އަނިޔާވެރިކަމުގައި އެންމެ ހިތި ރަހަލީ މާމިގިލި ރައްޔިތުން: ފައިސަލް
30 ޖުލައި 2018 | ހޯމަ 18:22ރަނގަޅު މަގެއް ދައްކާ ކޮންމެ މީހަކަށް އޮތީ ޖަލުގޮޅި
މާމިގިލި ކެމްޕެއިން ޓީމާއި ފައިސަލް ބައްދަލުކުރައްވަނީ
ރައީސް ޔާމީންގެ ސަރުކާރުގެ އަނިޔާވެރިކަމުގެ އެންމެ ހިތިކަން މެދުވެރިވެފައިވަނީ އދ އަތޮޅު މާމިގިލި ރައްޔިތުންނަން ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓްގެ ރަނިންގމޭޓް ފައިސަލް ނަސީމް ވިދާޅުވެއްޖެއެވެ.
ރައްޔިތުންގެ ތާއިދު ހޯއްދެވުމަށް އދ އަތޮޅަށް ކުރައްވާ ދެ ދުވަހުގެ ކެމްޕެއިންގެ ދަތުރުގެ ތެރެއިން ހޯމަ ދުވަހުގެ ރޭ މާމިގިލީ ކެމްޕެއިން ޓީމާ ބައްދަލުކުރައްވާ ވާހަކަ ދައްކަވަމުން ފައިސަލް ވިދާޅުވީ ރައްޔިތުން އެދޭ ބަދަލު ގެނެއުމަށް އިސްލާހީ މަސައްކަތް ކުރާ ކޮންމެ ބޭފަޅަކު ދުވަސްތައް ހޭދަކުރައްވަން ޖެހެނީ ޖަލުގެ ތޭރިތަކުގެ ފުރަގަހުގައި ކަމަށެވެ. އެކަން މާމިގިލީ ރައްޔިތުންނަން އެނގިލައްވާނެކަން ފާހަގަކުރައްވަމުން ފައިސަލް ވިދާޅުވީ ރައީސް ޔާމީން ސަރުކާރުގެ އަނިޔާވެރިކަމުގެ އެންމެ ހިތި ރަހަ މެދުވެރިވެފައި ވަނީ މާމިގިލީ ރައްޔިތުންނަން ކަމަށެވެ.
ގާސިމް އިބްރާހިމްއަށް އިޝާރަތް ކުރައްވާ ވާހަކަފުޅު ދައްކަވަމުން ފައިސަލް ވިދާޅުވީ އެމަނިކުފާނަކީ އެތަކެއް ރައްޔިތުންނަން ދީލަތި އެހީތެރިކަމެއް ވެދެއްވާފައިވާ އިސްލާހީ މަސައްކަތުގައި ގިނަ މަސައްކަތްފުޅުތަކެއް ކުރެއްވި ލީޑަރެއް ކަމަށެވެ. އެހެންނަމެވެސް މިއަދު ރައީސް ޔާމީންގެ އަނިޔާވެރި ސަރުކާރުން ބޭއިންސާފުން ޖަލުހުކުމް އެމަނިކުފާނަން އިއްވާފައިވާތީ ހިތާމަކުރައްވާ ކަމަށް ފައިސަލް ވިދާޅުވިއެވެ.
މާމިގިލި ކެމްޕެއިން ޓީމާއި ފައިސަލް ބައްދަލުކުރައްވަނީ
އެހެންކަމުން އަނިޔާވެރިކަމާއި ކޮރަޕްޝަނަށް ނޫނަކޭ ބުނެ އަންނަ ސެޕްޓެމްބަރ މަހުގެ 23 ވަނަ ދުވަހު ގުޅިފައިވާ ސިޔާސީ ޕާޓީތަކަށް ބަދަލަކަށް ވޯޓު ދިނުމަށް ފައިސަލް އެދިވަޑައިގެންނެވިއެވެ.
މި ދަތުރުގައި އެމްޑީޕީގެ ނައިބު ރައީސް މުހައްމަދު ޝިފާޒާއި، ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފާއި ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމްގެ އިތުރުން ޖުމްހޫރީ ޕާޓީގެ ކައުންސިލްގެ ދެ މެމްބަރުން ކަމަށްވާ އާދަމް އާޒިމާއި، މުހައްމަދު މަލީހު ބައިވެރިވަޑައިގަންނެވިކަން ފާހަގަކޮށްލެއެވެ.
ދެ ދުވަހުގެ މި ދަތުރުފުޅުގައި ހޯމަ ދުވަހު ފައިސަލް ވަނީ މަންދޫ، ފެންފުށީ، ދިއްދޫ، އަދި ދިގުރަށަށް ވަޑައިގެންފައެވެ. އަންގާރަ ދުވަހު ހަންޏާމީދޫ، އޮމަދޫ، މަހިބަދޫ، ކުނބުރުދޫ އަދި މާމިގިއްޔަށް ވަޑައިގަންނަވާނެއެވެ.
