ބޮޑެތި ބަލިތަކަށް ފަރުވާ ހޯދުމަށް ސަލާންޖެހުން ހުއްޓުވާނަން: އިބޫ
7 އޯގަސްޓު 2018 | އަންގާރަ 18:18އިންފްލޭޝަނާ އެކު ދުވަސްވީ މީހުންނަށް ދޭ އިނާޔަތަށް ވެސް ހެޔޮ ބަދަލެއް ގެނައުމުގެ މަސައްކަތް ކުރާ ކަމަށް ވިދާޅުވި
އިދިކޮޅު ރިޔާސީ ކެންޑިޑޭޓް އިބްރާހިމް މުހަައްމަދު ސޯލިހް
ބޮޑެތި ބަލިތަކަށް ފަރުވާ ހޯދުމަށް ސަލާންޖެހުން ހުއްޓުވާނެ ކަމަށް އިދިކޮޅު ރިޔާސީ ކެންޑިޑޭޓް އިބްރާހިމް މުހަައްމަދު ސޯލިހް ވިދާޅުވެއްޖެއެވެ.
ލ. ގަމުގައި ގުޅިފައިވާ ޕާޓީތަކުން ބޭއްވި ކެމްޕެއިންގެ ބޮޑު ޖަލްސާގައި ވާހަކަ ދައްކަވަމުން އިބޫ ވިދާޅުވީ އެ ބޭފުޅުންގެ ވެރިކަމެއްގައި ތަކެތީގެ އަގުތަކަށް ނުވަތަ އިންފްލޭޝަނަށް އަންނަ ބަދަލާ އެކު ދުވަސްވީ މީހުންނަށާއި އަދި ދައުލަތުންދޭ އެހެނިހެން އިނާޔަތްތަކަށް ވެސް ހެޔޮ ބަދަލެއް ގެނައުމުގެ މަސައްކަތް މިހާރު ވެސް ކުރައްވަމުން ގެންދަވާ ކަމަށެވެ.
އިބޫ ވިދާޅުވީ، މިހާރު ވެސް ދުވަސްވީ މީހުންނަށް ދެމުންގެންދާ 5،000ރ. ގެ އިނާޔަަތަށް އުނިކަމެއް ނުގެންނާނެކަމުގެ ޔަގީންކަން ދެއްވާ ކަމަށެވެ. އަދި މިހާރަށް ވުރެ ހެޔޮ ބަދަލެއް ގެނެވޭތޯ އެބޭފުޅުންގެ ސިޔާސަތުތައް އެކުލަވާލާ ކޮމިޓީން މަަަސައްކަތް ކުރަމުންދާ ކަމަށެވެ.
މިހާރު ބޮޑެތި ބަލިތަކަށް ފަރުވާ ހޯދުމަށް ރައްޔިތުން ސަލާން ޖަހާ ޖެހުން ހުއްޓުވާނެ ކަމަށް އިބޫ ވައުދުވެވަޑައިގެންނެވިއެވެ. އަދި އެމީހުންނަށް ސަރުކާރުން އެހީތެރިކަން ފޯރުކޮށްދެއްވާނެ ކަމަށް ވެސް އިބޫ ވިދާޅުވިއެވެ.
"ބޮޑެތި ބަލިތަކަށް ފަރުވާ ހޯދުމަށް ފަންޑުފޮށި ބަަހައްޓައިގެން ސަލާންޖެހައިގެން ފައިސާ ހޯދުމުގެ ސަގާފަތް އަޅުގަނޑުމެން ނައްތާލާނަން،" އިބޫ ވިދާޅުވިއެެވެ.
ކެމްޕެއިންގެ މި ދަތުރުފުޅުގައި ބައެއް ރަށްތަކަށް ވަޑައިގެން ރާއްޖޭގައި މިހާރު އޮތް ސިއްހީ ނިޒާމަށް މިހާރަށް ވުރެ ހެޔޮ ބަދަލެެއް ގެެންނަވާނެ ކަމަށް އިބޫ ވަނީ ވިދާޅުވެފައެވެ.
އިބޫ މިހެން ވިދާޅުވެފައިވާ އިރު، ރާއްޖެއިން ފަރުވާކުރެވެން ނެތް ބޮޑެތި އެތަށް ބަލިތަކަށް ފަރުވާ ހޯދުމަށް ސޯޝަލް މީޑިއާގެ އެކި ވަސީލަތްތައް ބޭނުންކޮށްގެން އެތައް ދިވެހިންނެއް ދަނީ އަދޭސްކުރަމުންނެވެ. އަދި ބައެއް ފަރާތްތަކަށް ފައިސާގެ ދަތިކަން ދިމާވެ، ރާއްޖެއިން ބޭރަށް ފުރޭނެ ގޮތެއް ނެތި ދުނިޔޭ ދޫކޮށްފައި ވެސް އެބަހުއްޓެވެ.
