މަރުގެ ބޮޑު މައްސަލައެއްގެ ދައުވާ ލިބޭ މީހަކު ގޭ ބަންދަށް ބަދަލު ކުރަން އަމުރުކޮށްފި
އަމުރު ކުރެއްވީ ގާޒީ ނަޖީބު
ސެޕްޓެމްބަރު 29، 2017،ގައި ހުޅުމާލޭގައި ވަޅިން ހަމަލާދީ މަރާލި ގއ. ދާންދޫ ގޯލްޑްލީފް ހާރިސް އަބްދުލްޣަފޫރު: ދޫކޮށްލާފައި ވަނީ އޭނާގެ މަރުގެ މައްސަލާގައި ހިމެނޭ މީހެއް
ގިނަ އަދަދެއްގެ ސިއްރު ހެކިން ހިމެނޭ ބޮޑު މަރުގެ މައްސަލައެއްގެ ދައުވާ ލިބޭ ޏ. ފުވައްމުލައް، ހިލްޓަން ޔާމިން ރަޝީދު ގޭ ބަންދަށް ބަދަލު ކުރަން ކްރިމިނަލް ކޯޓުން އަމުރުކޮޮށްފިއެވެ.
އޭނާ ގޭ ބަންދަށް ބަދަލު ކުރަން އަމުރު ކުރީ ކްރިމިނަލް ކޯޓުގެ ގާޒީ ހަސަން ނަޖީބެވެ. މިއަހަރުގެ އެޕްރީލް މަހު ކްރިމިނަލް ކޯޓުގެ ގާޒީ ކަމަށް އައްޔަން ކުރެއްވި ގާޒީ ނަޖީބު ވަނީ ފުވައްމުލަކުގައި ހިންގި ބޮޑު މާރާމާރީއަކާ ގުޅިގެން، ޝަރީއަތް ނިމެންދެން ބަންދުކޮށްފައި ތިބި 12 ޒުވާނަކު މިއަހަރުގެ މެއި މަހު ދޫކޮށްލާފައެވެ.
ރައީސް މައުމޫން އަބްދުލް ގައްޔޫމް ޖަލަށްލުމަށް ހުކުމްވެސް ކުރެއްވި ގާޒީ ނަޖީބު، ގޭ ބަންދަށް ދޫކުރި ޔާމިން ރަޝީދަކީ މިދިޔަ އަހަރުގެ ސެޕްޓެމްބަރު މަހުގެ 29 ވަނަ ދުވަހުގެ ރޭ ހުޅުމާލޭގައި ވަޅިން ހަމަލާދީ ގއ. ދާންދޫ ގޯލްޑްލީފް ހާރިސް އަބްދުލްޣަފޫރު މަރާލިކަމުގެ ދައުވާ ލިބޭ ޒުވާނެކެވެ.
ޔާމީން ރަޝީދު ދޫކޮށްލަން ކްރިމިނަލް އަމުރު ކުރީ އޭނާގެ މައްޗަށް އުފުލާފައިވާ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާއާ ގުޅިގެން އަންގާރަ ދުވަހުގެ ހެނދުނު ބޭއްވި އަޑުއެހުމުގައި، ދިފާއީ ވަކީލު ފާހަގަ ކުރެއްވި ކަންތައްތަކާ ގުޅިގެންނެވެ. އޭނާގެ ވަކީލު ވިދާޅުވީ 2015 ވަނަ އަހަރު ހިންގި ގްރޫޕް މާރާމާރީއެއްގައި ލިބުނު އަނިޔާތަކުގައި "ގޮހޮރު ތޮރުފިފައިވާ" ކަމަށާއި ވާތް ފަރާތު ކީޑްނީއަށާއި ޕެންކްރިއަސްއަށް ގެއްލުންތަކެއްވެފައިވާ ކަމަށެވެ. އެކަމާ ގުޅިގެން ގިނަ ދުވަސްތަކެއް ވަންދެން ޔާމިންއަށް ފަރުވާ ދޭން ޖެހުނު ކަމަށާއި ނަމަވެސް އެކަމުގެ ވޭން އަދިވެސް އޭނާ ތަހަންމަލް ކުރަމުންދާ ކަމަށް ވަކީލު ވިދާޅުވިއެވެ.
ރައްދުގައި އޭނާގެ ހާލު ރަނގަޅު ކަމަށް ފާހަގަކޮށް، ޕްރޮސެކިއުޓާ ޖެނަރަލް (ޕީޖީ) އޮފީހުގެ ވަކީލު ވިދާޅުވީ އޭނާގެ ސިއްހީ ހާލަތާ ގުޅިގެން، ވަކި ކަހަލަ މާހައުލެއްގައި ޔާމީން ރަޝީދު ދިރިއުޅެން ޑޮކްޓަރުން ލަފާދީފައި ނުވާ ކަމަށެވެ. އަދި އޭނާގެ މައްޗަށް ތުހުމަތު ކުރާ މައްސަލައަކީ ގިނަ އަދަދެއްގެ ސިއްރު ހެކިން ހިމެނޭ ބޮޑު މައްސަލައަކަށް ވާއިރު ޔާމިން ދޫކޮށްލައިފި ނަމަ ހެއްކަށް ނުފޫޒު ފޯރާފާނެ ކަމަށް ދައުލަތުން ވަނީ ބުނެފައެވެ.
މަރުގެ ދައުވާ ލިބޭ ޔާމީން ބަންދުން ދޫކޮށްލައިފި ނަމަ މުޖްތަމައުއަށް ނުރައްކާ ވެދާނެ ކަމަށް ވެސް އާންމުކޮށް ހުޅުވާލައިގެން ބޭއްވި ކްރިމިނަލް ކޯޓުގެ އަޑުއެހުމުގައި ދައުލަތުގެ ވަކީލު ވިދާޅުވިއެވެ.
ނަމަވެސް ގާޒީ ނަޖީބު ނިންމެވީ މައްސަލައިގެ ޝަރީއަތް ނިމެންދެން ޔާމިން ގޭބަންދަށް ދޫކޮށްލުމަށެވެ.
