޖެ ޓީވީ ޖޫރިމަނާކޮށްފައިވަނީ އެ ސްޓޭޝަނުން ޤާނޫނަކާއި ނުވަތަ ޤަވާޢިދަކާއި ޚިލާފުވެފައިވިނަމަ، އެޚިލާފުވި ގޮތެއް ސާފުކޮށްދިނުމަށް އެދެމުންދަނިކޮށް، ޤާނޫނީ އިޖުރާޢަތްތައް ފުރިހަމަ ނުކޮށް، ސްޓޭޝަނަށް ލިބިދޭން ޖެހޭ ހައްޤުތައް ލިބިނުދީކަމަށް ސްޓޭޝަނުން ބުނާ ބުނުން ވަނީ ތަކުރާރުކޮށްފައެވެ.
ބްރޯޑްކާސްޓިންގ ކޮމިޝަނުން ރާއްޖެ ޓީވީ ޖޫރިމަނާކުރީ މައްސަލައާއި ގުޅޭ ކޮންޓެންޓް ދައްކާފައިވާކަމަށް ރާއްޖެޓީވީއިން އިންކާރުކޮށްފައި ނުވާތީއާއި، ސްޓޭޝަނާއި ދެކޮޅަށް ބެލުނު މައްސަލަ ސާފުކޮށްދިނުމަށް އެދެމުންދިޔައީ މައްސަލަ ސާބިތުވެއްޖެނަމަ އަޅާފާނެ ފިޔަވަޅަކުން ބަރީޢަވުމަށް ކުރަމުން އަންނަ މަސައްކަތެއްގެ ތެރެއިންކަމަށް ބެލެވިގެންކަމަށާއި، މައްސަލަ ނިންމާފައިވަނީ ކޮމިޝަނަށް ލިބުނު މައުލޫމާތެއްގެ މައްޗަށްކަމަށް ކޮމިޝަނުން ވަނީ ބުނެފައެވެ.
"ރާއްޖެ ޓީވީއަށް ގެއްލުން ދިނުމަށް ބްރޯޑްކާސްޓިން ކޮމިޝަނުން ހިންގަމުންދާ އެޖެންޑާގެ ދަށުން ހިތުހުރި ގޮތަކަށް ކަންތައް ކުރަމުން ދަނީ އިންސާފު ހޯދުމަށް ރާއްޖެ ޓީވީއަށް ކުރެވޭނެ ކަމެއް ނޯންނާނެ ކަމަށް އެ ކޮމިޝަނުގައި ތިބި މެމްބަރުންނަށް ފެނިވަޑައިގަންނަވާތީ ކަމަށް ވުމީ އެކަށީގެންވާ ކަމެކެވެ،" ރާއްޖެ ޓީވީގެ ބަޔާނުގައިވެ އެވެ.
ކޮމިޝަންގެ އެފަދަ އަމަލުތަކަކީ ބިރު ދެއްކުމާއި މިނިވަން ނޫސްވެރިކަން ހަލާކުކޮށް ކުރިއަށް އޮތް ރިޔާސީ އިންތީޚާބާ ބެހޭ ގޮތުން ހަގީގީ މައުލޫމާތު ރައްޔިތުންނަށް ލިބެން އޮތް މަގަކީ ރާއްޖެ ޓީވީކަމުގައި ރާއްޖޭގެ ގިނަ ރައްޔިތުން ގަބޫލުރާތީ، އިންތިހާބުގެ ކުރިން ރާއްޖެ ޓީވީ ނައްތާލުމަށް ކުރާ މަސައްކަތެއް ކަމަށް ބެލެވޭ ކަމަށް ވެސް ބަޔާނުގައިވެ އެވެ. އަދި އެއީ އަމިއްލަ ވިޔަފާރިތަކަށް ގެއްލުން ދިނުމަށް ހިންގަމުންދާ ޖަރީމާއެއްގެ ގޮތުގައި ރާއްޖެ ޓީވީން ސިފަކުރެ އެވެ.
މީގެ ކުރިން ރާއްޖެ ޓީވީ ތިން ފަހަރެއްގެ މަތިން 1.7 މިލިއަން ރުފިޔާއިން ޖޫރިމަނާކޮށްފައިވާއިރު، މިހާރުކޮށްފައިވާ ދެ މިލިއަން ރުފިޔާގެ ޖޫރިމަނާ 30 ދުވަހުގެ ތެރޭގައި ދައްކަން ޖެހޭނެ އެވެ. އެ ޖޫރިމަނާ ދެއްކުމަށް ބޭނުންވާ ފައިސާ ހޯދުމަށް ރާއްޖެޓީވީއިން ވަނީ އަބުރުފުޅު ފަންޑުގެ ނަމުގައި ފަންޑެއް ހުޅުވާފައެވެ.
