ރިޝްވަތު ހުށެހެޅުމުގެ ކުށް އުވާލަނީ އެފަދަ އަމަލުތައް ހިންގުމަށް މަގުފަހިކުރުމަށް: ޓްރާންސްޕޭރެންސީ
31 ޖުލައި 2018 | އަންގާރަ 15:04ރިޝްވަތުގެ ކުށް ގާނޫނުލް އުގޫބާތުގައި ބަޔާން ކުރާ މާއްދާ، ކޯޓުގެ ހުރުމަތް ކެނޑުމާ ގުޅޭ މާއްދާއަކަށް ބަދަލު ކުރުމަށް ވަނީ ހުށަހަޅާފަ
ޓްރާންސްޕޭރެންސީން ބޭއްވި ޕެނަލްއެއް
ދައުލަތުގެ މުވައްޒަފުން ރިޝްވަތު ހިފުމާއި ދައުލަތުގެ މުވައްޒަފުންނަށް ރިޝްވަތު ހުށެހެޅުމުގެ ކުށް ގާނޫނުލް އުގޫބާތުން އުވާލަން ހުށަހެޅި ހުށަހެޅުމަކީ ކޮރަޕްޝަންގެ އަމަލު ހިންގުމަށް މަގުފަހި ކޮށްދީ އެފަދަ އަމަލުތައް ކުރާ ކުށްވެރިން ހިމާޔަތްކޮށްދޭން އެހީވެދޭނެ ފިޔަވަޅެއްކަމަށް ޓްރާންސްޕޭރެންސީ މޯލްޑިވްސް އިން އަންގާރަ ދުވަހު ބުނެފިއެވެ.
ރިޝްވަތު ހިފުމަކީ ކުށެއް ކަމަށް ގާނޫނުލް އުގޫބާތުގައި ކަނޑައަޅާފައިވާ މާއްދާ އުވާލެވޭ ގޮތަށް ސަރުކާރު ހިންގާ ޕާޓީ، ޕީޕީއެމްގެ ފަރާތުން ބިލް ހުށަހެޅުއްވީ ފޭދޫ ދާއިރާގެ މެމްބަރު އިބްރާހިމް ދީދީއެވެ.
މި މަހުގެ 10 ވަނަ ދުވަހު މަޖިލީހަށް ހުށަހެޅުއްވި އެ ބިލު މިހާރުވަނީ ގައުމީ ސަލާމަތާ ބެހޭ ކޮމިޓީއިން ދިރާސާކޮށް ނިންމައި، ފާސްކުރުމަށް ތަޅުމަށް ފޮނުވާފައެވެ.
ބިލުގައި ބުނެފައިވާ ގޮތުން، ރިޝްވަތުގެ ކުށް ގާނޫނުލް އުގޫބާތުގައި ބަޔާން ކުރާ މާއްދާ، ކޯޓުގެ ހުރުމަތް ކެނޑުމާ ގުޅޭ މާއްދާއަކަށް ބަދަލު ކުރުމަށް ވަނީ ހުށަހަޅާފައެވެ. ގާނޫނުލް އުގޫބާތުގައި ރިޝްވަތުގެ ކުށާ ގުޅޭ ގޮތުން ބަޔާން ކުރާ މާއްދާއަކީ 510 ވަނަ މާއްދާއެވެ. ނަމަވެސް ކޯޓުގެ ހުރުމަތް ކެނޑުމާ ގުޅޭ އަދަބު ބަޔާން ކުރާ މާއްދާއަކަށް އެ މާއްދާ ހަދައިފިނަމަ، ރިޝްވަތުގެ ކުށް ގާނޫނުލް އުގޫބާތުން އުވިގެންދާނެއެވެ.
"ދައުލަތުގެ މުވައްޒަފުން ރިޝްވަތު ހިފުމާ ދިނުން ގާނޫނުލް އުގޫބާތުން އުނި ކުރުމުގެ ނަތީޖާއަކީ ދައުލަތުގެ މުވައްޒަފުންނަށް ރިޝްވަތު ދިނުމާ ހިފުން ކުށަކަށް ނުވުން" ޓްރާންސްޕޭރެންސީ މޯލްޑިވްސްގެ ބަޔާނުގައި ބުނެފައިވެއެވެ.
ޓްރާންސްޕޭރެންސީ މޯލްޑިވްސްއިން ބުނީ ގާނޫނުލް އުގޫބާތުގެ 510 ވަނަ މާއްދާއަކީ ދައުލަތުގެ މަގާމުތަކުގައި ތިބޭ މީހުން ރިޝްވަތު ދިނުމާއި ހިފުމުގެ ކުށް ކަނޑައެޅުމުގެ މާއްދާކަމަށްވާއިރު އެ މާއްދާގެ އަސްލު ގެއްލޭ ގޮތަށް ގާނޫނުލް އުގޫބާތައް ކޯޓުގެ ހުރުމަތް ކެނޑުން ކަމުގައި ކަޑައެޅުމުން، ދައުލަތުގެ މުވައްޒަފުން ރިޝްވަތު ހިފުމާއި ދިނުމުގެ އަމަލަކީ ގާނޫނުލް އުގޫބާތުގައި ޖިނާއީ ކުށެއްގެ ގޮތުގައި ނުބެލެވޭނެކަމަށެވެ.
ރިޝްވަތުގެ ކުށް ގާނޫނުލް އުގޫބާތުން އުވާލުމަށް ސަރުކާރުން މަޖިލީހަށް ބިލު ހުށަހެޅި މައްސަލައާ ގުޅޭ ގޮތުން ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ރާއްޖެއެމްވީއަށް ވިދާޅުވީ އެ ބިލުގައި މައްސަލަތަކެއް ހުރިކަން ފާހަގަ ކުރެވިފައިވާ ކަމަށެވެ. އެ މައްސަލަތަކާ ގުޅޭ ގޮތުން މަޝްވަރާ ކުރުމަށްޓަކައި، އެ ބިލުގެ މަސައްކަތް މަޖިލީހުގެ ތެރެއިން މަޑުޖައްސާލާފައިވާ ކަމަށް ވެސް ނިހާން ވިދާޅުވިއެވެ.
