ރައްޔިތުންގެ މަޖިލީހުގެ ކޮމެޓީތަކުން ދިރާސާކޮށް ނިންމައި، މަޖިލީހުގެ ތަޅުމަށް ހުށަހަޅާ ބިލުތަކަށް ބަދަލު ގެނައުމާ ގުޅޭ ގޮތުން ރައްޔިތުންގެ މަޖިލީހުގެ ގަވާއިދުގައި ވާ މާއްދާއަކަށް ބަދަލު ގެނައުމަށް އިސްލާހެއް ހުށަހަޅައިފިއެވެ.
މަޖިލީހުގެ އާންމު ކޮމެޓީން އިސްލާހު ހުށަހަޅާފައި ވަނީ ކޮމެޓީން ދިރާސާކޮށް ނިންމައި މަޖިލީހުގެ ތަޅުމަށް ފޮނުވާ، ބިލެއް އިތުރަށް އިސްލާހު ކުރުމާ ގުޅޭ ގޮތުން ބަޔާންކުރާ މާއްދާއަށް ބަދަލު ގެނައުމަށެވެ. އެގޮތުން މަޖިލީހުގެ ގަވާއިދުގެ 89 ވަނަ މާއްދާއަށް ހުށަހަޅާފައިވާ އިސްލާހުގައި ބުނެފައި ވަނީ އިތުރަށް ބިލަށް ގެންނަންޖެހޭ ބަދަލަކީ ލިޔުމުގެ ކުށެއް ނަމަ، ނުވަތަ ބަލަންވީ ވަރަށް ނުބެލުމުގެ ސަބަބުން އުނިވެފައިވާ ކަމެއް ރަނގަޅު ކުރުން ކަމަށްވާ ނަމަ، ކޮމެޓީއަކަށް ފޮނުވުމުގެ ބަދަލުގައި މަޖިލީހުގައި އެކަމެއް އިސްލާހުކޮށް ރަނގަޅު ކުރަންޖެހޭ ކަމެއް ވެސް މަޖިލީހުގައި ރަނގަޅު ކުރެވިދާނެ ކަމަށެވެ.
ނަމަވެސް މިހާރު އަމަލު ކުރަމުންދާ މަޖިލީހުގެ ގަވާއިދުގެ 89 ވަނަ މާއްދާގައި ބުނެފައި ވަނީ އެފަދަ ކަމެއް ކުރަން ޖެހޭނީ ބިލުގެ ތިން ވަނަ ކިޔުން މަޖިލީހަށް އިއްވުމުގެ ކުރިން ކަމަށެވެ. ތިން ވަނަ ކިޔުން އިއްވާނީ ކޮމެޓީން މަޖިލީހުގެ ތަޅުމަށް ހުށަހަޅާ ބިލަށް ބަހުސްކޮށް ނިންމުމުންނެވެ. ތިން ވަނަ ކިޔުން ރިޔާސަތުން އިއްވާނީ ބިލެއް މަޖިލީހުން ފާސްކުރަން ވޯޓަށް އެހުމުގެ ކުރިންނެވެ.
ނަމަވެސް ސަރުކާރު ހިންގާ ޕާޓީ، ޕީޕީއެމްގެ މެޖޯރިޓީ އޮންނަ އާންމު ކޮމެޓީން ފާސްކުރި އިސްލާހުގައި ތިން ވަނަ ކިޔުމުގެ ކުރިން، ބިލަށް ބަދަލެއް ގެންނަން ޖެހޭނެ ކަމަށް ބުނާ ބައި ވަނީ އުނިކޮށްފައެވެ. އެ ބައި އުނިކުރި ސަބަބެއް ޕީޕީއެމަކުން ހާމައެއް ނުކުރެއެވެ.
ކެލާ ދާއިރާގެ މެމްބަރު އަލީ އާރިފު މުގައްރަރުކަން ކުރައްވާ އެ ކޮމެޓީން އެ އިސްލާހު ހުށަހަޅައި ފާސްކޮށްފައި ވަނީ އަންގާރަ ދުވަހު ބޭއްވި އެ ކޮމެޓީގެ ބައްދަލުވުމުގައެވެ. އެ އިސްލާހު ފާސްކުރުމަށް ބުދަ ދުވަހު ބާއްވާ ޖަލްސާއަށް ވަނީ އެޖެންޑާކޮށްފައެވެ.
ޕީޕީއެމުން ބޭނުންވެގެން، މަޖިލީހުގެ ގަވާއިދަށް އާ އިސްލާހުތަކެއް ހުށަހަޅާފައި ވަނީ ރިޝްވަތުގެ ކުށް ގާނޫނުލް އުގޫބާތުން އުވާލެވޭ ގޮތަށް ބިލެއް ހުށަހެޅުނު މައްސަލައެއް ފެންމަތިވެފައި ވަނިކޮށެވެ. އެ މައްސަލަ ފެންމަތިވުމުގެ ރިޝްވަތުގެ ކުށް ހިމަނައިގެން އާ ބިލެއް މަޖިލީހަށް ވަނީ ވައްދާފައެވެ.
ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ވިދާޅުވެފައި ވަނީ އެއް ގާނޫނަކަށް ހުށަހެޅީ އެ ދެ ބިލު ފާސްވެގެންދާނީ އެއް ބިލެއްގެ ގޮތުގައި ކަމަށެވެ. އެހެންކަމުން ރައްޔިތުންގެ މަޖިލީހުގެ ކޮމެޓީތަކުން ދިރާސާކޮށް ނިންމައި، މަޖިލީހުގެ ތަޅުމަށް ހުށަހަޅާ ބިލުތަކަށް ބަދަލު ގެނައުމާ ގުޅޭ ގޮތުން ރައްޔިތުންގެ މަޖިލީހުގެ ގަވާއިދުގައި ވާ މާއްދާއަކަށް ބަދަލު ގެނައުމަށް އިސްލާހެއް ގެނައުމަށް ނިންމާފައި މި ވަނީ މި ކަމަށް ފުރުސަތު ދިނުމުގެ ގޮތުން ކަމަށް ބެލެވެއެވެ.
