ރީރަޖިސްޓްރީ ކުރުމަށް މުވައްޒަފުންނަށް މަޖުބޫރު ކުރަމުންދާތީ ވިމެން އެންޑް ޑިމޮކްރަސީން ކަންބޮޑުވުންފާޅު ކޮށްފި

ދައުލަތުގެ މުއައްސަސާތަކާއި ކުންފުނިތަކުގައި މަސައްކަތްކުރާ މުވައްޒަފުން މަސައްކަތް ކުރާތަނުން ވޯޓުލުމަށް ރީރަޖިސްޓްރީ ކުރުމަށް މަޖުބޫރުކުރަމުންދާތީ ވިމެން އެންޑް ޑިމޮކްރަސީ އިން ރިޔާސީ އިންތިޚާބު އޮބްޒާވް ކުރުމަށް އެކުލަވާލި ޚާއްސަ ކޮމެޓީން ކަންބޮޑުވުންފާޅުކޮށްފިއެވެ.

ވިމަން އެންޑް ޑިމޮކްރަސީގެ ފަރާތުން ބޭއްވި ޚާއްސަ ނޫސްވެރިން ބައްދަލުވުމެއްގައިއެޖަމިއްޔާގެ ރައީސް ޝަފާތު އަހުމަދު ވިދާޅުވީ ދައުލަތުގެ ކުންފުނިތަކާއި ވުޒާރަތަކުގެ މުވައްޒަފުންނަށް މަޖުބޫރުކޮށްގެން ރީރަޖިސްޓްރީ ކުރާ ޚަބަރުތައް ލިބިފައިވާ ކަމަށާއި، އެމުވައްޒަފުން އެމީހުންގެ ކަންބޮޑުވުންތައް ހިއްސާކޮށްފައިވާ ކަމަށެވެ.

ޝަފާތު ވިދާޅުވީ އެއްވެސް ފަރާތަކުން މަޖުބޫރުކޮށްގެން ރީރަޖިސްޓްރީ ކުރުވައިގެން ނުވާނެ ކަމަށާއި، އެއީ ބަލައިގަނެވޭނެ ކަމެއް ނޫން ކަމަށެވެ. ރީރަޖިސްޓްރީ ކުރުމާއި ވޯޓުލާން ދިއުމަކީ ކޮންމެ މީހަކަށް ވެސް ލިބިފައިވާ ހައްގެއް ކަމަށާއި، އެމީހަކު ރީރަޖިސްޓްރީ ކުރަން ބޭނުންވާ ތަނެއް އެނގޭނީ އެމީހަކަށް ކަމަށެވެ.

މިހާތަނަށް ރީރަޖިސްޓްރީ ކޮށްފައިވާ ފޯމުތަކުގެ މައްސަލަތައް ދިމާވެފައިވާކަން ފާހަގަކުރައްވައި ޝަފާތު ވިދާޅުވީ ރީރަޖިސްޓްރީ ކުރިތަން ނޫން އެހެންދިމާލަށް ވޯޓުލާންދާން ޖެހުމާއި އެކަކު ދެތަނަށް ވޯޓުލެވޭ ގޮތަށް ވެސް ރީރަޖިސްޓްރީ ކޮށްފައިވާ ކަމަށެވެ.

"އެއީ ގަދަބާރުން ކުރުވައިގެން ވާނެ ކަމެއްނޫން. އަދި ގަދަބާރުން އެކަން ކުރުވަންޏާ އަޅުގަނޑުމެން ނުޖެހޭ އެކަމަކަށް ތަބާވާކަށް. ރީރަޖިސްޓްރީ ކުރާތަންނޫން އެހެން ތަނަކަށް ރީރަޖިސްޓްރީ ކޮށްފައި. މިކަހަލަ ޚަބަރުތައް ލިބޭ. ދެފަހަރު ރީރަޖިސްޓްރީ. ދެލޮކޭޝަންއަކަށް އެކަކު ރަޖިސްޓްރީކޮށްފައި ވެސް އެބައިން. މިފަދަ ކަންކަމަކީ ބަލައި ގަނެވޭނެ ކަމެއް ނޫން" ޝަފާތު ވިދާޅުވިއެވެ.

ވިމެން އެންޑް ޑިމޮކްރަސީގެ ޗީފް އޮޕަރޭޓިން އޮފިސަރ އައިޝަތު ޝީޒާ ވިދާޅުވީ ދައުލަތުގެ މުއައްސަސާތަކުގެ މިނިސްޓަރުން ހާއްސަ ޓީމްތައް ހަދައިގެން މިނިސްޓަރުންގެ ބެލުމުގެ ދަށުން ރީރަޖިސްޓްރީ ކުރުމުގެ މަސައްކަތްތައް ކުރަމުންދާ ކަމަށެވެ.

އެގޮތުން ދައުލަތުގެ މުއައްސަސާތަކުން ރީރަޖިސްޓްރީ ކުރާ ފޯމްތައް ރިޔާސީ އިންތިޚާބަށް ކުރިމަތިލައްވައިގެން އުޅުއްވާ ބޭފުޅެއްގެ އަނބިކަބަލުންގެ ކެންޕޭން ވަޑައިގެން ދައްކަވާފައިހުރި ވާހަކަތަކުގެ ވީޑިއޯއެއް އާންމުވެފައިވާކަން ފާހަގަކުރައްވައި ޝީޒާ ވިދާޅުވީ އެވީޑިއޯ އިން އެކަނި ވެސް މިއިންތިޚާބަށް ނުފޫޒު ފޯރުވުމަށް ކުރަމުންދާ މަސައްކަތްތައް ހާމަވެގެންދާ ކަމަށެވެ.

"އިލެކްޝަން ކޮމިޝަނަށް އެފޯމްތައް ދިއުމުގެ ބަދަލުގައި އެފޯމްތައް އެހެން އޮފީހަކަށް އެހެން ކެންޑިޑޭޓެއްގެ އަނބިކަނބަލެއްގެ އަތަށް ދިއުމަކީ އަޅުގަނޑުމެން ގަބޫލުކުރާ ކަމެއް ނޫން. އެއީ ޕްރޮސެސްގެ ފެއާރނަސް ވަރަށް ބޮޑަށް ގެއްލިގެންދާ ކަމެއް. އަދި މިކަމަށް އެބޭފުޅުންގެ ނުފޫޒު ވަރަށް ބޮޑަށް އޮތްކަން ހާމަވެގެންދާ ކަމެއް." ޝީޒާ ވިދާޅުވިއެވެ.

ޑިމޮކްރަސީއިން ރިޔާސީ އިންތިޚާބު މޮނީޓަރކޮށް އޮބްޒާވް ކުރުމަށް އެކުލަވާލި ކޮމެޓީގެ މެންބަރު އަހުމަދު ނަސީރު ވިދާޅުވީ ރިޔާސީ އިންތިޚާބަށް ތައްޔާރުވަމުންދާއިރު މިހާރުގެ މާހައުލުން ފެންނަނީ ހުރިހާ ގޮތަކުން ވެސް އިލެކްޝަން ކޮމިޝަނަށް ނުފޫޒު ފޯރުވުމަށް މަސައްކަތް ކުރަމުންދާ މަންޒަރު ކަމަށެވެ. މިއިންތިޚާބު މިނިވަން އިންސާފުވެރި އިންތިޚާބަކަށް ހެދުމަށް އިލެކްޝަންސްގެ ގާނޫނުގައި އޮތް ގޮތަށް މަސައްކަތް ކުރަންޖެހޭ ކަމަށެވެ.

"އަޅުގަނޑަކަށް ނުވިސްނޭ މިއިންތިޚާބު މިހައި އުނދަގޫ ގޮތަކަށް މިހައި ހަމަނުޖެހޭ ގޮތަކަށް ކުރިއަށް ގެންދަން ޖެހޭ ސަބަބެއް. އަޅުގަނޑު ދެކޭ ގޮތުގައި މިއިންތިޚާބަކީ ވަރަށް ފުރިހަމަ އިންތިޚާބަކަށް ވާންޖެހޭނެ. އެހެންވީމަ ހުރިހާ ފަރާތަކުން ވެސް އެއްވެސް ފަރާތަކުން އިންތިޚާބަށް ނުފޫޒު ފޯރުވުން މަސައްކަތް ކުރުން ހުއްޓާލައްވާ ރައްޔިތުން އެދޭ ފަދަ ތެދުވެރި އިހްލާތެރި ގޮތުގައި މިނިވަން އިންސާފުވެރި އިންތިޚާބެއް ބޭއްވުމަށް ކަމާބެހޭ ހުރިހާ މުއައްސާސާތަކުން އެއްބާރުލުން ދެއްވާނެ ކަމަށް އުންމީދު ކުރަން" ނަސީރު ވިދާޅުވިއެވެ.

ވިމެން އެންޑް ޑިމޮކްރަސީން ރިޔާސީ އިންތިޚާބު އޮބްޒާވް ކުރުމަށް ޚާއްސަ ކޮމެޓީން އެކުލަވާލާފައިވާއިރު މިޖަމިއްޔާއަކީ ޑިމޮކްރަސީ ޕްރޮމޯޓް ކުރުމަށް ވަރަށް ބޮޑަށް ވަކާލާތު ކުރާ ޖަމިއްޔާއެކެވެ. އަދި މިއަހަރުގެ ރިޔާސީ އިންތިޚާބު އޮބްޒާވް ކުރުމަށް މިކޮމެޓީއާއެކު މަސައްކަތް ކުރަން ބޭނުންވާ ފަރާތްތަކަށް އެފުރުސަތު ވެސް މިހާރު ވަނީ ހުޅުވާލާފައެވެ.