ދީނީ ގޮތުން ހައްދު ފަހަނައަޅައި ދިއުމުގައި ދިވެހިރާއްޖެ އިސްތިސްނާއެއް ނުވޭ: ޑިފެންސް މިނިސްޓަރު

ދުނިޔޭގެ ހުރިހާ ގައުމެއްގައި ވެސް ދީނީ ގޮތުން ހައްދު ފަހަނައަޅާފައިވާ ވިސްނުން ގެންގުޅޭ މީހުން އުޅޭ ކަމަށާއި އެކަމުގައި ދިވެހިރާއްޖެވެސް އިސްތިސްނާ ނުވާ ކަމަށް ޑިފެންސް މިނިސްޓަރު އާދަމް ޝަރީފް ވިދާޅުވެއްޖެއެވެ.

ނޭޝަނަލް ކައުންޓަ ޓެރަރިޒަމް ސެންޓަރު (އެންސީޓީސީ) އާއި ޔޫއެންޑީޕީ ގުޅިގެން މާލޭގައި ހޯމަ ދުވަހު ފެށި ކައުންޓަ ޓެރަރިޒަމް ކޮންފަރެންސް ޝަރަފުވެރި ކޮށްދެއްވަމުން މިނިސްޓަރު ވިދާޅުވީ މިހާރު ރާއްޖެ އަށް ފެތުރެމުން އަންނަ ދީނީ ގޮތުން ހައްދު ފަހަނައަޅާފައިވާ ވިސްނުންތަކާ ދެކޮޅަށް މަސައްކަތް ކުރަންޖެހޭ ކަމަށެވެ.

Advertisement

މިނިސްޓަރު ވިދާޅުވި ގޮތުގައި ދިވެހިންނަކީ ސުލްޙައަށް ލޯބިކުރާ ބައެކެވެ. ނަމަވެސް އެހެން ގައުމުތަކެކޭ އެއްފަދައިން ރާއްޖެވެސް ހައްދު ފަހަނައަޅާފައިވާ ވިސްނުންތަކާއި ދެކޮޅަށް މަސައްކަތް ކުރަންޖެހޭ ކަމަށް މިނިސްޓަރު ވިދާޅުވިއެވެ. ވޭތުވެ ދިޔަ 10 ވަރަކަށް އަހަރުގެ ތެރޭގައި ދުނިޔެ އަށް އައި ބަދަލުތަކުގެ އަސަރު ރާއްޖެ އަށްވެސް ފޯރާފައިވާ ކަމަށް މިނިސްޓަރު ވިދާޅުވިއެވެ. އެ ގޮތުން، ދީނީ ގޮތުން ހައްދު ފަހަނައަޅާފައިވާ ވިސްނުންތަކުގެ ސަބަބުން ދީނީ ހަރުކަށި ޚިޔާލުގެ މީހުންތަކެއް ރާއްޖޭގައި އުފެދިފައިވާ ކަމަށް މިނިސްޓަރު ވިދާޅުވިއެވެ.

"ދުނިޔޭގެ އެއްވެސް ގައުމަކީ ޓެރަރިޒަމާއި ހަރުކަށި ހައްދުފަހަނަ އެޅުންތަކުން ސަލާމަތްވެފައިވާ ގައުމެއް ނޫން. މި ކަމުގައި ދިވެހިރާއްޖެ ވެސް އިސްތިސްނާއެއް ނުވޭ،" އާދަމް ޝަރީފް ވިދާޅުވި އެވެ.

މީގެ އިތުރުން މިނިސްޓަރު ވިދާޅުވީ އެމެރިކާގެ "ވޯލްޑް ޓްރޭޑް ސެންޓަރ" އަށް ދިން ޙަމަލާއާ ސަބަބުން ދުނިޔޭގެ ސަލާމަތީ ކަންތަކަށް ވަރަށް ބޮޑަށް އަސަރު ކުރި ކަމަށެވެ.

މިނިސްޓަރު ވިދާޅުވީ އެ ހާދިސާގެ ފަހުން ބައިނަލްއަޤްވާމީ ފެންވަރުގައި ޓެރަރިޒަމާ ދެކޮޅަށް މަސައްކަތްކުރާ ކަމަށާއި ރާއްޖެވެސް ގައުމީ އަދި ބައިނަލްއަގްވާމީ ފެންވަރުގައި ޓެރަރިޒަމާ ދެކޮޅަށް މަސައްކަތް ކުރާ ކަމަށް މިނިސްޓަރު ވިދާޅުވިއެވެ.

ރައީސް އަބްދުﷲ ޔާމީންގެ ޒަޢާމަތުގައި ސަރުކާރުން ކަނޑައަޅާފައިވާ ސިޔާސަތަކީ 100 ޕަސެންޓް މުސްލިމް އަދި މެދުމިނުގެ އިސްލާމީ ގައުމެއްގެ ގޮތުގައި ދިވެހިރާއްޖެ ދެމިއޮތުން ކަމަށްވެސް މިނިސްޓަރު ވިދާޅުވިއެވެ.

"މި ކަމުގައި ދިވެހިރާއްޖެ ވެސް އިސްތިސްނާއެއް ނުވޭ. އެހެންކަމުން، ރައީސް އަބްދުﷲ ޔާމީންގެ ޒައާމަތުގައި ދިވެހި ސަރުކާރުން ކަނޑައަޅާފައިވާ ސިޔާސަތަކީ، 100 ޕަސެންޓް މުސްލިމް އަދި މެދުމިނުގެ އިސްލާމީ ގައުމެއްގެ ގޮތުގައި ދިވެހިރާއްޖެ ދެމިއޮތުން،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި ދިވެހިރާއްޖެ ދެމި އޮންނާނީ މެދުމިނުގެ ތަރައްގީ އަށް މަސައްކަތްކުރާ، ކަންކަން ތަހައްމަލު ކުރާ ސުލްހަވެރި މުސްލިމް ގައުމެއްގެ ގޮތުގައެވެ. އަދި ދިވެހިން ގަބޫލުކުރާ ގަބޫލުކުރުމަކީ ހައްދު ފަހަނައަޅާފައިވާ ހަރުކަށި ފިކުރުތަކާ ދެކޮޅަށް މަސައްކަތް ކުރުމުގައި ގެންގުޅޭ ގައުމީ ސްޓްރެޓީޖީގެ ތަސައްވުރު ކަމަށް މިނިސްޓަރު ވިދާޅުވިއެވެ.