ކޯސްޓްލައިން ފައުންޑޭޝަނުން އިސްނަގައިގެން ރާއްޖޭގައި ތަރައްގީ ކުރި އެންމެ ބޮޑު ޓެކްނިކަލް އެންޑް ވޮކޭޝަން ސެންޓަރ (ޓިވެކް) ހުޅުވައިފިއެވެ.
ބ. ކިހާދޫގައި ތަރައްގީ ކުރެވިފައިވާ މި ވޮކޭޝަނަލް ސެންޓުގައި 12 އަތޮޅެއްގެ 31 ރަށަކުން 50 ކުއްޖެއް އަންނަނީ އެކި ދާއިރާތަކުން ވޮކޭޝަން ތައުލީމު އެ ސަންޓަރުން ހާސިލު ކުރަމުންނެވެ.
ސެންޓަރު ހުޅުވުމުގެ ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރ ޑރ. އައިޝަތު ޝިހާމު ވިދާޅުވީ، ޒުވާނުންނަކީ އިގްތިސާދު ކުރިއަށްގެންދިއުމަށް ބޭނުންވާ ހަކަތަ ކަމުގައިވާ އިރު ޒުވާނުން ވާންޖެހޭނީ ހުނަރުވެރި، ވަތަނީ ރޫހުހުރި ކެރޭ ބަޔަކަށް ކަމަށެވެ. އަދި ޒުވާނުންނަކީ ހީވާގި ބަޔަކަށް ހެދުމައްޓަކާވެސް ވަޒީފާއަދާ ކުރާ އިރު ތަމްރީނުގެ ފުރުސަތުތައް ހުންނަންޖެހޭނެކަމަށް މިނިސްޓަރު ވިދާޅުވި އެވެ.
"ބ .އަތޮޅަކީ ރާއްޖޭގައި ހިންގަމުންދާ އެންމެ މަތީ ފެންވަރުގެ ރިސޯޓުތައް ހިންގަމުންދާ އަތޮޅު. މީގެ އިތުރުން ބ އަތޮޅުގެ ބަޔޮސްފިއަރ ރިޒާވާއެކު ފަތުރުވެރިންނާއި އިންވެސްޓަރުންގެ ހާއްސަ ޝައުގުވެރިކަމެއް ވަނީ ލިބިފައި. މި ބޮޑު އިންވެސްޓްމެންޓްތަކާ އެކު އެތަށް ހާސް ވަޒީފާގެ ފުރުސަތުތައްވެސް ފަހިވެގެންދާނެ. އިންވެސްޓަރުންނާއި ރިސޯޓުތައް ހިންގާފަރާތްތަކެއްގެ ކަންބޮޑުވުމަކަށްވެފައިވަނީ މިހާރުވެސް އުފެއްދިފައިވާ ވަޒީފާތަކަށް ބޭނުންވާ ފަންނުވެރި ޒުވާނުން ލިބުމުގެ ދަތިކަން." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ކޯސްޓްލައިނު ފައުންޑޭޝަނުން އިންސާނީ ވަސީލަތްތައް ބިނާ ކުރުމަށް މި ފެށި މަސައްކަތަކީ ހުނަރުވެރި އަދި ފަންނުވެރި ޒުވާނުން އިތުރު ކުރުމަށް އެޅިގެންދިޔަ މުހިއްމު ބިންގަލެއް ކަމަށެވެ.
ޓެކްނިކަލް އެންޑް ވޮކޭޝަން ސެންޓަރާއި ގުޅޭގޮތުން އެ ސެންޓަރުގެ އެގްޒެކެޓިވް ޑިރެކްޓަރ މުހައްމަދު ނަޒީފު ވިދާޅުވީ، މިއީ ޒުވާނުންނަށް ޓެކްނިކަލް އަދި ވޮކޭޝަނަލް ދާއިރާއިން ފަސޭހަކަމާއެކު ވަޒީފާގެ ފުރުސަތުތައް ފަހިކޮށްދިނުމުގެ ގޮތުން ހުޅުވިފައިވާ ސެންޓަރެއް ކަމަށެވެ. އަދި މިދާއިރާއަށް ނުކުންނަ ކުދިންނަކީ އަދާ ކުރާ ވަޒީފާއަށް ހުނަރުވެރި ކުރަންޖެހޭ ކަންކަން ދަންނަ ކުދިންނަށް ހެދިގެންދާނެ ކަމަށް އޭނާ ވިދާޅުވިއެވެ.
މި ސެންޓަރުގައި މިހާރު ކުރިއަށްދަނީ ސެޓްފިކެޓް ލެވެލް ތިނެއްގެ ކޯސްތަކެވެ. ކޯސްތަކަށް 18 މަސް ދުވަސް ނަގާ އިރު އިންޖީނު މަރާމާތު ކުރުމުގެ ކޯހަކާއި އިލެކްޓްރިކް ޕްރޮގްރާމައި ޕްލަބިންގ ކޯހެއްގެ އިތުރުން ރެފްރިޖިރޭޝަން އާއި އެއަރކޮންޑިޝަނިންގ ޕްރޮގްރާމެއް ހިމެނެއެވެ.
"މިތަނުން ކިޔަވާ ކުދިންނަށް ވަޒީފާގެ ތަޖުރިބާ ހޯދުމަށް ފުރުސަތު ލިބޭނެ. މިހާރު ކިޔަވަމުންދާ ކުދިންނަށް އޮކްޓޫބަރު 30 ހިސާބުގައި ގްރެޖުއޭޝަން އޮންނާނެ. މިކޯހުގައި ބައިވެރިވާ ކުދިން ސްޕޮންސަރ ކޮށްފައިވަނީ ކޯސްޓްލައިން ފައުންޑޭޝަންގެ ފަރާތުން، ހުރިހާ ކުދިންވެސް." ނަޒީފް ވިދާޅުވިއެވެ.
އެންމެ ފުރަތަމަ މި ކޯސްތައް އަމާޒު ކުރަނީ މަދަރުސީ ތައުލީމުގެ ތެރެއިން ކިޔެވުމުގެ ފުރުސަތު ނުލިބޭ ކުދިންނަށް ކަމަށާއި މިފަދަ މަސައްކަތް ކުރާ، ވަޒީފާގެ މާހައުލުގައި އުޅުނު ނަމަވެސް ސެޓްފިކެޓް ނެތް ފަރާތްތަކަށް ކަމަށެވެ.
ގާތްގަނޑަކަށް އާބާދީގައި 400 މީހުން ދިރިއުޅޭ ކިހާދޫގައި ގާއިމް ކުރެވިފައިވާ ޓެކްނިކަލް އަދި ވޮކޭޝަން ސެންޓަރުގައި ގާތްގަނޑަކަށް 50 ވަރަކަށް މުވައްޒަފުން ވަޒީފާ އަދާކުރަމުންދާ އިރު އޭގެ ތެރެއިންވެސް ގިނަ ވަޒީފާތަކުގައި އުޅެނީ އެރަށުގެ ފަރާތްތަކެވެ. އެ ސެންޓަރުގައި ކިޔަވާ ކުދިންނަށް އެކޮމޮޑޭޝަން ބްލޮކެއް ގާއިމް ކުރެވިފައިވާ އިރު އެކުދިންގެ ކެއުމާ އެނޫން ހުރިހާ ކަމެއްވެސް ހަމަޖައްސައިދެނީ އެސެންޓަރުންނެވެ. ދެ ލައްކައަށް އަކަފޫޓަށް ވުރެ ބޮޑު ސަރަހައްދެއްގެ ބިމެއްގައި މި ސެންޓަރު ގާއިމް ކުރެވިފައިވާ އިރު ކޯސްޓްލައިންގެ އަމާޒަކީ އެ ސެންޓަރުން 200 ކުދިންނަށް ކިޔެވުމުގެ އިންތިޒާމު ހަމަޖެއްސައިދިނުމެވެ.
